2021 оны эхний нэг сарын дүнгээр гадаад худалдааны нийт бараа эргэлт нэг тэрбум ам.доллар болж өнгөрсөн оны мөн үеэс 166.4 сая ам.доллар буюу 17.8 хувиар өссөн болохыг Гаалийн ерөнхий газраас мэдээллээ. 

Тодруулбал, экспортын дүн импортын дүнгээс 181.1 сая ам.доллароор давж, гадаад худалдааны баланс эерэг гарсан байна. Экспортод нийлүүлсэн барааны 96.4 хувийг валютын төлбөртэй худалдаа эзэлжээ.

График. Гадаад худалдааны нийт бараа эргэлт /мян.ам.доллар/

Экспортын барааны нийт дүнг харвал:

• Эрдэс бүтээгдэхүүн 562.7 сая ам.доллар буюу 87.9%
• Хүнсний бэлэн бүтээгдэхүүн 16.7 сая ам.доллар буюу 2.6%
• Ургамлын гаралтай бүтээгдэхүүн  13.1 сая ам. доллар буюу 2%
• Нэхмэл болон нэхмэл бүтээгдэхүүн 11 сая ам.доллар буюу 1.7 хувийг тус тус эзэлж эдгээр нь нийт экспортын дүнгийн 94.2%-ийг эзэлж байгаа аж.

Экспортолсон улсаар харвал:

• Боловсруулаагүй нефть, төмрийн хүдэр, зэсийн баяжмал болон цайрын баяжмалыг 100%, чулуун нүүрсний 92.6 хувийг БНХАУ-д
• Жоншны 81.6 хувийг БНХАУ-д, 18.4 хувийг ОХУ-д;
• Үхэр адууны боловсруулсан болон боловсруулаагүй ширний ихэнх хувийг БНХАУ-д
• Самнасан ноолуурыг 100% Итали-д
• Ямааны угаасан ноолуурыг 100%БНХАУ-д тус тус экспортлов.

Өөрөөр хэлбэл, дээрх нэрийн бараа нь экспортын нийт дүнгийн 86.6 хувийг эзэлж байгаа юм.

Харин импортоор нийлүүлэгдсэн барааны нийт дүнг харвал:

• Машин механик тоног төхөөрөмж ба эд анги, цахилгаан хэрэгсэл, тэдгээрийн сэлбэг 85.2 сая ам.доллар буюу 18.6%
• Эрдэс бүтээгдэхүүн 96.2 сая ам.доллар  буюу 21% (үүний дотор нефтийн бүтээгдэхүүн 81.1 сая ам.доллар буюу 84.2%)
• Мал амьтан, ургамлын гаралтай бүтээгдэхүүн, хүнсний зүйл 78.9 сая ам.доллар буюу 17.2%
• Авто агаарын тээврийн хэрэгсэл тэдгээрийн эд анги 75.6 сая ам.доллар буюу 16.5%
• Үндсэн төмөрлөг болон түүгээр хийсэн бүтээгдэхүүн 24.3 сая ам.доллар буюу 5.3%
• Химийн болон түүнтэй холбоотой үйлдвэрийн бүтээгдэхүүн 29.6  сая ам. доллар буюу 6.5  хувийг тус тус  эзэлж, эдгээр бүтээгдэхүүнд нийт дүнгийн 85.1% ногдож байна.

Олон улсын санхүү эдийн засгийн байгууллага, хандивлагч орны зээлээр нэг сая ам.долларын барааг тус улсад нийлүүлснээс барааг гарал үүслийн улсаар нь авч үзэхэд БНХАУ-д 36.2%, Австри-д 36.2%, ХБНГУ-д 23.8% тус тус ногдож байгаа аж.

Үндсэндээ нийт зээлийн барааг Засгийн газрын шугамаар оруулж иржээ. Тодруулбал,

• 28.7 хувийг БНХАУ-аас
• 36.2 хувийг Австри улсаас
• 23.8 хувийг ХБНГУ-аас тус тус олгосон байна.

Түүнчлэн нийт 7.8 сая ам.долларын бараа гадаадын хөрөнгө оруулалтаар нийлүүлэгджээ. Үүнд,

• ОХУ-д 85.4%
• БНХАУ-д 14.4% тус тус ногдож байгаа аж.