АНУ тэргүүтэй барууныхан Оросын эсрэг шинэ төрлийн дайн-сэтгэлзүйн дайн эх­лүүл­лээ гэж ОХУ-ын Батлан хам­гаалахын сайдын төрийн гурав­дугаар ангиллын жинхэнэ зөв­лөх Андрей Ильницкий “Арсенал Отецества” сэтгүүлд  өг­сөн ярилцлагадаа мэдэгдсэн байна.

Түүнийхээр бол барууныхан  орчин үеийн арми, цөмийн зэвсэгтэй Орос өөрсдөд нь асар их хохирол учруулах болохоор  шууд цэргийн мөргөлдөөн үүсгэхээс зайлсхийж байна, ер нь ч ийм зэвсэгт мөргөлдөөн ойрын арван жилдээ болох магадлал байхгүй гэнэ. Ийм л болохоор АНУ тэргүүтэй Барууныхан Оросын эсрэг мэдээллийн уян хатан дайн эхлүүлээд байгаа юм гэж зөвлөх онцолжээ.

“Энэ бүхэн дайны шинэ хэлбэр бий болгож байна. Дайны сонгодог хэлбэрийн үед эсрэг талынхаа амьд хүчийг устгадаг бол, кибер дайны үед дайсныхаа дэд бүтцийг устгана, харин энэ шинэ дайны гол зорилго нь хүмүүсийн ухамсрыг устгана нэг үгээр хэлбэл эсрэг талынхаа нийгмийн ухамсар, соёл иргэншил, сэтгэл зүйг өөрчилнө. Ийм дайныг л би сэтгэлзүйн дайн гэж нэрлээд байгаа юм” гэж Ильницкий мэдэгдсэн байна.

Төрийн зөвлөхийн хэлснээр бол амьд хүч, дэд бүтцийг, “хувьслын явцад”, сэргээн босгох зэргээр засч сэргээж болно, харин “сэтгэлзүйн” ийм дайны үр дагаврыг шууд арилгах хэцүү, хамгийн багаар бодоход хүний амьдралын нэг үе өнгөрсөн хойно залруулдаг, тэгээд ч ингээд засч залруулна гэдэг тодорхой жоргүй байдаг гэнэ.

Батлан хамгаалахын сайдын зөвлөх бас сэтгэлзүйн ийм дайны эсрэг эн тэргүүнээ авах арга хэмжээг дурдсан байна. Түүнийхээр бол энэ нь интернетийн хувьд тусгаар байх, иргэний болон хүчний байгууллагын хүрээнд мэдээллийн довтолгооны эсрэг ажиллах боловсон хүчин бэлтгэх, залуучуудын улс төрийн боловсролыг дээшлүүлэх, өнөөгийн засаглалын гол тулгуур болох коссерватив олонхитой өргөн яриа өрнүүлж идэвхийг нь өрнүүлэх зэрэг арга хэмжээг нэрлэсэн байна.

ОХУ-ын ерөнхийлөгч Владимир Путин үүний өмнө хилийн чанадаас Оросын ололт амжилтын эсрэг мэдээллийн бүхэл бүтэн кампанит ажил явж байна гэж мэдэгдэж байсан юм. Төрийн тэргүүн энэ үеэрээ Орос улс өнөөдөр улс орны хөгжлийг сааруулах, түүний явцад асуудал үүсгэхэд чиглэсэн түрэмгий, ужгирсан бодлоготой тулгараад байна гэжээ. Энэ бүхэн эцсийн эцэст Оросыг сулруулах, манай орныг гадаад талаас хяналтад оруулахыг зорьж байгаа юм гэж Ерөнхийлөгч тэмдэглэсэн юм.

#МонголынМэдээСонин #БайрСуурь