АНУ-ын 47 дахь Ерөнхийлөгчөөр сонгогдоод буй Дональд Трампын тангараг өргөх ёслол 2025 оны нэгдүгээр сарын 20-ны 12:00 цагт болно. /Улаанбаатарын цагаар 21-ний 00:00 цагт/ Дональд Трампын өмнөх ёслолд буюу 2017 оны нэгдүгээр сарын 20-нд тангараг өргөхдөө хэлсэн үгсийн тойм болон гол агуулга:

Илтгэлийн гол агуулгууд 1. “Америк нэгдүгээрт” үзэл баримтлал

• Трамп “Америк нэгдүгээрт” гэсэн үзэл санаагаа онцлон дотоод болон гадаад бодлогод АНУ-ын эрх ашгийг нэн тэргүүнд тавина гэж амласан.
• Ажлын байрыг нэмэгдүүлэх, хилээ хамгаалах, засгийн газрыг ард иргэдэд үйлчлэхийг зорихоо илэрхийлсэн.

2.  Популизм

• Тэрээр өөрийгөө эгэл жирийн иргэдийн эрх ашгийг хамгаалагч гэж тодорхойлсон.
•  Вашингтоны элитүүдээс эрх мэдлийг буцаан авч жирийн иргэдэд шилжүүлэх тухай ярьсан.

3. Үндэсний эв нэгдэл ба эх оронч үзэл

• Хэдийгээр нийгэмд хагарал байгаа гэдгийг хүлээн зөвшөөрсөн ч бүх америкчуудыг эв нэгдэлтэй байхыг уриалсан.
• Тэрээр эх орноо сэргээн босгох, үндэсний бахархлыг бий болгох талаар онцлон ярьсан.

4. Эдийн засгийн сэргэлт

• Үйлдвэрлэлийн салбарыг сэргээх, ажлын байрыг АНУ-д эргүүлэн авчрах, “Америкийн сүйрлийг” зогсоохоо амласан.

Түүний онцлох ишлэлүүд 1.    Эрх мэдлийг ард түмэнд шилжүүлэх тухай “Өнөөдрийн ёслол маш онцгой утгатай, учир нь бид эрх мэдлийг нэг засаг захиргаанаас нөгөөд шилжүүлэх бус, Вашингтон Д.С.-ээс буцаан авч ард түмэнд өгч байна.” 2.    Америкт тулгарч буй асуудлууд “Хотын ядуурлын бүсэд амьдарч буй эхчүүд, хүүхдүүд, улсыг минь дампуурлын ирмэгт авчирсан үйлдвэрүүд… Энэ Америкийн сүйрэл өнөөдрөөс эхлэн дуусна.” 3.    “Америк нэгдүгээрт” философи “Өнөөдрөөс эхлэн бүх шийдвэр, худалдаа, татвар, цагаачлал, гадаад бодлогын шийдвэрүүд зөвхөн Америкийн ажилчид болон Америкийн гэр бүлийн ашиг сонирхолд нийцүүлэн гарна.” 4.    Эв нэгдэл ба эх оронч үзэл “Эх оронч үзэл таны зүрхэнд байхад ямар ч ялгаварлан гадуурхах зүйл байхгүй. Библид “Бурханы ард түмэн эв нэгдэлтэй амьдрахад ямар гайхалтай, сайхан байдаг” талаар өгүүлсэн байдаг.” 5.    Ирээдүйн алсын хараа “Хамтдаа бид Америкийг дахин хүчирхэг болгоно. Бид Америкийг дахин чинээлэг болгоно. Бид Америкийг дахин бахархалтай болгоно. Бид Америкийг дахин аюулгүй болгоно. Тийм ээ, бид хамтдаа Америкийг дахин агуу болгоно.” гэж байв. Харин энэ удаагийн тангаргийн ёслолдоо тэрбээр ямар хурц, шийдэмгий үгс хэлэх нь олны анхаарлыг ихэд татаж байна.

Эх сурвалж: CNN