Монгол Улсын Ерөнхий сайд, Ерөнхийлөгчөөр тус тус хоёр удаа сонгогдон ажиллаж асан энэ хүнийг Цахиагийн Элбэгдорж гэдэг.

Сэтгүүлчийн угшилттай болохоор нь ч тэр үү би энэ хүний талаар муу  амлаж байсангүй. Заримдаа бүр нэг  болохгүй тохиолдолд “Уг нь сэтгүүлчийн хугархай даа. Яаж байгаа юм бол… ” гэж өөрийгөө тайтгаруулдаг гэх үү дээ.

Төрийн өндөр албан тушаалыг олон жил  хашна гэдэг  хэрийн аавын хүүд олдоод байдаг ч ажил биш л дээ. Гэхдээ л миний мэдэх энэ эрхэмд олдсон л байхгүй юу.

Төрийн өндөр дээд албан тушаалыг хашсаныхаа хэрээр өндрөөс унаж байгаа мэт байдалд ордог бичигдээгүй хууль сүүлийн үед манайд үйлчилж байгаа.

Н.Энхбаяр Ерөнхийлөгчийг хөл гарыг нь гозгонуулаад нэг л их том гэмт хэрэгтэн мэтээр аваад явж байсан. Тэгтэл өнөөдөр гэмгүй болчхоод л явж байна.

Эхний хоёр Ерөнхийлөгчийн хувьд ажин түжин байгаа мэт боловч Н.Багабандийг “Алтан бүст”, “Луйварчин, түйвэрчин” гээд л. Анхны Ерөнхийлөгч П.Очирбатыг овоо зэгсэн мөнгөөр зөвлөх энэ тэр хийгээд чамгүй их зүйл хураачхаад би мөнгөтэй гэсэн шиг хамраа хүртэл хасуулчхаад сууж байгаа  гэцгээдэг.

Тэгвэл Ц.Элбэгдорж Ерөнхийлөгч асныг гадаадад байх хугацаанд нь ёстой “шавайгаа ханатал муулна” гэгч болсон. Томчуудын нэгнээ газар доогуур оруулж бараг л булшилдаг энэ үйлдэл хүүхдэд хэрхэн тусдагийг 8 настай зээ охиныхоо яриагаар хүргэе. Бид хоёр 10 минут  ярьсан ч би бүтэн цаг ярьсан мэт ядарч, бас тэвдэж байв.

-Эмээ энэ хүн чинь юу хийдэг байсан аав бэ?

-Манай улсын Ерөнхийлөгч байсан юм.

-Тэгээд халагдчихсан юм уу?

– Үгүй ээ. Ерөнхийлөгчийн ажлыг  тодорхой хугацаанд хийдэг байхгүй юу.

-Аан, тэгээд энэ аав чинь зугтааж яваагүй биз дээ?

-Яаж байна?

-Дэлхийн цагдаагаар олуулна гээд байсан биз дээ. Зургийг нь гаргаж байгаад хэлсэн ш дээ. Бас  арай залуухан нэг ахтай хамт олуулна гээд байсан?

-Хүүхэд тийм юм ярьдаггүй юмаа, миний охин. Хичээлээ хийсэн үү?

-Хийсэн, хийсэн, та хариул даа.  Энэ хүн олон мөнгө идсэн үү?

-Үгүй ээ, миний охин. Хүн мөнгийг иддэггүй биз дээ.

-Олон хүнээс  мөнгө авчихсан юм уу?

-Яаж байна?

-Та хариул л даа, би мэдмээр байна ш дээ?

– Эмээ нь сайн мэдэхгүй байна.

-Аа, та худлаа, жаахан хүүхдэд  хамаагүй юм ярьж  болохгүй гээд л тэгж байгаа ш дээ.

-Энэ аавыг Цахиагийн Элбэгдорж гэдэг юм. Ховд аймагт төрсөн. Анх удаа хотод орж ирээд зайрмаг идэж үзчихээд “Ээждээ энэ сайхан юмнаас аваачиж өгөх юмсан” гэж бодож байсан гэсэн.

-Цааш нь цааш нь…?

-Энэ хүн чинь эмээ шиг нь сэтгүүлч мэргэжилтэй. Цэргийн сонины сурвалжлагчаар ажиллаж байсан байхгүй юу. 1989 онд Ардчилал гарахад гар бие оролцсон, их ч ажилласан  хүн байгаа юм.

-Би том болж байгаад ардчиллыг сайн ойлгоноо.  Энэ хүн хүүхэдтэй юу?

-Хүүхэдтэй. Хүүхдүүд нь одоо том болсон, Чам шиг жаахан хүүхэд байхгүй.

– …ЕР нь яагаад хуучин Ерөнхийлөгчөө дэлхийн цагдаагаар бариулж авчрах гээд байсан юм. Энэ хүн чинь тэгээд цагдаагүйгээр хүрээд ирлээ ш дээ.

-Харин тийм ээ, өөрөө хүрээд л ирлээ.

-Аанха, тэгэхээр энэ хүн чинь  хэрэг хийгээгүй гэсэн үг юм байна. Өөрөөс нь айж байгаа хүмүүс л  худлаа ярьсан байх нь?

-Яасан хүн айсан байх уу?

-Байхгүй хойгуур нь муу хэлсэн хүмүүс л  айж байгаа байх, бас  гүтгэсэн?

-Гүтгэнэ гэдэг чинь яана гэсэн үг билээ хөө?

-Яагаав дээ. Худлаа хэлчихийг. Дөөгийнөө  заримдаа худлаа хэлдийш дээ, тэрэн шиг.

-Дөөгий юу гэж худлаа хэлдэг гэж?

-Би гүтгэхийг ойлгож байгаа. Гэхдээ та миний асуултад л хариул, би  өнөөдөр тань шиг сэтгүүүлч за?

-За.

-Энэ аавын эхнэр, хүүхдүүд нь өмөөрсөн байх даа, тийм ээ?

-Хэнийг?

-Энэ аавыг л байхгүй юу даа, эмээ минь. Гэхдээ одоо тусгаарлалтаас гараад л нөгөө хүмүүстэйгээ уулзах байх тийм ээ?

-Өмөөрнө ш дээ. Намайг хүн загнаад муулаад байвал чиний ээж, бас чи өмөөрнө биз дээ… Нөгөө хүмүүс гэдэг нь хэн билээ.

-Шүүхээс дуудсан гээд дэлхийн цагдаагаар  хайлгах гээд байсан хүмүүс нь?

-Тэгэх байх аа.

-Та энэ аавыг муу юм хийсэн гэж бодож байгаа юу?

-Ажил хийж байгаа хүнд сайн ч юм бий, муу ч юм бий. Алдаа гаргахыг үгүйсгэхгүй. Харин алдаагаа ойлгоод дахиж алдахгүй бол тэр хүн их сайн хүн.

-Тэгвэл энэ намхан  Ерөнхийлөгч  аав чинь ямар хүн бэ?

-Эмээ нь тийм ч муу хүн гэж боддоггүй ээ. Яагаад гэвэл  хүмүүс янз янзын юм ярьдаг. Аль нь  үнэн, хэн нь буруу  ярьж байгааг мэдэх газар нь л мэдэх байх.

-Одоо Баттулга Ерөнхийлөгч аавыг ажлаа хийхээ болихоор бас л ингэх үү?

-Үгүй байх аа. Чи яагаад “Ерөнхийлөгч аав” гээд байгаа юм бэ?

-Та надад Ерөнхийлөгч чинь Монгол Улсын аав гээ биз дээ.

-Нээрээ тийм  л дээ.

гээд  ТВ-ийн мэдээ үзэхээр суваг сольсноор бид хоёрын ярилцлага хүчээр өндөрлөсөн юм. Орой бүр нүдний шилээ зүүгээд ТВ-үүдийн мэдээ үзэхдээ “Чимээгүй бай даа, эмээ нь мэдээ үзэж байна” гэдэг болохоор намайг ойлгосон хэрэг.

Түүний бяцхан ертөнцөд  хорвоогийн элдэв юмс аль эрт эргэлдээд эхэлчхэж. Томчууд бид ийм балчир хүүхдэд хүртэл нөлөөлөхүйц хэмжээнд  нэгнээ гоочилж, муучилж ярьдаг байх нь. Бодууштай…  Миний мэдэх хүнийг бяцхан охин маань ч бас мэдэхийг хүсч байна. Цагаан цаас шиг  гэнэн хонгор сэтгэлд нь хар толбо суулгахгүйгээр үр хүүхдээ өсгөхсөн. Эд чинь Монголын маань ирээдүй шүү дээ.