Бостон Рэд Сокс баг дэлхий цувралд яллаа. Мэйжор лиг бэйсбоолын 2018 оны улирлыг хамгийн гайхалтай эхлүүлсэн Бостон Рэд Сокс баг гайхалтай улирлаа дэлхийн цувралд аваргаар тодорсноор мөн амжилттай өндөрлүүллээ. Ням гаригт болсон тоглолтод Лос Анжелес Доджэрсийг 5-1 харьцаатай хожсоноор аварга болсон юм.

Бостоны баг ийнхүү түүхэндээ 9 дэх удаагаа аварга болж байгаа бөгөөд уг амжилт нь бүх цаг үеийн жагсаалтад 27 түрүүлсэн Нью Иорк Янкийз, 11 түрүүлсэн Сэйнт Льюс Кардиналс нарын араас бичигдэж байгаа юм. Хамгийн сүүлд 2013 онд дэлхийн цувралд ялсан Бостон Рэд Сокс нь 2004 оноос хойш нийтдээ 4 түрүү хүртжээ. Энэ үеийг тэдний алтан үе ч гэж нэрлэж болохоор байгаа юм. Учир нь 2004 онд түрүүлэх хүртлээ тэд 86 жил аваргын цомгүй байсан билээ.

Эхний жилдээ багийн менежэрээр ажиллаж байгаа Алекс Кора нь тус багийн 118 жилийн түүхэнд байгаагүй сайн амжилтыг үзүүлсэн улиралыг бүтээлцсэн нь түүхэнд ч мөн дээгүүр орох амжилт болсон юм. Тодруулбал Бостоны баг энэ улиралд 108 тоглолтод хожил байгуулсан байна. Мөн тэд аваргын цуврал хүртлээ энэ улиралд зуугаас дээш хожил байгуулсан хоёр ч багийг буулган авсан.

Тухайлбал 100 хожил байгуулсан Янкийзыг Америкын лигийн дивизоны аваргад, 103 хожил байгуулсан Хьюстон Астросыг Америкын лигийн аваргын цувралд тус тус буулган авснаар дэлхийн цувралд гарч ирсэн нь энэ.

Ингээд улиралд болон плэй оффыг оролцуулаад нийт 119 хожил байгуулсан нь бэйсбоолын спортын түүхэнд гуравдугаар байранд орох амжилт ажээ. Тэдний гол өрсөлдөгч болох Янкийз 1998 онд 125 ялалт байгуулж байсан бол 2001 онд Сиатл Маринэрс 120 удаа хожил байгуулсан юм.