Өмнөд Солонгосын зүүн өмнөд хэсэгт өнгөрсөн амралтын өдрүүдээр 30 шахам ой хээрийн түймэр гарчээ. Тодруулбал, 29 байршил гарсан гал түймрийн улмаас дор хаяж дөрвөн хүн амиа алдаж, зургаан хүн шархдаад байна. Мөн 19 км2 талбай шатсан бөгөөд галт тэрэг, зарим авто замын хөдөлгөөнд саад учирчээ.

Бямба гаригийн орой засгийн газар зарим бүс нутагт гамшгийн онц байдал зарлажээ. Харин Ням гаригийн өглөө ихэнх түймрийг унтрааж, зургаан газар л үлдсэн байна.

Гал унтраахад 1600 орчим гал сөнөөгч, 35 нисдэг тэрэг, олон арван галын машин дайчилжээ.

29 түймэр янз бүрийн шалтгаанаар гарсан бөгөөд тэдгээрээс дурдвал, Санчеон хотын түймэр л гэхэд тариачны зүлэг хадагч шатсанаас болжээ. Мөн Бусанаас холгүй орших Гимхэ хотод хог шатаах зуухнаас үүдэлтэй гал гарсан байна. Цаг агаар хуурай, салхитай байгаа тул гал түймэр амархан тархаж байгааг албаныхан анхааруулж байна. Гурав, дөрөв, тавдугаар сард Өмнөд Солонгос хамгийн хуурай цаг агаартай байдаг. Мөн гал түймэр гарсан зарим газар нь уулархаг бүс нутаг байгаа тул аврагчид хүрч очиход хүндрэлтэй байгаа аж.

Өмнөд Солонгосын ерөнхийлөгчийн үүрэг гүйцэтгэгч Чой Сан Мок галыг түргэн унтраахын тулд боломжит бүх техник хэрэгсэл, хүн хүчийг дайчлахыг тушаажээ.

Их Британийн нийслэл Лондон хотын баруун хэсэгт гарсан томоохон түймрийн улмаас Хитроу нисэх онгоцны буудлыг баасан гарагт бүхэлд нь түр хаахаар болжээ.

Нисэх онгоцны буудлаас ойролцоогоор 6.5 км зайд орших Хейс сууринд “North Hyde” цахилгааны дэд станцын трансформатор шатсаны улмаас олон мянган барилга байгууламжийн цахилгаан тасарч, 100 гаруй хүнийг нүүлгэн шилжүүлэхэд хүрсэн байна.

“Зорчигчид болон ажилтнуудын аюулгүй байдлыг хангах үүднээс манай буудал гуравдугаар сарын 21-ний 23:59 цаг хүртэл түр хаагдана. Иймд нисэх буудлыг зорихгүй байхыг зорчигчдод зөвлөж байна. Нэмэлт мэдээлэл авахыг хүсвэл агаарын тээврийн компанитай холбоо барина уу” гэж Хитроу нисэх онгоцны буудлын X хуудсанд мэдээлжээ.

Хэд хэдэн нислэгийн чиглэлийг өөрчилснийг нислэгийн хяналтын “FlightRadar24” цахим хуудсаар мэдээлсэн бол ойрын өдрүүдэд саатал дахин үүсэж магадгүй гэдгийг нисэх буудлын удирдлагууд анхааруулж байна.

Австралийн Перт хотоос ирж буй “Qantas” компанийн онгоцны чиглэлийг Парисын Шарль-де-Голль буудал руу болгож өөрчилсөн бол Нью-Йоркоос ирж буй “United Airlines” компанийн онгоц Ирландын Шеннон хотод газардана гэж Франс Пресс агентлаг мэдээлжээ.

Европын хамгийн ачаалалтай нисэх онгоцны буудал болох Хитроу жилдээ 80 сая гаруй зорчигч хүлээн авдаг.

Дэд станцад 10 гал унтраах машин, 70 орчим гал сөнөөгч ажиллаж байна гэж Лондоны Гал түймэртэй тэмцэх газраас мэдээлсэн байна. Байгууламжаас их хэмжээний утаа гарч байгаа нь олон нийтийн сүлжээгээр цацагдсан дүрс бичлэгээс харагдана. Орон нутгийн цагаар пүрэв гаргийн 23:23 цагийн орчимд гал гарсан бөгөөд гал сөнөөгчид түймрийг унтраахаар шөнөжин ажиллажээ.