Өнөөдөр Монгол Улс дахь Канад улсын Элчин сайдын яамнаас Канад сангийн талаар иргэдэд нээлттэй мэдээлэл өгөх өдөрлөг боллоо. Тус сан Монгол Улсад 1997 онд байгуулдсанаас хойш тогтмол үйл ажиллагаа явуулж байна.

Нийт 22 жилийн хугацаанд нийт 426 төсөлд 13.8 тэрбум төгрөгийн санхүүжилт олгожээ.

Канад сан ирэх дөрөвдүгээр сараас иргэдээс төслүүд хүлээн авч эхлэх аж. Санхүүжилт авахыг хүссэн төсөл нь дөрвөн сараас хоёр жил хүртэлх хугацаанд үргэлжлэх боломжтой, ашгийн бус, жендерийн тэгш байдлыг хангасан, байгаль орчинд ээлтэй, иргэдэд үр өгөөжтэй байх зэрэг шалгуур тавигдах юм байна.

Өнгөрсөн жилүүдэд Канад сангаас санхүүжилт авч, хэрэгжсэн төслүүдийн 62.5 хувь нь орон нутгийн хөгжлийг дэмжсэн төслүүд байжээ. Мөн давхардсан тоогоор зургаан сая орчим хүн уг төслүүдийн үр өгөөжийг хүртсэнээс олонхи нь хүүхэд, эмэгтэйчүүд юм байна.

Канад сангийн зорилго нь хөгжиж буй орнуудын тогтвортой хөгжлийг дэмжиж, ядуурлыг бууруулах, аюулгүй шударга, дэвшилттэй нийгэм байгуулахад хувь нэмрээ оруулахад чиглэдэг аж.