УИХ-ын дарга М.Энхболдыг огцруулах аян орон даяар буухиалж байна. Чухамдаа Нийслэлийн засаг дарга байхдаа газар наймаалж хөлжсөнөөс эхлээд 2016 оны сонгуулийн үеэр төрийн албыг худалдаж, төрийн эрхийг хууль бусаар авах хуйвалдаан зохион байгуулсан нь яалт ч үгүй үнэн болохоор энэ хүн хууль тогтоох байгууллагыг удирдаад сууж байх ёс суртхууны эрхгүй нь үнэн.

Үүний зэрэгцээ Монгол Улсын ерөнхийлөгчөөр хоёронтаа сонгогдож суусан Ц.Элбэгдорж гэж бас нэг нүдэнд орсон хог, шүдэнд орсон мах байна аа. МАНАН-гийн толгойлогч, Асем нэрийн дор хэдэн зуун тэрбумыг халаасалсан гээд түүний бузар булай бас л дуусч дундрахгүй бололтой.

Гэхдээ өнөөдөр улс төрчдийн,  энэ хоёрыг  харлуулан тэмцээд байгаачлан М.Энхболд суудлаасаа ховхрохоор, Ц.Элбэгдоржийг барьж шүүснээр Монгол Улсын нийгэм, ард түмний амьдрал өргөс авсан мэт сайжрах уу гэдэг асуудал бас байна.

М.Энхболдыг огцрохгүй бол УИХ-ын 40 гишүүн парламентын өдөр тутмын үйл ажиллагаанд оролцохгүй, хуралдаандаа суухгүй л гэнэ, нэр бүхий таван гишүүн “УИХ-ын дарга М.Энхболд огцор” гэсэн уриа лоозон бариад Төрийн ордонд сууж л байна, УИХ-ын даргыг огцрохгүй бол өрөөнөөс нь чирч гаргана л гэнэ. М.Энхболдын зохион байгуулсан гэх “60 тэрбумын…” гэдэг энэ хэрэг 2016 оны сонгуулиас хойш хоёр бүтэн хагас жил яригдаж байхад хэн ингэж чанга дуугарч байсан юм бэ…

Энэ хэрэгт М.Энхболд буруутайг хэзээ гэнэт мэдэж, тэмцэл  хаанаас эхэлсэн бэ гээд бодохоор У.Хүрэлсүхийн Засгийн газар Жижиг дунд үйлдвэрийг хөгжүүлэх сангийн бага хүүтэй зээлийг  УИХ-ын гишүүд, сайд нар, ойрын хүрээллийнхэндээ баруун солгойгүй тарааж өгсөн хэрэг мандсантай өдөр судар нь тун ойрхон байгаа юм.

Засгийн газрын 28 сангийн нэг энэ сангийн зээл  жижиг дунд үйлдвэр байгуулж, ажлын байр бий болгох, үйлдвэрлэл эрхлэх гэсэн эзэндээ болохоор хүрч очдоггүй, өчнөөн олон баримт бичиг, тээг садаа болсоор гацдаг атал мэдээлэлд ойр, эрх мэдэл бүхий хүмүүс ганц хоёрхон утасдаад авчихаж байгаа нь олны, УИХ дахь сөрөг хүчний дургүйцлийг төрүүлж эхэлсэн.

Олны эгдүүцэл, сөрөг хүчний хараанд өртсөн Засгийн газрын тэргүүн У.Хүрэлсүх аргагүй шахаанд орж яг энэ санг хамаарч харьяалдаг ХХААХҮ-ийн сайд Б.Батзоригоо золигт гаргаж сайдаас нь огцруулснаар л  асуудлыг намжаахыг хичээсэн. Энэ нь Б.Батзоригийг УИХ-ын гишүүнээс түдгэлзүүлэх саналыг Улсын Ерөнхий прокуророос оруулж ирэхэд хамгаалж аваад үлдсэнээс тодорхой.

Ер нь Засгийн газрын мэдлийн сангийн зээл хаашаа урсаад байгааг мэдэхгүй сууж байдаг Ерөнхий сайд гэж хаашаа харсан юм байх билээ. Өөрөө чухамдаа гар оролцсон, чиг өгч байсан болоод  л хөөрхий хурууныхаа үзүүрээр залж байсан Б.Батзоригийгоо яаж бүр түлхчих вэ гээд олонхиороо авч үлдсэн нь тэр. Түүнийг авч үлдэхэд У.Хүрэлсүх УИХ-ын гишүүн биш ч гэлээ, Намын дарга гэдгээрээ нөлөөлсөн л байж таарна.

Үүний дараа Ерөнхий сайд У.Хүрэлсүх засгийн газрын бусад сангуудыг ч шалгана гэж сүржин мэдэгдсэн ч энэ ажлын чимээ, үр дүн харагдахгүй л өнөө хүрч байна.

ХХААХҮ-ийн сайд асан Б.Батзориг ганцаараа зээл тараагаад, өөрөө ганцаараа тэр зээлээс аваад эхнэрийнхээ “Тээвэр ачлал” компанил  өгчихсөн ч юм биш. МАН-ын, УИХ-ын, Засгийн газрын гишүүд ч энэ сангийн хөнгөлөлттэй зээлийг хэдэн тэрбумаар нь халаасалсан нь дурдагдаад байгаа. У.Хүрэлсүхийн сайд болгож ивээлдээ аваад ганц сар болж байгаа ЗТХ-ийн сайд Я.Содбаатар гэхэд л “Эпота Анарваан” компанидаа 1,2 тэрбум, БХБ-ын дэд сайд Лхамсүрэн “Нүүдэлчин агро” компанидаа 950 сая төгрөгийн зээл авсан байх жишээтэй. Тэгээд УИХ-ын гишүүн Ж.Энхбаяр, Н.Оюундарь, Н.Учрал, Х.Болорчулуун, М.Оюунчимэг, Г.Солтаан гээд үргэлжилж байна. МАН-ын ерөнхий нарийн бичгийн дарга Д.Амарбаясгалан, нарийн бичгийн дарга Бат-Энх нарын нэн ч энэ жагсаалтад байж л байгаа. Эд бүгдээрээ л МАН-ын шилдэг тэргүүний түшээд.

Ард түмэнд, үйлдвэрлэл эрхэлье, төрийн гар хаалгүйгээр өөрийнхөө амьдарлыг дээшлүүлье, тэгээд бас ажлын байр бий болгож бусдад нэмэр болж төрийн ачааллыг хөнгөлье гэсэн хүнд олддоггүй, хөнгөлөлттэй энэ зээл ингэж МАН-ын томцуулын гараар дамжин өндөр хүүтэй болж ард иргэдийн нуруун дээр ачаа болж байхад МАН-ын дарга У.Хүрэлсүх үүнийг мэдээгүй гэвэл түүн шиг худал зүйл байхгүй.

Эцэст нь юу болов. У.Хүрэлсүх гэдэг хүн “Зээл авсан хүмүүст хариуцлага тооцно, сэлэмдэнэ, 2020 оны сонгуульд нэр дэвшүүлэхгүй, зээл авсан хүмүүс уучлал гуй” гэж сүржигнэсээр байгаад Засгийн газраа авч үлдсэн. Чухамдаа энэ нь энэ хүмүүст хариуцлага тооцох гэж байгаад нь ч биш хэзээнээсээ газрын наймаачин гэж олон түмний дургүй байдаг УИХ-ын дарга М.Энхболдыг намынхаа удирдах зөвлөлийн хурал дээр “М.Энхболд та бол МАНАН-гийн толгойлогч, Та албан тушаалаасаа огцор” гэж улаан нүүрэн дээр нь хэлснээр нэр хүнд нь жаахан дээшилж, олны хайрыг татсантай холбоотой. У.Хүрэлсүхийн тэргүүлсэн Засгийн газрын доод албатууд ажлын байрандаа архидан согтуурч нэгнийхээ амийг бүрэлгэсэн хэрэг ч  бас л олны анхаарлын гадна үлдэх янзтай.

Энэ бүхэн бол хэзээний  “улаан хамгаалагч” шоучин У.Хүрэлсүхийн суртал нэвтрүүлгийн баг тун чадамгай ажиллаж “энэ улс оронд хамгийн бузар булай, муу муухай хүн бол УИХ-ын дарга М.Энхболд” гэдэг ухуулгыг хэвлэл мэдээлэл, олон нийтийн сүлжээгээр гарамгай сайн явуулж байгаагийн үр дүн.

Хэвлэл мэдээллийнхэн ч үүнд нь уусан автаж, “Ми.Энхболдыг хэзээ өрөөнөөс нь чирч гаргах гэж байна”, “Энхболд хэзээ огцрох гэж байна” гэж гүйлдээд Засгийн газрын үйл ажиллагаанаас түр хөндирйч орхисон. Агаарын бохирдол хэмжээнээс хэтрэн Засгийн газрын залгисан их хөрөнгө ямар ч үр дүнгүй урсч байхад аман дотроо  л “энэ утааг яана вэ” гэхээс хэтрэхгүй.

“М.Энхболд та огцор” гэдэг энэ хэлц үг ийн  олон нийтийн сүлжээ, хэвлэлээр тархан одоо ардын баатар болох гэсэн улстөрчдийн амны уншлага болоод олон нийтэд Жижиг дунд үйлдвэрийн хөрөнгийг гарын салаагаар урсгасан Засгийн газрын буруу, булхайг мартагнуулж эхэллээ.

Монголчууд туйлшрамтгай, бас мартамхай улс. Нийслэл Хүрээг эзлээд байсан гамин цэргийг хүрээнээс хөөж гаргасан барон Унгерний гавьяаг нь л дурсан шүтэцгээж байснаас биш тэдний цагаан цэргүүдийн харгислал, дээрэм тонуулыг бас л  анзаарахгүй, бараг л уучлах нь холгүй байсан гашуун түүх бий.

Түүн лүгээ өнөөдөр хамаг муу муухай бүхний үүр М.Энхболдыг л зайлуулах гээд, улаан нүүрэн дээр нь “огцор” гэж хэлээд  байгаа У.Хүрэлсүх л ардын баатар шиг харагдаад түүний тэргүүлсэн Засгийн газрын алдааг олж харах билгийн нүдгүй болцгоож байна.

Ганцхан жишээ гэхэд л 2018 оны эхэнд 1630 төгрөгийн үнэтэй байсан АИ-92 бензиний үнэ зөвхөн энэ онд найман удаа нэмэгдэж өнөөдөр 2000 төгрөгт хүрээд байгааг ч мартсан. Оны эхнээс 400 төгрөгөөр нэмэгдсэн энэ үнийг саяхан арай гэж шоудан 100 төгрөгөөр буулгасныг энэ засгийн газрын алдар гавьяа мэтээр сэтгэн залбирцгаах. Өмнө дурдсанчлан У.Хүрэлсүх ч энэ мэтийгээ сүр бадруулан сурталчлахдаа ч гарамгай. Зарим эх сурвалжийн хэлж байгаагаар У.Хүрэлсүх хэдэн зуун сая төгрөгөөр бичээчид хөлслөн энэ бүхнийг захиалан бичүүлж байгаа гэх.

Юутай ч өнөөдөр дотроо хоёр хуваагдаад байгаа эрх баригч МАН доторхи  У.Хүрэлсүхийн талынхан “УИХ-ын дарга М.Энхболд огцор” хэмээн чангаас чанга хашгирцгааж байна. УИХ-ын дарга М.Энхболдыг огцруулах, бичигт У.Хүрэлсүхийн талынхан, өнөөх ЖДҮ хөгжүүлэх сангаас зээл авагсад бүгд гарын үсэг зурчихаад чанга дуугаар шаардаж явна.

АТГ-ын мөрдөн шалгах хэлтсийн ахлах мөрдөгч, ахлах комиссар Ч.Жаргалбаяр арваннэгдүгээр сард мэдээлэл хийхдээ “УИХ гишүүн Л.Оюун-Эрдэнийн хамаарал бүхий компани ЖДҮХС-аас зээл авсан асуудал шалгагдаж байгаа. Энэ хүний хамаарал бүхий этгээдүүдэд хамааруулан шалгаж байгаа” гэжээ. Харин өнөөдөр “М.Энхболд огцор” гэж хашгирагчдын тэргүүн эгнээд энэ Л.Оюун-Эрдэнэ хамгийн чанга хашгиран гүйж явна.

ЖДҮХС-аас зээл авагсдыг нэг нүдээр үзэхгүй байсан иргэд өнөөдөр Л.Оюун-Эрдэнийн энэ булхайг умартаад бараг л ороной дээд шүтээнээ болгочих гээд хошуурч сууна.

“Хулгайчийг бариарай” гэж хулгайч л хамгийн түрүүнд хашгирч олны анхаарлыг өөр тийш нь хандуулдаг гэсэн дээ.

МАН-ын 2016 оны  сонгуулийн мөрийн хөтөлбөрийг байя гэхэд,  ойроор нь У.Хүрэлсүх Ж.Эрдэнэбатын засгийн газрыг унагааж өөрийн засгийн газраа байгуулж байхдаа юу юу гэж хашгирч, амлаж байсныг эргээд нэг бодоцгооход гэмгүй л болов уу.

Тийм ээ, энэ төрд шударга ёс тогтооход М.Энхболд гэдэг хүнийг огрццлах зайлуулах нь тун чухал нөлөөтэй гэдгийг ойлгож байна.

Гэхдээ М.Энхболд гэж нэг ганц хүнийг зайлуулах их аянд дөрөөлөн мордоцгоож хошуураад гүйцэтгэх засаглал, давхар дээлтэй энэ Засгийн газрын хийх ёстой, хийж чадаагүй амлалт, булай муухай бүхнийг мартагнаад байгаа юм биш биз.

Биднийг М.Энхболд гэдэг ганц хүнийг муулаад сууж байх хооронд У.Хүрэлсүх, тэдний багийнхан ЖДҮ-ийг хөгжүүлэх  сан, бусад сангуудынхаа хамаг булхайг эвтэйхэн засч янзалчихаад нэг л өдөр барих барьцгүй, харах бараагүй болгочихсон байвал яах вэ…..