“Эрдэнэс Монгол” ХХК, Ашигт малтмал газрын тосны газар, , “Блүүмберг” телевиз хамтран “МОНГОЛЫН ЭРДЭС БАЯЛАГ-УУЛ УУРХАЙ 2018” хөрөнгө оруулалтын чуулга уулзалтыг өнөөдөр зохион байгууллаа.  Монгол Улсын хөрөнгө оруулалтын орчин, эрдэс баялгийн салбарын өнөөгийн байдал, цаашид хэрэгжүүлэх арга хэмжээ, баримталж буй бодлого, хөтөлбөрөө сурталчлах, эрдэс баялгийн салбарт хөрөнгө оруулалт татах, шинэ техник технологи нэвтрүүлэх, гадаад зах зээлд өрсөлдөх чадварыг нэмэгдүүлэх зорилготой уг чуулга уулзалтад 10 гаруй орны төлөөлөгчид оролцсон юм.

Эрдэс баялгийн салбарын хөрөнгө оруулалт болон хөрөнгө оруулагчдын итгэл нь аль нэг байгууллагын оролдлогоор бус харин төрийн бүх байгууллагууд болон хөрөнгө оруулагчдын хамтын ажиллагаа, нэгдсэн ойлголтын үндсэн дээр өргөжин тэлэх учиртайг салбарынхан онцолж байсан. Тухайлбал, Эрдэнэс Монгол ХХК-ийн Дэд захирал Г.Ганболд илтгэл тавьсан тэрээр Эрдэнэс Монгол ХХК нь урт хугацааны төлөвлөгөөндөө хөрөнгө оруулагчидтай хамтын ажиллагааг бэхжүүлэхэд анхаарч ажиллаж байгааг дурдаад  Багануур ХК, Шивээ-Овоо ХК-ийн уурхайн өргөтгөлийн үйл ажиллагаанд технологийн дэмжлэг үзүүлэх чиглэлээр хамтран ажиллах боломж байгааг дуулгалаа. Түүний илтгэснээр тус компани нь Олон улсын стандарт, удирдлагын тогтолцоог нэвтрүүлсэн хөрөнгийн удирдлагын компани болох зорилт тавин ажиллаж байгаа бөгөөд  энэ хүрээнд  АХБ-ны техник туслалцааны зээлийн санхүүжилтээр компанийн “үйл ажиллагаа менежментийн чадавхийг бэхжүүлэх” төслийг  өөрийн болон охин компаниудад хэрэгжүүлж байгаа ажээ.

Чуулга уулзалтын үдээс хойшхи хуралдаанд Эрдэнэс Монгол компанийн Хуулийн хэлтсийн дарга Б.Сүндэръяа “ Уул уурхай дахь төрийн өмчийн компанийн оролцоо, тэдгээрийн засаглал, эрхзүйн орчин” сэдвээр илтгэсэн.  Төрийн өмчит компанид төрийн төлөөлөл хэрэгжүүлэх,  төрийн өмчийг эзэмших, ашиглах, захиран зарцуулах, төрийн эзэмшлийн хувьцааны төлөөллийг хэрэгжүүлэх зэрэг асуудлыг Компанийн тухай хуульд зохицуулаагүйгээс тус хуулийн дагуу үйл ажиллагаа эрхлэн явуулахад төрийн өмчит компанид хүндрэл үүсдэг гэлээ.

Тэрээр Эрдэнэс Монгол компанийн өнөөгийн нөхцөл байдлыг Казакстаны Самрук Казына, Малайзын Казанах Нашионал, Сингапурын Темасек холдингс компаниудтай харьцуулан тайлбарлаж, эрдэс баялгийн салбар дахь төрийн өмчит болон төрийн өмчийн оролцоотой аж ахуйн нэгжүүдийн удирдлага, зохион байгуулалтыг сайжруулах, олон улсын сайн засаглалын стандарт, зарчмуудыг нэвтрүүлэх талаар шаардлагатай шийдлийг олох  улмаар “Эрдэнэс Монгол” ХХК-ийн үйл ажиллагааг олон улсын жишигт нийцүүлэн хөгжүүлэх нь зүйтэй байна хэмээн онцолсон юм.

Боловсруулсан: С.Хүрэл