Бусад

Долдугаар сарын зурхайгаа уншаарай!

Нийтэлсэн

5 жил өмнө

2019-07-01

Нийтэлч

1Хонь

Та энэ сард гэр орон, гэр бүл, хувийн аюулгүй байдалдаа анхаарлаа хандуулаарай. Мөн энэ сарыг ирээдүйн зорилго, амжилтаа дахин нэг үнэлэн дүгнэж, эргэцүүлж бодож өнгөрөөх төлөвтэй байна.

Мөн та хүчтэй дурлал, хайр сэтгэлд нэлээн эрч хүч зарцуулна. Таны өдөр тутмын үйл ажиллагаа, орчин тойрны байдал танд таатай сэтгэгдэл төрүүлэх бөгөөд нийгмийн идэвх ч өндөр байх болно.

Мөн та долдугаар сард хэн нэгнээс тусгай санал хүлээн авч, онцгой зүйл бүтээхийн төлөө өндөр хүчин чармайлт гаргах төлөвтэй байна.

2Үхэр

Энэ сард таны өдөр тутмын үйл ажиллагаа хүртэл өндөр идэвхтэй байна. Мөн ярих, бичих, суралцах зэрэг нь таны нэн тэргүүний зорилт болох болно. Учир нь та өөрийн оршихуйг илүү утга төгөлдөр болгохын тулд мэдлэг, боловсролоо дээшлүүлэхэд ихээхэн цаг зарцуулах юм.

Түүнчлэн гэр бүлийн амьдрал нэлээн идэвхтэй байх нь. Танай гэрийнхний дунд харилцан яриа ихээр өрнөж, заримдаа өнгөрснөө дурсан ярилцах аж.

Мөн үхрүүд төрөлхийн тогтвортой, хүчтэй энергиэ хадгалж үлдэх хэрэгтэй. Энэ сард үхрүүдийн санхүүгийн боломж, хэлэлцээр, хөрөнгө оруулалтын асуудал нааштай байх нь. Түүнчлэн үзэсгэлэнтэй зүйлс болон сайхан газрууд таныг татах болно.

3Ихэр

Долдугаар сард үхрүүдийн санхүүгийн байдал болоод хувийн үнэт зүйл нь өөрчлөгдөх төлөвтэй байна. Өөрөөр хэлбэл, өнгөрсөн хугацаанд та эд хөрөнгө, өөрийн эзэмшил, хувийн үнэт зүйлсдээ анхаарч байсан бол одоо танд “үнэхээр юу чухал вэ?” гэдгийг ойлгох болно. Мөн таны өдөр тутмын бусадтай тогтоох харилцаа эрс нэмэгдэнэ.

Түүнчлэн таны үг маш хурц тул үгээ цэгнэж, болгоомжлох хэрэгтэй. Сугар гариг дөрөвдүгээр сараас хойш таны ордыг дамжин өнгөрч байгаа. Тиймээс та энэ хугацаанд маш сэтгэл хангалуун, нийтэч мөн дур булаам байх болно.

Шинэ сард та үргэлжлүүлэн юу хүсэж байгаагаа өөрөөсөө асуу. Хариултыг нь наймдугаар сард ч олж магадгүй юм. Ингэснээр таны сэтгэл санаа тогтворжиж, үүнийгээ дагаад санхүүгийн байдал ч сайжран, өөрийгөө хязгаарласан хил заагаасаа гарах боломж бүрдэх болно.

4Мэлхий

Уян зөөлөн, эмзэг, халамжтай мэлхийнүүддээ төрсөн өдрийн мэнд хүргэе. Та бүхний одон орны шинэ жил Санчир гаригаас эхэлж байна. Ингэснээр та бүхэн сул дорой байдал, дутагдалтай тал зэргээ шийдвэрлэхийн тулд дотогшоогоо өнгийх болно. Харин нөхөрлөл, хайр сэтгэлийн асуудлууд хоёрдугаарт тавигдана. Тиймээс та өөрийнхөө амьдралын үнэт зүйл, хэмжүүр нь юу болох талаар сайтар тунгаагаарай. Оюуны үнэт зүйл үү, материаллаг зүйл үү, эсвэл бүр хийсвэр зүйл үү гэдгийг сайтар мэдэх хэрэгтэй.

Түүнчлэн энэ сард та хэн нэгэнтэй мөнгө, өмч хөрөнгийн тухай хэлэлцээр хийх төлөвтэй байна. Харин үүний хажуугаар хайртай хүмүүстээ анхаарал хандуулахаа битгий мартаарай.

Мөн сайн дурын эсвэл буяны үйл хийх нь сэтгэл санааг өргөнө гэдгийг санаарай. Үүний дээр яарч, буруу худалдан авалт хийхээс татгалзаж, өөрийн үзэл бодлыг бусдад тулгахаас ч зайлсхий.

Долдугаар сарын төгсгөлд таны сэтгэл хөдлөл ердийнхөөс илүү илэрч магадгүй.

5Арслан

Эрч хүчтэй, идэвхтэй арслангууд маань манан дунд төрсөн мэт байдалд орж байсан уу. Магадгүй долдугаар сарын дундуур тийм байдалд орох төлөвтэй байна. Гэвч энэ бүхний дараа та бүхэн маш олон харилцаанд орох болно.

Шинэ сараас эхлээд наймдугаар сарын 10 хүртэл Ангараг гариг таны төрсөн одны орд руу шилжих тул энэ үеийн асар их эрч хүч, энергиэ зөв зүйлд зарцуулаарай. Энэхүү энергийн их ундарга нь дараагийн удаад 22 сарын дараа л эргэж ирэх тул, энэ үеийг бүү алд. Гэхдээ эрч хүч, энергидээ бардан хэт чанга “архирах” хэрэггүй.

Мөн энэ сард найз нөхөдтэйгөө цагийг өнгөрөөх нь ихсэх болно. Үүнийгээ дагаад нийгмийн идэвх сайжирч, олон урилга хүлээж аван, эсрэг хүйстэнтэйгээ ч харилцаа тогтоох боломж бүрдэнэ.

Арслангийн ордныхон ихэвчлэн оюун санаан дээрээ ажилладаг бөгөөд өөрийгөө хэн бэ гэдгээ, ямар хүн гэдгээ олж мэдэн, хүлээн зөвшөөрөхийг хүсдэг. Тэгвэл энэ сард та эрүүл мэнд, ажил төрлөө нэгдүгээрт тавьж, дараа нь нөхөрлөл, хайр сэтгэлийн харилцаанд анхаарвал зохистой.

6Охин

Охины ордныхон олон нийттэй харилцаанд оролцохдоо нягт нямбай, практик хандлагатайгаас гадна, эрх дархтай байхыг эрхэмлэдэг. Таны найз нөхөд бол таны тусгал л гэсэн үг. Учир нь та тэр хүмүүсийг тантай хамт байх эрхгүй гэж үзвэл шууд л орхиж чаддаг.

Таны амьдралыг харах өнцөг өдийг хэр төлөвшсөөр байгаа. Тиймээс бясалгал хийх нь таны оюун санааг нээж өгөөд зогсохгүй, тайвшрахад тань тусална. Ийнхүү оюун санааны эрх чөлөөтэй байдалд хүрснээр та юу хиймээр байгаагаа ойлгож, романтик адал явдалд бэлэн болж, өдөр тутмын амьдралын хэмнэлээ ч өөрчлөх юм.

Мөн энэ сард хэлэх хэрэгтэй гэж үзсэн бүхнээ хэл. Учир нь энэ сард хэлээгүй үгнүүд, хадгалсан нууцууд сэтгэл санааг тань чилээх болно. Харин сайн мэдээ гэвэл энэ сард бизнесийн таатай орчин бүрдэж, хувийн амьдралаа дээшлүүлэхэд тань тусална.

7Жинлүүр

Өнгөрсөн хэдэн сарын хугацаанд таны удирдагч гариг ихрийн ордыг дамжин өнгөрсөн. Тиймээс магадгүй гаднын хүмүүс таны хувьд гол үүрэг гүйцэтгэсэн болов уу. Харин одоо Сугар гаригийн нөлөөгөөр таны харах өнцөг тэлж, ухамсар, оюун ухаан өргөжин тэлнэ. Ингэснээр таны хувийн амьдрал илүү идэвхжиж, нэр хүнд өсөн, найз нөхөд, баг хамт олны дунд бүтээлч үйл ажиллагаа тань нэмэгдэнэ. Гэвч амжилт, зорилгынхоо төлөө хэт улайран зүтгэх хэрэггүй.

Жинлүүрийн ордныхныг есдүгээр сар хүртэл хамгаалагч сахиусан тэнгэр нь мөрөн дээр нь сууж, хамт байх нь. Энэ үед та юун түрүүнд гэр, гэр бүл, аюулгүй байдал зэрэгт анхаарлаа хандуулж, үүний дараа романтик, бүтээлч, хүсэл эрмэлзэлтэй болох юм.

8Хилэнц

Төрөлхийн метафизик, шашин шүтлэг, хийсвэр зүйлсийг сонирхдог зангаа ашиглан хувийн орон зайн хил хязгаараа тэлээрэй. Магадгүй та одоо ч амьдралын утга учрыг мэдэхээр эрэл хайгуул хийж байгаа биз.

Мөн ямар нэг чиглэлээр дугуйлан, курсд явах нь карьераа өсгөхөд тань тусална. Гэхдээ өөрийн мэргэжлийн чиглэлээр байвал илүү үр дүнтэй. Бүтээлч чанар таны карьерт хамгийн их нөлөөлдөг гэдгийг санаарай. Харин хэн нэгэнтэй маргалдахаас зайлсхий. Учир нь жижиг маргаан ч цааш том болон хүндрэх аюултай.

Түүнчлэн энэ сар таны хувьд аялахад маш тохиромжтой сар байх болно. Мөн санхүүгийн хувьд зээлийн өргөдөл гаргавал хялбар бүтэх төлөвтэй. Шинэ сард та юун түрүүнд гэр бүл, эргэн тойрныхондоо анхаарал хандуулбал зохиолтой.

9Нум

Таны гэрэл гэгээтэй, нээлттэй дотоод ертөнцөд маш их хүч нуугдаж байдаг. Магадгүй та одоог хүртэл өөрийн нөөц бололцооны хил хязгаар болон хүмүүстэй хэрхэн хамтарч ажилладаг, бусдаас хэр хамааралтай зэргээ мэдэхийг хүсэж байгаа байх. Тэгвэл та шинэ сургалт, курсэд явснаар өөрийн хил хязгаарыг тэлээд зогсохгүй, сэтгэл дэх шинэ зүйлээ ч нээж чадна.

Харин нөхөрлөл, хайр сэтгэлийн асуудал бага багаар сайжирна. Бүр эцэстээ гэрлэх шийдвэрт ч хүрч мэднэ. Энэ сард шинэ адал явдлууд таныг өдөөх болно. Жишээ нь аялалд явахыг зөвлөж байна. Гэхдээ хэт хол бас хурдан явах хэрэггүй.

Нумынхан шинэ сард санхүүгийн байдал болон үнэт зүйлсдээ анхаарч, мөн эргэн тойрныхон, тэдэнтэй харилцахдаа анхаарал хандуулах хэрэгтэй.

10Матар

Нөхөрлөл, хайр сэтгэлийн асуудалд үргэлжлүүлэн анхаарал хандуулах хэрэгтэй болох нь. Учир нь Санчир гаригийн шилжилт хөдөлгөөн нь таны харилцаан дахь амлалт, хүлээлт зэргийг дахин шинжилж, бодоход хүргэнэ. Тиймээс та энэ сард дотоод ертөнцөөрөө аялж, сэтгэл дэх гүн гүнзгий үнэнийг илрүүлэхээр аялалд гарах юм. Ингэснээр өөрийнхөө урьд илрээгүй нуугдмал талаа олж мэднэ.

Түүнчлэн долдугаар сар нь судалгаа, эрэл хайгуул хийхэд тохиромжтой сар байх болно. Ер нь л таны ажил үйлс, удирдлагатайгаа хийх харилцаа ч сайн хэвээр байна. Гэвч таны асуудлыг түргэн шуурхай шийдвэрлэх чадварыг сорьсон сар байна гэдгийг санаарай.

Мөн та идэж уух зүйлсэд хэт автах хандлагатай байгаа тул анхаарна уу. Үүний дээр шинэ боломж, сорилт, туршлага нь өөрийгөө таньж мэдэх, нотлоход туслах болно. Шинэ сар нь таны хувийн сэтгэл хөдлөлийн асуудлаас эхлээд мөнгөө хэрхэн зарцуулахад хүртэл анхаарахыг шаардаж байна.

11Хумх

Шинэ сар хумхын ордныхны бүтээлч, шинэлэг сэтгэхүйг өдөөж, инноваци төрүүлэхэд тусална. Энэ сард та бүхэн өдөр тутмын ажил, үйлчилгээндээ анхаарал хандуулж, бие махбодийн үйл ажиллагааг хэвийн байлгахад анхаарсан хэвээр байна. Мөн нөхөрлөл, хайр сэтгэлийн тал дээр ч бүтээлч байдал илэрсээр байна. Гэвч таны амьдралд шинээр орж ирсэн хүмүүс яг л таны мэддэг өмнөх хүмүүстэй адилхан санагдаж болзошгүй.

Долдугаар сард хумхууд хөгжилдөж, зугаацаж цагийг өнгөрөөхдөө бэлдээрэй. Ингэснээр шинэ харилцаа эхлэх болно.

Гэвч бусадтай ихээхэн уур уцаар, бухимдалтайгаар харьцах хандлага илэрч байна. Тиймээс болгоомжил. Шинэ сард та бүхэн хийсвэр ертөнц, шашны холбогдолтой зүйлсэд анхаарч, мөн хувийн сэтгэл хөдлөлдөө санаа тавих юм байна.

12Загас

Зун цаг бол загаснуудын романтик байдал, цэнгэл жаргалыг хамгийн их хүсдэг үе юм. Та магадгүй удаан хугацааны турш бүтээлч сэтгэлгээ, өөрийгөө илэрхийлэх тал дээр анхаарал хандуулсаар ирсэн байх. Учир нь таны оршихуйн асуудал бол таны хамгийн том асуудлын нэг юм.

Долдугаар сард загаснуудын ажил хэргийн болон хувийн харилцаа маш өргөжнө. Үүнийгээ дагаад өдөр тутмын амьдралын хэмнэл ч түргэсэх болно.

Мөн эрүүл мэндийн асуудал тулгарах төлөвтэй байна. Үүний дээр хамтран ажиллагсадтайгаа маргалдахаас зайлсхий. Харин гэр бүлийн уур амьсгал, харилцаа таатай хэвээр байна. Шинэ сар та бүхнээс найз нөхөд, зорилго, хүсэл эрмэлзэл болон оюун ухаандаа анхаарал хандуулахыг шаардах болно.

Сэдвүүд:

Дэлгэрэнгүй ...

Бусад

Их, дээд сургуулиудын академик эрх чөлөөг хангаж, өмчийн хэлбэр харгалзалгүйгээр дэмжин ажиллана

Нийтэлсэн

5 өдөр өмнө

2024-11-21

Нийтэлч

24barimt

Өнгөрсөн наймдугаар сард Боловсролын сайд П.Наранбаяр Монголын хувийн их дээд сургуулиудын холбооны төлөөлөлтэй уулзах үеэр ярилцсаны дагуу нэгдсэн байдлаар бүх хувийн их, дээд сургуулийн удирдлагуудтай уулзлаа.

Хувийн их, дээд сургуулийн удирдлагууд тулгамдаж буй асуудлуудаа хэлэлцэн нэгтгэж, төрийн дээд боловсролын салбар дахь оролцоо дэмжлэг болон эрх зүйн орчин, элсэлтийн босго, дээд боловсролын байгууллагуудын эрэмбэ, багшийн хөгжил болон нийгмийн баталгаа гэсэн чиглэлүүдээр санал хүсэлтээ илэрхийлэв. Тухайлбал, их, дээд сургуулийн онцлогийг харгалзаж үнэлэх замаар эрэмбэ тогтоох, төрийн зүгээс өмчийн хэлбэрийг ялгахгүйгээр адил тэгш бодлого хэрэгжүүлэх, салбарт хэрэгжиж буй хуулиудад өөрчлөлт оруулах шаардлагатай гэлээ.

Боловсролын сайд П.Наранбаяр их, дээд сургуулиудын академик эрх чөлөөг хангаж, өмчийн хэлбэр харгалзалгүйгээр дэмжин ажиллахаа онцолж, дээд боловсролын байгууллагуудын онцлог, чиглэлийг харгалзан ангилах байдлаар хөндлөнгийн байгууллагаар эрэмбэ тогтоолгох, элсэлтийн босгыг үе шаттайгаар өсгөн элсэгчдийг чанаржуулах бодлого баримтална хэмээв. Мөн бүх санал хүсэлтэд хариу өгч, нэгтгэж эрэмбэлэн үе шаттайгаар шийдвэрлэхээ хэллээ гэж Боловсролын яамнаас мэдээллээ.

Дэлгэрэнгүй ...

Бусад

ТББХ: Улсын Их Хурлын гишүүний халдашгүй байдлын дэд хорооны бүрэлдэхүүний тухай асуудлыг хэлэлцэв

Нийтэлсэн

3 долоо хоног өмнө

2024-11-06

Нийтэлч

24barimt

Улсын Их Хурлын Төрийн байгуулалтын байнгын хорооны 2024 оны 11 дүгээр сарын 05-ны хуралдаанаар Төрийн байгуулалтын байнгын хорооны 2024 оны 01 дүгээр тогтоолоор байгуулагдсан ажлын хэсгийн танилцуулгыг сонслоо.

Монгол Улсын Их Хурлын чуулганы хуралдааны дэгийн тухай хуулийн 126 дугаар зүйлийн 126.5 дахь хэсэгт “Улсын Их Хурлын хяналтын сонсголыг зохион байгуулах нарийвчилсан журмыг Улсын Их Хурлын тогтоолоор батална.” гэж заасныг үндэслэн уг тогтоолын төслийг боловсруулах үүрэг бүхий ажлын хэсгийг Төрийн байгуулалтын байнгын хорооны 2024 оны 08 дугаар сарын 21-ний өдрийн 01 дүгээр тогтоолоор УИХ-ын гишүүн О.Номинчимэгээр ахлуулан, УИХ-ын гишүүн Ж.Баярмаа, П.Сайнзориг, Х.Тэмүүжин нарын бүрэлдэхүүнтэйгээр байгуулсан юм.

УИХ-ын гишүүн О.Номинчимэг ажлын хэсгийн дүгнэлтийг танилцуулав.

Тэрбээр, Өнгөрсөн хугацаанд Монгол Улсын Их Хурлын хяналтын сонсголыг Монгол Улсын Их Хурлын хяналт шалгалтын тухай хууль, Монгол Улсын Их Хурлын чуулганы хуралдааны дэгийн тухай хууль, Нийтийн сонсголын тухай хууль болон Монгол Улсын Их Хурлын 2017 оны 12 дугаар тогтоолоор баталсан “Нийтийн сонсгол зохион байгуулах журам”-д заасны дагуу зохион байгуулж ирсэн.

Монгол Улсын Их Хурлаас 2024 оны 05 дугаар сарын 16-ны өдөр баталсан Монгол Улсын Их Хурлын хяналт шалгалтын тухай болон Монгол Улсын Их Хурлын чуулганы хуралдааны дэгийн тухай хууль /шинэчилсэн найруулга/-д Монгол Улсын Их Хурлын хяналтын сонсголыг зохион байгуулах зарим харилцааг нарийвчлан зохицуулж хуульчилсан байна.

Тодруулбал, Монгол Улсын Их Хурлын чуулганы хуралдааны дэгийн тухай хуулийн Арван тавдугаар бүлэг бүхэлдээ Монгол Улсын Их Хурлын хяналтын сонсголыг зохион байгуулах дараах харилцааг нарийвчлан зохицуулсан байна. Үүнд:

119 дүгээр зүйлд Улсын Их Хурлын хяналтын сонсгол явуулах талаар хүсэлт гаргах, хүсэлтийг шийдвэрлэх талаар;
120 дугаар зүйлд сонсгол зохион байгуулах харьяаллын талаар;
121 дүгээр зүйлд сонсголын бэлтгэл ажлыг хангах талаар;
123, 124 дүгээр зүйлд сонсголд оролцогч, түүний эрх, үүрэг;
125 дугаар зүйлд сонсгол даргалагчийн эрх, үүрэг;
126, 127 дугаар зүйлд сонсголыг танхимаар болон цахимаар явуулах журам;
128 дугаар зүйлд сонсголын тайлан, тэмдэглэл боловсруулж, олон нийтэд түгээх талаар;
129-133 дугаар зүйлд Нэр дэвшигчийн сонсгол зохион байгуулах журам.

Өөрөөр хэлбэл, Улсын Их Хурлын хяналтын сонсголыг дээр дурдсан хуулийн зохицуулалтын хүрээнд зохион байгуулах боломжтой байх бөгөөд нарийвчилсан журам батлан гаргах тохиолдолд хуулийн зохицуулалтыг давхардуулан журамд тусгах нөхцөл үүсэж байх тул тус журмын төслийг боловсруулах шаардлагагүй гэж ажлын хэсэг дүгнэлээ гэлээ.

Түүнчлэн тэрбээр 2024-2028 оны парламентын бүрэн эрхийн хугацаанд холбогдох журмын тоог цөөлж, хуулиар зохицуулах шаардлагатай зохицуулалтыг журмаар биш хуульд тусгаж байх стратегийг баримталж байгааг дурдаад, цаашид хууль хэрэглээний хувьд ойлгомжтой болгох үүднээс Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тохиолдолд хяналтын сонсголын зохион байгуулалттай холбоотой зарим шаардлагатай зохицуулалтыг нэмж тусгах саналтай байна хэмээсэн. Тухайлбал, тус хуулийн 121 дүгээр зүйлийн 121.6-д заасны дагуу шинжээчийг томилохдоо ажлын хэсгийн саналыг үндэслэн Байнгын хороо тогтоол гаргахаар зохицуулсан байна. Өөрөөр хэлбэл, ажлын хэсэг байгуулагдаагүй бол шинжээч томилох хүсэлт гаргах субьект хэн байх талаарх зохицуулалтыг тодорхой болгох шаардлагатай. Түүнчлэн сонсгол явуулах бүтэц нь Байнгын хороо, дэд хороо байх олон улсын жишигт нийцүүлэх нь цаашид Байнгын хорооны үйл ажиллагааг илүү мэргэшсэн, уялдаа холбоотой байх ач холбогдолтой тул холбогдох өөрчлөлтийг хийх хэрэгтэй. Мөн 123 дугаар зүйлийн 123.3 дахь хэсэг, 126 дугаар зүйлийн 126.5 дахь хэсгийг тус тус хүчингүй болгох саналтай байгаагаа танилцуулсан юм.

Ажлын хэсгийн дүгнэлттэй холбогдуулан асуулт асууж, санал хэлэх гишүүн гараагүй.

Мөн хуралдаанаар Улсын Их Хурлын гишүүний халдашгүй байдлын дэд хорооны бүрэлдэхүүний тухай асуудлыг хэлэлцэв.

УИХ дахь МАН-ын бүлгээс тус дэд хорооны бүрэлдэхүүнээс УИХ-ын гишүүн Ж.Ганбаатарыг чөлөөлж, УИХ-ын гишүүн Ц.Сандаг-Очирыг бүрэлдэхүүнд оруулах саналыг ирүүлсний дагуу Улсын Их Хурлын гишүүний халдашгүй байдлын дэд хорооны бүрэлдэхүүний тухай УИХ-ын тогтоолын төслийг боловсруулжээ.

Хэлэлцэж өуй асуудалтай холбогдуулан асууж, санал хэлэх гишүүн гараагүй бөгөөд хуралдаанд оролцсон гишүүдийн олонх тогтоолын төслийг хэлэлцэн батлахыг дэмжин, Байнгын хорооны санал, дүгнэлтийг чуулганы нэгдсэн хуралдаанд танилцуулахаар тогтов.

Дараа нь “Монгол Улсын Их Хурлын 2024 оны намрын ээлжит чуулганы төлөвлөгөөт хяналт шалгалтын цаглавар батлах тухай” Улсын Их Хурлын тогтоолын төслийг хэлэлцлээ.

Тогтоолын төслийн талаар Байнгын хорооны дарга Ж.Бат-Эрдэнэ танилцуулсан. Улсын Их Хурлын хяналт шалгалтын тухай хуулийн 8 дугаар зүйлийн 8.1.1 дэх хэсэгт зааснаар Монгол Улсын Их Хурлын хяналт шалгалт нь төлөвлөгөөт, төлөвлөгөөт бус гэсэн төрөлтэй байх бөгөөд мөн хуулийн 8 дугаар зүйлийн 8.6 дахь хэсэгт заасны дагуу Төрийн байгуулалтын байнгын хороо Улсын Их Хурлын ээлжит чуулганы хугацаанд хийх төлөвлөгөөт хяналт шалгалтын цаглаврыг холбогдох шийдвэрийн төслийн хамт нэгдсэн хуралдаанд оруулж, шийдвэрлүүлэх ёстой хэмээв.

Мөн тус хуулийн 8 дугаар зүйлийн 8.2 дахь хэсэгт заасны дагуу Байнгын, дэд хорооноос хийх төлөвлөгөөт хяналт шалгалтыг Улсын Их Хурлын төлөвлөгөөт хяналт шалгалтын цаглаварт тусган хэрэгжүүлэхээр заасныг тодотгоод, хяналт шалгалтын талаар Байнгын хороодоос холбогдох саналыг авахад Аж үйлдвэржилтийн бодлогын, Аюулгүй байдал, гадаад бодлогын байнгын хорооноос тусгайлан санал ирүүлээгүй гэлээ.

Байнгын хороодоос ирүүлсэн санал болон хяналт шалгалтын бусад асуудлын хүрээнд УИХ-ын 2024 оны намрын ээлжит чуулганы хугацаанд зохион байгуулах нэр дэвшигчдийн хяналтын сонсголыг УИХ-ын төлөвлөгөөт хяналт шалгалтын цаглаварт тусган боловсруулсан хэмээн танилцуулсан юм.

Хэлэлцэж буй асуудалтай холбогдуулан УИХ-ын гишүүн О.Номинчимэг, иргэдээс ирж байгаа хүсэлт, өргөдлийн дагуу хууль зүйн бодлоготой холбоотой, ялангуяа Иргэний хэрэг шүүхэд хянан шийдвэрлэх тухай, Шүүхийн шийдвэр гүйцэтгэх тухай хууль тогтоомжийн биелэлттэй холбоотой асуудлыг хяналт шалгалтын цаглаварт оруулах асуудлыг хөндөн байр сууриа илэрхийлсэн.

Эцэст нь тогтоолын төслийг хэлэлцэн батлах асуудлаар санал хураалт явуулахад хуралдаанд оролцсон гишүүдийн олонх дэмжин чуулганы нэгдсэн хуралдаанд Байнгын хорооны санал, дүгнэлтийг танилцуулахаар тогтов хэмээн Улсын Их Хурлын Хэвлэл мэдээллийн газраас мэдээллээ.

Дэлгэрэнгүй ...

Бусад

Дэлгэрэх цехийн М.Эрдэнэцэцэг

Нийтэлсэн

1 сар өмнө

2024-10-15

Нийтэлч

24barimt

“Манайх эсгий бүрээсээс бусдыг үйлдвэрлэдэг, гадуур дотуур цагаан бүрээс, давхарга, берзинт, өрх гээд л. Миний хувьд 1993 оноос өрхийн үйлдвэрлэл эрхэлж, ээжтэйгээ хамт цагаан бүрээс оёж эхэлсэн. Түүнээс хойш 31 жил өнгөрсөн байна. Манайхыг аж ахуйн нэгж гэж ойлгов оо, оёдлын цех шүү. Ажлын байрны хүчин чадлын тухайд 16 хүн ажиллах боломжтой ч өнөөдрийн байлаар найман оёдолчин ажиллаж буй ” хэмээн үйл ажиллагаагаа танилцуулсан бүсгүй бол БЗД-ийн иргэн, Дэлгэрэх цехийн эзэн М.Эрдэнэцэцэг. Гав шав хийсэн гялалзуур эмэгтэй шүү гэх тодотголд яг таарах хүн гээд хэлчихвэл буруудахгүй л болов уу. Түүний ажил агуулахаас бүс бараагаа ангилж татахаас эхэлж, эсгүүр хийх, оёдол, ангилах, бэлэн болсон бүтээгдэхүүнээ Нарантуул руу хүргэх, орон нутаг дахь борлуулагчид руугаа ачуулах гэхчилэн амсхийх завгүй гүйсээр үдшийн бүрийтэй золгоно. Ажлынхаа завсраар өндөр настай ижий, хүү хоёроо халамжлах учиртай. Бас ажлын хамт олон гэж бодлын үзүүрт өнжих найман бүсгүй, хоёр эр бий. Хүний л амьдрал болохоор жаргал зовлон ээлжилнэ. Ямар ч үед дэргэд нь байж, зүдрэх үед нь энгэртээ наах нь миний үүрэг гэж ойлгох түүнд хамт олон нь хачин сайн юм билээ. Нэгэн цагт ээжүүдээ дагаж, цехийнх нь умгар өрөөнд эрхэлж наадаж өссөн охид амьдралд хөл тавьж, эдүгээ оёдолчин болцгоон хоёр ээжтэйгээ мөр зэрэгцэн ажиллаж байгаа гээд бодохоор Дарь-Эхийн овооны энгэр бэлд бууриа засч төвхнөсөн жижигхэн цехийн түүх эгэлгүй агаад бахархам ажээ.

Ажилсаг ээжийн хичээнгүй охин

М.Эрдэнэцэцэг өөрийнхөө сайн сайхан явааг ээжийнхээ ажилсаг чанартай холбоно. Ё.Нармандах хэмээх гайхамшигт эмэгтэй бол түүний ээж. Цэл залуугаараа ханиасаа хоцорч гурван үрээ хөлийг нь дөрөөнд,гарыг нь ганзаганд хүргэсэн ижийгээрээ охин нь өнөөдөр гангарч сууна.

Хөнгөн, хүнсний техникум төгссөн залуухан бүсгүй амьдралд хөөр баяртайгаар хөл тавьтал мэргэжил бус юу чаддагаараа амьдарлаа залгуулах тийм цаг үе тосох нь тэр. Тодруулж хэлбэл, БНМАУ зах зээлийн нийгэмд шилжсэн 1990 оны цагаан морин жил. Амьдралын ямар ч үед хөл алдаж үзээгүй ижий нь “Эрдэнэцэцэг ээ, миний охин ижийнхээ оёдлын машинаар хоолоо олж ид. Нагац ахын чинь хүүхдүүд гэрийн бүрээс, цаваг оён Дэнжийн мянгын зах дээр борлуулж байна. Борлуулалт ч гайгүй бололтой. Би тэдэнд тусалж, гэрийн бүрээс, цавгийг яаж эсгэдэг, хэрхэн оёдгийг мэдэж авлаа. Одоо хоёулаа үзээд алдая. Монгол хүн байгаа цагт монгол гэр байж л таарна” хэмээн цуу ямбуу даавуу дэлгэн анхны эсгүүрээ хийсэн тэр өдрөөс хойш бага таван ханатын баруун талаас оёдлын машины дуу тасраагүй гэж хэлж болно. Ингэж л тэрбээр өөрийн гэх орлоготой энэ цагийн хэллэгээр бизнесийнхээ гарааг эхлүүлсэн түүхтэй.

Оёдлын цех байгуулагдаад 31 жил болжээ. Хүний амьдралын бүхэл бүтэн үе ч гэж хэлж болохоор. Өсч дэвжсэн түүх нь энгийн юм шиг атлаа шантарч, уйлж дуулж явсан өдрүүд М.Эрдэнэцэцэгт бий. “Одоо л хөл дээрээ босох нь. Банкнаас авсан зээлээ түүртэлгүйгээр дарж чадах цаг айсуй” хэмээн бүтэн нойртой хонож эхэлтэл гал усны гашуун зовлонгийн өмнө өвдөг сөгдөх нь тэр. Амсхийх гэдгийг умартан зүтгэж байж бий болгосон бүхнийг нь дүрэлзсэн гал хамж аваад үнс болгож орхив. Хүний амь эрсдээгүйд нь магнайгаа хагартал баярлавч ёрдойж харлаад үлдсэн төмрийн хог, утаа савсуулан уугих бууриас өөр юу ч үгүй хоцорсондоо харамсан, харамсан уйлж зогссон тэр хүнд үеийг туулаад л гарсан. Ажлын байрны тав тухтай орчныг бүрдүүлэхийн төлөө хичээн 2019 онд үйлдвэрийн хоёр давхар шинэ байраа ашиглалтад оруулав. Эдүгээ агуулах, савтай ч болсон байна. Бараа материалаа ч жилийн дөрвөн цагийн эргэлтийг даахуйцаар нөөцлөх эдийн засгийн боломжтой болсон гээд багагүй амжилтад хүрсний нууц нь маш энгийн. Эрхэлсэн ажилдаа сэтгэлээ өгч, хичээх явдал. Түүнчлэн хэлсэн үгэндээ хүрч, үнэнч байдлыг эрхэмлэдэг чанар аж.

Хөндлөнгөөс харахад, сувд мэт шаргалтан цайрах цуу ямбуу даавуу нэгэн хэмээр нүргэлэх оёдлын машины дуу, үйлчин бүсгүйн хурдан шаламгай хөдөлгөөнтэй өнгө хослохуй дор монгол гэрийн гоёл болох гадуур, дотуур цагаан бүрээс, цаваг, өрх болж хувирна. “ Үнэтэй торгон хөшиг хэцээр татаж” хэмээх шүлэг зөвхөн шил толь болсон орд харшийнх бус талын Монголын үнэт өв монгол гэрийн дотуур хөшиг ч хээ хуар, саа бүхий үнэтэй торгоор хийгддэг болсныг энэ цехийн үйлдвэрлэж буй бараа бүтээгдэхүүнээс олж харснаа нуух юун.

“Цэцгээ гэдэг оёдолчныг хайж явна”

Худалдан авагчид түүнийг ийн сурагласаар ирэх нь бий. “Байнгын минь хаяг Нарантуул зах” шүү дээ хэмээн цайлганаар инээх оёдолчин бүсгүйг малчид андахгүй болжээ. Жил өнжөөд л гэрийнхээ гадуур, дотуур цагаан бүрээсээ сольдог учраас түүний урласан цагаан бүрээсүүд борлогдохгүйн зовлон үгүй. Ийм амжилтад хүрэхийн тулд монгол гэрийн давуун эдлэлийн зах зээлийг алдахгүйн төлөө тэрбээр 31 жил тасралтгүй хөдөлмөрлөсөн. Гэхдээ үнэнчээр. Үйлдвэрлэлийн аль ч шат дамжлагад алдаа гарах ёсгүй гэж тэр үздэг. Түүний баримталж ирсэн зарчим бол чанартай бүс даавуугаар бүтээгдэхүүнээ үйлдвэрлэх, худалдан авагчаа солихгүй байх явдал. Нэг удаагийн ашиг бодох бус зөвхөн өөрийг нь зорьж ирэх худалдан авагчаа дээдлэх учиртай хэмээн мань хүн үздэг байна. Тэр утгаараа байнгын үйлчлүүлэгчийн захиалгыг цаг хугацаанд нь гаргаж өгөхийг хичээхийн сацуу худалдаж авсан бүрээс нь очоод барихад язайхгүй, дутахгүй байх ёстой гэдэг дээр анхаарч ажилладаг байна. Үр дүнд нь малчид итгэлээ өгч, Эрдэнэцэцэг буюу Цэцгээ оёдолчны сэтгэлээ шингээж оёсон гэрийн даавуун эдлэлийг сонгож тэр хэрээр эрэлт ч их болжээ. Үүнээс гадна бараа бүтээгдэхүүнийхээ чанарт онцгой анхаарч анхны дамжлаг болох хамгийн чанартай даавууг сонгож, үйлдвэрлээ явуулна. Бас итгэлийн асуудал. Энэ талаараа тэрбээр “Манайх түншүүдтэйгээ 2004 оноос хамтран ажиллаж, бие биеийнхээ итгэлийг алдахгүй явсаар өнөөдөртэй золгосон. Аливаа үйл хэрэг итгэлцэл дээр тогтдог бөгөөд хэн хэнийхээ итгэлийг алдахгүй байх аваас хамтын ажиллагаа улам л бэхжин хөгждөг жамтай” хэмээн өгүүлсэн.

М.Эрдэнэцэцэг олонтой нэгэн.

Оёдолчдынхоо ахуй амьдралыг өөд татаж, хамтдаа хөгжих нь түүний зорилго. Зорилгодоо хүрэхийн тулд тэднийгээ ажлаар хангах явдал. Азаар бидэнд ажилгүй өнжих өдөр гэж үгүй. Өөрөөр хэлбэл, захиалга тасардаггүй гэсэн үг. Гэхдээ тэдний ажил улирлын чанартай гэдгийг хэлэх нь зөв байх. Шинэ гэрийн найр наадам, хуримын сар дуусмагц автомашины дулаан хучилга, гэрийн хаалганы дулаалга руугаа орно. Тэгээд арванхоёрдугаар сарын сүүлчээс хойш үндсэн бүтээгдэхүүнээ оёж эхэлдэг байна. Нөөц гэж ч ойлгож болох юм билээ. Нөгөөтэйгүүр, түүнийг тойрон найман “цэцэг” эргэлдэж буй. Түүний ”торгон” цэрэг П.Алтанцэцэг гэхэд л Дэлгэрэх цехэд 18 жил ажиллаж байгаа бөгөөд үйлдвэрийнхээ бүхий л үйл ажиллагааг хариуцна. И.Санчирын тухайд 16 дахь жилдээ ажиллаж байгаа. Оёдол хийхээс гадна оёдлын машины бүхий л засвар үйлчилгээг хариуцдаг алтан гартай бүсгүй. Тэрбээр дулаалга, давхарга, берзинт гээд бүсгүй хүн оёход хэцүү байж мэдэх оёдлыг ч өлхөн хийдэг. Цехэд шинэ хүн орж ирэхэд оёдлын бүх шат дамжлагыг зааж сургах үүрэг түүнийх. О.Лхамсүрэн хамт олныхоо эд эс нь болоод 12 жил болжээ. Алиа хошин, нийтэч зантай хэмээн танилцуулсан. И.Оюунтүлхүүр арав дахь намартайгаа золгож байгаа. Залуучууд дотроо хамгийн хурдан шалмаг, дайчин бүсгүй гэж ирээд л дарга нь магтаж байна лээ. С.Мөнхзул бүсгүйн хувьд үйлдвэрлэл хариуцдаг П.Алтанцэцэгийн охин нь. Уг нь тэрбээр тогооч мэргэжилтэй. Дээр дурдсан цехэд өсч торнисон хоёр охины нэг нь. Цехийн хамгийн залуу ажилтан бол Т.Төмөрбаатар. Ажилд ороод хоёр жил болж байгаа ч аливаа зүйлийг маш хурдан сурдаг, хичээнгүй залуу гэсэн шүү. Бидэнтэй уулзаж амжаагүй ч заавал онцолж хэлэх оёдолчин бол н.Содцэцэг. Тэрбээр зөвхөн гэрийн торгон хөшгийг дагнаж урладаг. Тэд хамтрагчид болоод арав гаруй жил болжээ.

Дашрамд өгүүлэхэд, оёдлын салбарт голдуу эмэгтэйчүүд ажилладаг. Тэд хоногийн талыг ажил дээрээ өнгөрүүлэх нь бий. М.Эрдэнэцэцэг ажил олгогчийн хувьд оёдолчдынхоо ахуй амьдралыг гарын таван хуруу шигээ мэднэ. Тиймээс охиддоо боломжийнхоо хэрээр туслахыг хичээн зээл өгөх, тусламж үзүүлэх зэргээр ахуй амьдралд нь дэм болсоор ирсний үр дүнд эхнээсээ өөрийн гэсэн хашаа, байшинтай болцгоожээ. Энэ бол хувь хүний сэтгэл мэдэх асуудал. Дэлгэрэх цехийнхэн ядарч зүдэрч яваа нэгэнд сайхан сэтгэлийн гараа байсхийгээд сунгадаг талаар БЗД-ийн нийгмийн ажилтан онцолсныг уншигчдадаа дуулгахад таатай байна. Өнгөрсөн жилүүдэд жил дараалан болсон үер ус, зуд турханд өртсөн хэд хэдэн айлд Дэлгэрэх цехийнхэн иж бүрэн гэр, гэрийн бүрээс хэрэгсэл болон эд материалын тусламж үзүүлж ирснийг мэдэх хүн олон.

Дэлгэрэнгүй ...