ОХУ-ын хамгийн том алт олборлогч Полюс сүүлийн үед 1244 гаруй тонн буюу 40 сая трой унци алтны нөөцтэй, 540 сая тонн хүдрийн нөөцтэй Сибирийн Сухой Лог орд газрыг 100 хувь эзэмшихээр шаргуу ажиллаж байгаагаа мэдэгджээ. Тэдний мэдээлж буйгаар огт хөндөгдөөгүй Сибирийн дээрх орд газар бол дэлхийд хамгийн томд орох аж. “2020 оны тавдугаар сарын 31-ний байдлаар тус орд газрын хүдрийн нөөцийг эхний ээлжинд дунджаар тонн тутамдаа 2.3 грамм алтны агууламжтай 540 сая тонн хэмээн тогтоосон. Энэ нь нийт алтны хэмжээ ойролцоогоор 40 сая унци гэсэн үг юм. Үүнээс үзэхэд Сухой Лог бол дэлхийн хамгийн том идэвхтэй алтны уурхай болох бүрэн боломжтой” хэмээн Полюсын гүйцэтгэх захирал Павел Грачев хэлжээ.

Грачевийн хэлснээр шинэ орд нь дэлхийн хоёр дахь хамгийн том алт олборлогч Полюсын ирээдүйг баталгаатай нөөцөөр тогтвортой болгож байгаа юм. Өмнө нь Полюс шинэ орд газрынхаа ихэнх хувийг эзэмшиж байгаад өнгөрсөн сард 128.2 сая ам доллараар үлдсэн 22 хувийг нь худалдаж авахаар болсон аж.

Полюс бол Красноярск, Иркутск, Магадан мужууд, Бүгд Найрамдах Саха улсуудад алт олборлодог Оросын хамгийн том, дэлхийн хоёр дахь том алт олборлогч компани юм. 2019 онд тус компани 2.8 сая унци алт олборлосон бөгөөд 2020 онд мөн хэмжээний олборлолт хийхээр төлөвлөжээ.