ЁКОЗҮНАГҮЙ БАШЁ

Энэ сарын тэмцээний банзүкэ буюу чансааны зүүн, баруун жигүүрийг тэргүүлсэн мэргэжлийн сүмогийн 69 дэх ёкозүна Хакухо М.Даваажаргал, 71 дэх ёкозүна Какүрюү М.Ананд нар гэмтлийн улмаас зодоглоогүй юм. Харин 72 дахь ёкозүна Кисэносато тэмцээний дөрөв дэх өдөр мөн бэртэж, тэмцээнээ өндөрлөсөн юм. Ийнхүү Кюүшюү башё ёкозүна цолтонгүй башё боллоо.

22 НАСТАЙ ЗАЛУУ ТҮРҮҮЛЭВ

Японы мэргэжлийн сүмо бөхийн 2018 оны 11 дүгээр сарын тэмцээн буюу Кюүшюү башё өндөрлөлөө. Энэ сарын тэмцээнд зүүн жигүүрийн комүсүби Такакэйшо 13 даваа, хоёр унаатай тэргүүлэн Японы эзэн хааны цомын эзнээр тодорлоо. “Чиганоүра” дэвжээний бөх Такакэйшо 22 нас, гурван сартайдаа түрүүлснээр хамгийн залуудаа түрүүлсэн бөхчүүдийн зургадугаарт бичигдэх болов.

Мөн энэ сарын тэмцээнд Макүүчи буюу дээд зиндаанд зодоглосон бөхчүүдийн хамгийн залуу нь Такакэйшо байсан юм. Тэрээр түрүүлснээс гадна хоёр тусгай шагнал хүртэв.

Хамгийн залуудаа түрүүлсэн бөхчүүдийн жагсаалт

1. Ёкозүна Таканохана – 19 нас, таван сар
2. Ёкозүна Тайхо – 20 нас, зургаан сар
3. Ёкозүна Китаноуми – 20 нас, долоон сар
4. Ёкозүна Хакухо – 21 нас, хоёр сар
5. Ёкозүна Асашорёү – 22 нас, хоёр сар
6. Такакэйшо – 22 нас,  гурван сар

ОЗЕКИГИЙН БОЛЗОЛ СОНССОН Ч СЭКИВАКИ ЦОЛОО АЛДАЖ, КОМҮСҮБИ РҮҮ БУУНА

Зүүн жигүүрийн сэкивакэ, Нагоя башёгийн түрүү бөх Митакэүмиг энэ сарын башёд 11 давбал озеки цол олгоно хэмээн Японы сүмо бөхийн холбоо мэдэгдсэн. Гэвч Митакэүми долоо давж, найм унаснаар макёкоши болж, сэкиваки цолоо алдах болов. Гэхдээ 7:8 гэсэн харьцаатай тэмцээнийг өндөрлүүлсэн учраас шинэ оны эхний башёд комүсүби цолтой зодоглох боломжтой юм.

МОНГОЛЫН БӨХЧҮҮДЭЭС 12 НЬ КАЧИКОШИ ХИЙЛЭЭ

Монголын 22 сүмоч банзүкэд бичигдсэнээс гурав нь өнжиж, 19 сүмоч барилдав. Тэдгээрийн 12 нь качикоши буюу 50-с дээш хувийн амжилттай барилдаж, долоо нь макёкоши буюу тавиас доош хувийн амжилттайгаар Кюүшюү башёг өндөрлүүллээ. Тэр дундаа макүүчи зиндааны маэгаширагийн барууны хоёрдугаарт жагссан Тамаваши Б.Мөнх-Оргил ес давж, амжилттай барилдсан бөгөөд ирэх тэмцээнд сэкивакэ цолд хүрэх магадлалтай.

Макүүчи зиндаа

Сэкивакэ Ичиножо А.Ичинноров 6:9
Маэ Б-2 Тамаваши Б.Мөнх-Оргил 9:6
Maэ З-6 Таканоива А.Баасандорж 6:9
Маэ З-14 Чиёошома Г.Мөнхсайхан 6:9
Маэ З-16 Араваши Э.Дөлгөөн 1:11 /өнжсөн/

Жүрёо зиндаа

З-2 Дайшохо Ч.Шижирбаяр 8:7
З-8 Кёкүшүхо Т.Эрдэнэбаатар 5:10
З-10 Азүмарү С.Тодбилэг 9:6
З-12 Миторюү Б.Төрболд 9:6

Макүшита зиндаа

Б-4 Кагамио Б.Нанжид 2:5
Б-8 Сэйро А.Өнөболд 4:3
Б-12 Кирибаяма Б.Лхагвасүрэн 6:1
Б-18 Гочозан Д.Ууганбаатар 5:2
З-23 Асахирюү Б.Дэнзэнсамбуу 2:5
З-40 Кёкүтосэн Э.Энхманлай 4:3
З-41 Сакигакэ Я.Баттүшиг 5:2
З-49 Хошорюү С.Бямбасүрэн 6:1

Санданмэ зиндаа

Б-49 Ёошояма Б.Анхбаяр 4:3
Б-56 Саданохикари Д.Наранцогт 4:3

ЭНЭ ОНЫ ХАМГИЙН ОЛОН ДАВААТАЙ БӨХ ОЗЕКИ ТОЧИНОШИН

Жилийн зургаан башёгийн нийлбэр дүнгээр хамгийн олон давсан бөхийг тодруулдаг. Энэ оны хамгийн олон даваатай бөхөөр озеки Точиношин тодров. Хэдийгээр нэг башё өнжсөн ч зодоглосон таван тэмцээндээ нийт 59 давснаар энэ оны хамгийн олон даваатай бөх болсон юм. Өнгөрсөн жил ёкозүна Хакухо М.Даваажаргал хоёр башё өнжсөн боловч 56 даваатайгаар тэргүүлж байсан билээ.

ДЭЭД ЗИНДААНД БАРИЛДСАН БӨХЧҮҮДИЙН 44 ХУВЬ НЬ ТАВИАС ДЭЭШ ХУВИЙН АМЖИЛТТАЙ БАРИЛДЛАА

Макүүчи буюу дээд зиндаанд зодоглосон 36 бөхөөс 16 нь тавиас дээш хувийн амжилттай барилдав. Харин 20 бөх макёкоши боллоо.

МАКҮШИТАД ӨВӨР МОНГОЛ БӨХ ТҮРҮҮЛЛЭЭ

Жүрёо зиндаанд тус зиндааны барууны 14-т эрэмбэтэй, “Огүрүма” дэвжээний бөх Томоказэ 12 даваа, гурван унаатай тэргүүлэв.

Макүшитагийн зүүний тавдугаарт эрэмбэлэгдсэн Өвөр Монголын бөх, Сококүрай Энхтүвшин уналгүй, долоон даваатайгаар түрүү бөхөөр тодорлоо. Тэрээр нэгэн цагт макүүчи зиндаанд хүч сорьж явсан бөх билээ.

Санданмэ зиндаанд мөн л дээд зиндаад хүч үзэж байсан, залуу сүмоч Үра түрүүлэв. Тэрээр мөн долоон давж, уналгүйгээр түрүүлжээ. Жонидан зиндаанд “Ономацү” дэвжээний залуу сүмоч Мицүүчи долоо даван түрүүллээ.  Жонокүчи зиндаанд “Кисе” дэвжээний бөх Хатоока унаагүйгээр түрүүллээ.

ДАРААГИЙН ТЭМЦЭЭН 2019 ОНЫ НЭГДҮГЭЭР САРЫН 13-НД ЭХЭЛНЭ

Мэргэжлийн сүмогийн 2019 оны эхний тэмцээн нэгдүгээр сарын 13-аас 27-нд Токио хотын Рёококү Кокүгиган ордонд болно.

Т.Түмэндэмбэрэл