Ховд аймгийн Мянгад сумын нутагт өнөөдөр буюу 2024 оны аравдугаар сарын 30-ны 03:21:13 цагт газар хөдөллөө.

Газар хөдлөлт 3.9 магнитудын хүчтэй байлаа гэж Онцгой байдлын ерөнхий газраас мэдээллээ. 

Улсын онцгой комиссын салбар дундын мэдээллийн системийг хөгжүүлэх ажлын хүрээнд оролцогч байгууллагуудад танилцуулах хэлэлцүүлгийг өнөөдөр зохион байгууллаа.

Тус системийг хөгжүүлснээр гамшиг, онцгой байдлын үед гарсан халдварт өвчин, гамшигтай тэмцэх, хариу арга хэмжээ үзүүлэх бүхий л үйл ажиллагааны үед онц байдлын үеийн удирдлагад шаардлагатай бодит мэдээ, мэдээллийг цаг тухайд нь танилцуулах, удирдан зохион байгуулах, шийдвэр гаргахад дэмжлэг үзүүлэх ач холбогдолтой юм.

Хэлэлцүүлэгт ЗГХЭГ, ЦХИХХЯ, ЭМЯ, Боловсролын яам, Зам, тээврийн яам, Гэр бүл, хөдөлмөр, нийгмийн хамгааллын яам, ОБЕГ, ХХЕГ, ТЕГ, ГЕГ, УБЕГ, ЦЕГ, Гадаадын иргэн харьяатын газар, ЭМДЕГ, Эрүүл мэндийн хөгжлийн төв, ХӨСҮТ, Нийслэлийн эрүүл мэндийн газар, НЭМҮТ, “Зам, тээврийн хөгжлийн төв” ТӨҮГ, “Автотээврийн үндэсний төв”, “Санхүүгийн мэдээллийн технологийн төв”-ийн холбогдох албан тушаалтнууд оролцлоо.

Улсын онцгой комиссын салбар дундын мэдээллийн системтэй болсноор халдварт өвчний дэгдэлт болон тандалт бусад арга хэмжээний талаар салбар дундын мэдээлэл солилцох, хөл хорио тогтоосон үед хот дотор болон хот хооронд зорчих тээврийн хэрэгсэлд зөвшөөрөл олгох, эрүүл мэндийн, асуумж судалгаа авах, хилээр нэвтрэх зорчигч, тээврийн хэрэгслийн хөдөлгөөнд хяналт тавих, болзошгүй үйл явдлын үед олон талт эх сурвалж ашиглан мэдээ, мэдээлэл солилцох, эрсдэлийн үнэлгээ хийх боломж бүрдэх юм гэж ОБЕГ-аас мэдээллээ. 

Нийслэл Улаанбаатар хот үүсэн байгуулагдсаны түүхт 385 жил, Нийслэл Хүрээг “Улаанбаатар хот” хэмээн нэрийдсэний 100 жилийн ойг тохиолдуулан нийслэлийн үе үеийн удирдлагууд, НИТХ-ын төлөөлөгчид, иргэд Мэлхийт хөшөө, Монголын нууц товчоонд хүндэтгэл үзүүлж, сүлдэт хуурыг цэнгүүллээ.

Энэ үеэр хотын дарга Х.Нямбаатар “Нийслэлчүүддээ ойн баярын мэндийг өргөн дэвшүүлье. Одоогоос 385 жилийн тэртээ 1639 онд Өндөр гэгээн Занабазарыг Халх Монголын шарын шашны тэргүүнд өргөмжлөн “Өргөө” байгуулснаар Монгол Улсын нийслэлийн үүслийг тавьсан түүхтэй. Тэр цагаас хойш 21 удаа бууриа сэлгэж, 1778 онд Богдхан уулын ар, хатан Туулын хөвөө, сэрүүн Сэлбийн дэнж, Хүн чулууны хонхорт суурьшсан. Энэхүү түүхэн үйл явдлыг мөнхжүүлэх, хойч үедээ таниулан сурталчлах зорилгоор 1994 онд дурсгалын Мэлхийт хөшөөг босгож, нийслэлийн ойгоор хүндэтгэл үзүүлдэг уламжлалтай болсон билээ. Нүүдэлчин соёл иргэншилтэй бидний хувьд хотжих үйл явц маш хурдацтай явагдаж байгаагийн нэг тод жишээ бол Улаанбаатар хот юм. Улаанбаатар хотын хүн ам 1919 онд 100 байсан бол өнөөдөр албан ёсоор 1.8 сая гаруй, ирж буй зочид, гийчид, хүмүүсийг оруулбал 2 сая орчим хүн амтай мега хот болжээ. Улаанбаатар хотын цаашдын хөгжлийн чиг, хандлага, бодлогын зорилтуудыг мега хотын стандартад нийцүүлж шинэчлэх хэрэгтэй. Тиймээс бид энэ удаагийн нийслэлийн ойг баяр ёслолын байдалтай тэмдэглэхээс илүүтэй нийслэл хотын өмнө тулгамдаж буй асуудлуудыг хэлэлцэх Улаанбаатар хотын богино, дунд, урт хугацааны зорилт, бодлогыг шийдвэрлэж өнгөрүүлнэ. Их хотынхоо хөгжил, цэцэглэлт, бүтээн байгуулалтын төлөө хамтдаа зүтгэе гэдгийг та бүхэнд уриалж байна” хэмээлээ.