Францад шатахууны үнэ нэмэгдсэнээс болоод арваннэгдүгээр сарын 17-ноос олон нийтийн жагсаал цуглаан эхэлсэн юм. Бензиний үнийг 2019 оны эхнээс  7,5, дизель түлшний үнийг 15 хувь нэмэгдүүлэх гэж байгаа  нь олон нитийн дургүйцлийг төрүүлж гудамжинд гаран энэ хөдөлгөөнөө “шар хантаазтангууд”ын хөдөлгөөн хэмээн нэрлэсэн юм. Жагсаалд оролцож байгаа хэдэн арван мянган жолооч нар гэрэлтдэг шар хантааз өмсөн гараад байна. Арванхоёрдугаар сарын 1-ний өдөр гэхэд л эсэргүүцлийн хөдөлгөөн, жагсаалд 130 гаруй мянган хүн оролцсон мэдээ байна. Жагсагчдын эсрэг цагдаагийнхан нулимс асгаруулагч хий, шуугиант гар бөмбөг хэрэглэж байгаа ч харин ч тэд бэхлэлт босгон үргэлжлүүлэн тэмцсээр байна. Хууль сахиулагчид бямба гарагт 255 хүнийг саатуулжээ.

Харин ч бүр хүчирхийллийн шинжтэй болж, хүний амь эрсэдлээ гэж Sky News хэвлэл бичиж байна. Нийслэл Парисын гудамжинд болж байгаа эсэргүүцлийн жагсаалд оролцож байгаа нэгэн энэ хөдөлгөөн жинхэнэ хувьсгалын эхлэл боллоо гэсэн байна. Энэ хөдөлгөөн хэзээ дуусах вэ гэсэн асуултад жагсагчид “бид эцсээ хүртэл зогсоно” гэжээ.

“Жагсаал хэзээ ч зогсохгүй, хэрэгтэй бол бид зул сарын баярыг гудамжинд тэмдэглэнэ. Бид эндээ үлдэж, хаашаа ч явахгүй” гэж жагсагчдын нэг хэлсэн байна.

Триумфалийн хаалга битүү утаа болж, гудамжийг хаагаад байна. Хүмүүс ч “бид засгийн газарт итгэхгүй байна. Засгийн газар асуудлыг хууль сахиулагчдын хүчээр шийдэх гэж байна” гэжээ.

“Бид цаашид засгийн газарт итгэхгүй байна. Тэдний чадах зүйл нь л биднийг хууль сахиулагчдад өгөх. Тэд ч гэсэн засгийн газарт итгэхгүй байгаа. Бид тэдэнтэй ярилцаж үзсэн, тэд зүгээр л “бид үүргээ биелүүлж байна” гэж ярьсан. Тэднийг чулуу, модоор шидлэхээр аргагүй л хариу барьж байна” гэж өөр нэг жагсагч хэлжээ.

Хүмүүс “энэ бол төгсгөл биш”, шаардлага биелүүлэхгүй бол  “хөдөлгөөн үргэлжилнэ” гэжээ. Бямба гарагийн шөнө жагсагчдын барьж байсан бэхлэлтэд осол гарч нэг эрэгтэй амь алдсан байна. Ийм байдлаар амь үрэгдэгсдийн тоо гурав болжээ.

“Ням гарагийн шөнө Бош-дю-Рон орчимд эсэргүүцлийн хөдөлгөөний барьсан бэхлэлтэд тулж зогссон ачааны машин мөргөснөөс бичил автобусны жолооч нас барсан байна” гэж УНН хэвлэл мэдээлсэн байна.

Жагсаалд оролцогсод цагдаагийнхан руу халдаж, дэлгүүр, автомашин шатаан бэхлэлт босгож, хууль сахиулагчид, жагсагчдын хооронд мөргөлдөөн болсоор байна. Үймээний үеэр нэрвэгдэгсдийн тоо 133 хүрсний дотор цагдаагийн 23 ажилтан бэртэж гэмтжээ. Цагдаагийнхны саатуулсан хүний тоо 412 хүрсэн байна. Тэд цагдаагийн машиныг шатаан зэвсгийг нь булаажээ. Үймээний дундуур танхайчууд Триумфалийн хаалганы хөшөө дурсгалыг гэмтээн хана дээр нь элдэв зүйл эрээчиж эхэлсэн байна.

Эмх замбараагүй байдал үргэлжилсээр байвал засгийн газар онц байдал ч тогтоож магадгүй байна гэж Францын Засгийн газрын төлөөлөгч Бенжамин Гривогийн хэлснийг ТАСС агентлаг дамжуулсан байна. Тэр “эсэргүүцлийн энэ хөдөлгөөний эсрэг авч хэрэгжүүлж болох бүхий л хувилбарыг судалж байгаа” гэжээ.

Макрон,  Ерөнхий сайдаа “шар хантаазтангууд”-тай уулзахыг хүслээ

Ерөнхий сайд Эдуард Филиппийн мэдээллийг Сенатад сонссоны дараа Ерөнхийлөгч Эммануэль Макрон түүнийг “Шар хантаазтангууд”-ын төлөөлөгчидтэй уулзахыг хүслээ гэж Елисейн ордны хэвлэлийн алба мэдээллээ. Ерөнхий сайд жагсагчидтай хэзээ уулзахыг мэдээлээгүй байна. Харин Засгийн газар  ийм байдлаар иргэдтэй яриа хэлэлцээр хийж эсэргүүцлийн хөдөлгөөнийг цаашид газар авхуулахгүй байхыг эрмэлзэж байна гэсэн байна. Үүний зэрэгцээ Макрон Дотоод хэргийн сайд Кристоф Кастанерт хандаж нөхцөл байдлыг намжаахыг хүсчээ. Тэрбээр цагдаагийнхан хэв журам  сахиулах тогтолцоогоо сайжруулах хэрэгтэй гэж тэмдэглэсэн байна.

Филипп: Энэ бол хүчирхийлэл нэмэгдэж байгаагийн шинж

Цагдаагийнхан бямба гарагт 255 хүнийг саатуулаад байсан бол даваа гарагийн шөнө гэхэд энэ тоо 412 хүрсэн байна. Хууль сахиулагчдын саатуулан баривчилсан хүний тоо нэмэгдэж байгаа тухайд Францын ерөнхий сайд Эдуард Филипп “Энэ бол хууль сахиулагчдын эсрэг хүчирхийллийн түвшин нэмэгдэж байгаагийн илрэл, ноцтой баримт” гээд жагсагчид цагдаагийнхны эсрэг хүч хэрэглэж байгаад харамсч байгагаа илэрхийлээд хууль сахихыг уриалсан байна.

“Эвдэн сүйтгэх, өдөөн турхирч, хууль сахиулагчид руу халдах, хувьсгалд уриалан дуудах юм бол энэ бүхэн Ерөнхийлөгчийн хэлсэн асуудалд хамаагүй, бид уучлахгүй” гэж Ерөнхий сайд онцолжээ.

Ле Пен Парламентыг тарахыг шаардлаа

Францад шатахууны үнийн өсөлтийг эсэргүүцсэн жагсаал цуглаан өрнөж улам газар авч байгаатай холбогдуулан “Үндэсний нэгдэл” намын тэргүүн Ле Пен францын Үндэсний цуглаан /парламент/-ыг тарж ээлжит бус сонгууль явуулахыг шаардлаа.

“Үндэсний цуглааныг тарааж, шинэ пропорциональ сонгууль явуулах хэрэгтэй гэж үзэж байна” гэж улстөрч France 3 телевизээр ярьжээ.

Ле Пен  өргөн олны ийм эсэргүүцэл, жагсаал цуглаан нь францын ард иргэд парламентын үйл ажиллагаанд сэтгэл дундуур байгаагийн илэрхийлэл гэж тэмдэглэсэн байна. “Францчууд татварын шударга ёс хүсч байна” гэж тэр онцолжээ.

Үймээний үеэр 12 сэтгүүлч бэртэж гэмтээд байна

Парист болж байгаа жагсаал цуглаан, үймээний үеэр оросын 12 сэтгүүлч өртөж гэмтэл авлаа гэж телевизийн RT сувгийн ерөнхий редактор Маргарита Симоньян мэдээлсэн байна. “Францад болж байгаа үйл явдлын улмаас манай 12 сэтгүүлч нэрвэгдлээ. Тэд хаймар сух, чулуу, нулимс асгаруулагч хийнд өртсөн байна. 12 гэдэг бол зөвхөн манай сэтгүүлчдийн тоо” гэж Симоньян Telegram дээрээ бичжээ. РИА Новости агентлагийн мэдээлснээр бол эдний найм нь RT France-ийн ажилтнууд, хоёр нь RT International-ийнх, хоёр нь дүрс бичлэгийн Ruptly агентлагийн ажилтан байжээ. Нэг сурвалжлагч нүүрэндээ сумны шарх авсан бол, нөгөө нь хөлдөө шарх авсан гэнэ.