Нийгэм
НАМЗХ-ын Ерөнхийлөгч хэн бэ? Г.Баттүшиг? Н.Учрал? О.Гэрэлт-Од?
21 жилийн түүхтэй НАМЗХ-ныхон ээлжит хурал ирэх сард болж, шинэ даргаа сонгох гээд тун ч анхаарлдын төвд байна. Нэгэн цагт энэ холбоог МАН-ын дарга нарыг бэлтгэх байгууллага ч гэж нэрлэдэг байлаа. Арга ч үгүй МАН-д нөлөө бүхий эрхмүүд энэ холбооноос төрөн гарсан, үндсэндээ МАН-ын “нөөц” кадр байгууллага. Хэдийгээр нэг гэсэн уналтанд ороод байгаа ч энэ байгууллагыг толгойлно гэдэг МАН-ын залуучуудын хувьд маш том амбицийн асуудал гэж хэлж болно. Тийм ч учраас анхаарал татах нь зүй. Зөвхөн залуус гэлтгүй МАН-ын лидерүүдийн хүч оролцоо, нөлөөлөл ч чухал, анхаарлыг нь ч татдаг том байгууллага.
Тухайлбал өдгөөгийн ерөнхийлөгч “Эрдэнэт” үйлдвэрийн дарга асан Ч.Ганзоригийн хүү УИХ-ын гишүүн Г.Тэмүүлэнг аав нь өөрийгөө залгамжлуулахаар лоббидсон ч гэсэн. Түүнийг НАМЗХ-ын 21 жилийн түүхэнд байгаагүй сул ерөнхийлөгч гэгдэж байгаагийн хувьд ч түүнийг өөрчлөх нь тодорхой. Тэгээд ч сонгуульт дөрвөн жилийн хугацаа дуусч байгаа. Тэгвэл түүний хувьд дөрвөн жилийн хугацаа нь дуусч байгаа юм.
Тиймээс НАМЗХ-ын дараагийн Ерөнхийлөгч хэн болох вэ гэдэг асуудал одоо ид яригдаж байна. Улстөрийн хүрээнд өрнөж буй яриагаар бол энэ суудалд Ерөнхий сайд асан Сү.Батболдын хүү Б.Баттүшиг, УИХ-ын гишүүн Н.Учрал, СХД-ийн ЖДҮ-ийг дэмжих төвийн захирал О.Гэрэлт-Од нарын нэр яригдаж байгаа гэнэ. Орчин цагийн өв залгамжлагч баян ханхүү гэдэг шиг Б.Баттүшигийг аавынх нь нэрээр олон нийт мэднэ. Басхүү аавынхаа нэрээр аавынхаа нэрээр Монголбанкны Бодлогын зөвлөлийн гишүүнээр томилогдон хэл амтайхан ажиллаж байсан. Монголын Үндэсний Олимпын Хорооны тэргүүн дэд Ерөнхийлөгч, “Скайтел группийн ТУЗ-ийн дарга, “И-Март”-ын эзэн гээд олон албан тушаалтай. Мэдээж хэрэг энэ бүхний ард аавынх нь тавьж өгсөн засмал зам зурайж байгааг ойлгож ядах юмгүй. Н.Учралын хувьд ч “Их Засаг”-ын Ням-Осорын хүү гэдгээрээ ч мөн олонд танигдсан. Бас л алтан халбага зууж төрсөн үе залгамжлагчдын нэг. Харин дунд нь “тоон дотор үсэг цохиж явна” гэдэг шиг О.Гэрэлт-Од гэж ямар нөхөр гараад ирэв гэж гайхаж магадгүй. Хэн нэгэн баяны юм уу улстөрчийн хүү лав биш. Сүүлийн үед ЖДҮ-г жинхэнэ утгаар гэх мэт юм цор цор гээд байх болсон олны танил бус залуу. Одоогоор түүний ард хэн байгаа, хэн лоббидож байгаа нь тодорхой биш.
Б.Баттүшигийн хувьд бол ойлгомжтой аав болон аавынх нь андуудын том дэмжлэг байгаа. Дээр нь Монголын тэргүүн баян “МАК”-ийн Б.Нямтайширийн ганц охин Н.Цэлмүүнтэй үерхэж байгаа болохоор магадгүй хадам ах Н.Номтойбаяр “зүтгүүлж” байгаа гэх таамаг байна. Ямар ч л гэсэн Монголын хоёр толгой баян гэр бүлийн дэмжлэг байгаа гээд ойлгочиход хилсдэхгүй.
УИХ-ын гишүүн Н.Учралын хувьд “Их Засаг”-ийн захирал аавынх нь зангараг бас байж л байгаа. Дээр нь Л.Оюун-Эрдэнэ тэр хоёрыг У.Хүрэлсүх улс төрд хөтөлж оруулж ирсэн. У.Хүрэлсүхийг Шадар сайдаар ажиллаж байхад нь зөвлөхийн үүрэг гүйцэтгэж байсан. ЗГХЭГ-ын дарга С.Оюун-Эрдэнэтэй хамт 2015 онд НАМЗХ-ноос Н.Номтойбаяр, Г.Тэмүүлэн нарт хөөгдөж гарч байсан удаатай. Ямартай ч Ерөнхий сайд У.Хүрэлсүх улс төрийн холын нүүдэл бодож НАМЗХ-ны ерөнхийлөгчид Н. Учралыг сойхоор хоорондоо хор найруулаад эхэлсэн гэх мэдээлэл байна.
Магадгүй түүнд НАМЗХ-ын Ерөнхийлөгч гэдэг УИХ-ын гишүүний суудлаас ч илүү чухал амттай харагдаж байж болох. Яагаад гэвэл ирэх сонгуульд НАМЗХ МАН-ын гол том хүчин түшиг нь байх учраас томоохон хөзрийг атгалаа л гэсэн үг. Ингээд бодохоор зөвхөн эдгээр залуусаас гадна ах нарынх нь томхон тоглолт энд өрнөж байгаа нь тодорхой.
Харин О.Гэрэлт-Од гэдэг хэний ч танил бус залуу юунд найдаж Ерөнхийлөгчид зүтгэж байгааг таах аргагүй. Нөгөө “Ардын хүүхэд ялж болдоггүй наадам уу” гэдэг шиг бор зүрхээрээ дайраад орно гэдэг арай л хэтэрхий эр зориг мэт. Нөгөө талаасаа сүүлийн үед НАМЗХ-ын нэр хүнд унах болсон, дээр нь улстөрчид, бизнесмэнүүд үе уламжлан “хаан ширээ”-г залгамжилдаг боллоо гэсэн шүүмжлэлийн дэргэд цав цагаан цаас шиг сонирхолтой кандидат. МАН-ын ачаар эрх мэдэлд хүрсэн, хөрөнгөжсөн улстөрчдийн хүүхдүүд өнөөдөр улс төр дэх нэр, нөлөөгөө улам томруулахын тулд НАМЗХ-гоор дамжин намаа атгахаар улайрч байна гэсэн дургүйцэл хаа сайгүй өрнөөд байгаа энэ үед жирийн нэгэн залуу хун тайж, өв залгамжлагч нартай өрсөлдөнө гэхээр сонин байгаа биз. Түүнээс гадна сүүлийн үед МАН-ын нэрийг навсайтал унагаж, олон нийтийг дургүйцлийг төрүүлээд байгаа ЖДҮ-гийн хэргийг өөрчлөё гэсэн лоозон тавиад байгаа нь хүмүүст таалагдаж, гэнэт гоц мөргөн гараад ирэхийг үгүйсгэх аргагүй. Ийм л нэгэн сонирхолтой таамаг өрнөж эхлээд байна, НАМЗХ-ын эргэн тойронд. Магадгүй хөшигний ард цусгүй тулаан өрнөж байгааг үгүйсгэх аргагүй биз ээ.
Нийгэм
ИБУИНХУ-аас манай улсад англи хэлний хөтөлбөр хэрэгжүүлэхэд зориулж 10 сая фунтийн дэмжлэг үзүүлэхээ илэрхийллээ
Их Британи Умард Ирландын Нэгдсэн Хаант Улсын Гадаад хэргийн сайд Дэвид Камерон Монгол Улсад айлчилж байна. Айлчлалын хүрээнд өнөөдөр Боловсрол, шинжлэх ухааны сайд Л.Энх-Амгалантай уулзаж, 23 дугаар сургуулиар зочлон, Pearson англи хэлний хөтөлбөрийн хэрэгжилттэй танилцлаа.
Pearson англи хэлний хөтөлбөрийг манай улс 2022-2023 оны хичээлийн жилд 38 сургуульд туршилтаар хэрэгжүүлсэн бол энэ хичээлийн жилд төрийн өмчийн бүх ерөнхий боловсролын сургуулийн 5-6 дугаар ангийн 140 орчим мянган хүүхэд судалж байна. Ирэх хичээлийн жилд Pearson хөтөлбөрийг судлах сурагчдын тоог нэмэгдүүлнэ.
2023 онд батлагдсан Боловсролын ерөнхий хуулиар сурагчдын судлах үндсэн гадаад хэл нь англи хэл байхаар хуульчилсан. Тиймээс хуулийн хэрэгжилтийг хангах зорилгоор ирэх 2024 оны 9 дүгээр сарын 1-нээс 3 дугаар ангийн сурагчид англи хэл үзэж эхэлнэ. Мөн энэ хүрээнд багш нарыг бэлтгэх, давтан сургах юм. Англий хэлний хөтөлбөрийг хэрэгжилтийг ИБУИНХУ-ын Гадаад хэргийг сайд дэмжихээ илэрхийлж 3 жилийн хугацаанд 10 сая фунтийн дэмжлэг үзүүлнэ гэлээ.
Pearson англи хэлний хөтөлбөрөөс гадна тус улсын Кембрижийн их сургуультай манай улс боловсролын салбарт хамтран ажилладаг. Энэ хүрээнд олон улсад хүлээн зөвшөөрөгдсөн ерөнхий боловсролын тогтолцоог бүрдүүлэх, бэхжүүлэх ажлууд үе шаттай хэрэгжиж байна.
Мөн дэлхийн хэмжээнд их дээд сургуулиудын эрэмбэ чансааг тогтоодог Times Higher Education байгууллагатай хамтран 2023 онд Монгол Улсад үйл ажиллагаа явуулж байгаа дээд боловсролын байгууллагуудын үндэсний эрэмбийг анх удаа тогтоосон. Хамтын ажиллагаа цаашид ч үргэлжилж тодорхой давтамжтайгаар эрэмбэ чансааг шинэчилж байх юм. Үндэсний үнэлгээний тогтолцоогоо бэхжүүлэх зорилгоор бид Английн AQA байгууллагатай мөн хамтран ажилладаг.
Чевнингийн хөтөлбөрийн хүрээнд сүүлийн жилүүдэд манай улсаас Англи улсад 200 гаруй оюутан суралцаж төгсөөд байна. Тэтгэлгийн хэмжээ болон хамрагдах оюутны тоог нэмэгдүүлэх чиглэлээр ажиллаж байна. Энэ мэтчилэн ИБУИНХУ болон Монгол Улсын боловсролын салбар дахь хамтын ажиллагаа улам бүр өргөжиж байна
Нийгэм
“Эрдэнэс Тавантолгой” ХК-ийн хувьцаа эзэмшигчдийн ээлжит хурал боллоо
“Эрдэнэс Тавантолгой” ХК-ийн Хувьцаа эзэмшигчдийн ээлжит хурал 2024 оны 4 дүгээр сарын 26-ны өдөр Монголын хүүхдийн ордонд боллоо. Хуралд тус компанийн төрийн эзэмшлийн хувьцааг эзэмшигчийн эрхийг хэрэгжүүлэгч, саналын эрх бүхий төлөөлөгч болон компанийн удирдлагууд оролцов.
Хувьцаа эзэмшигчдийн ээлжит хурлаар “Эрдэнэс Тавантолгой” ХК-ийн 2023 оны үйл ажиллагааны болон санхүүгийн тайлан, аудитын дүгнэлт, ноогдол ашиг мөн компанийн дүрэмд оруулах өөрчлөлт зэрэг асуудлуудыг хэлэлцлээ.
“Эрдэнэс Тавантолгой” ХК 2023 онд 28.4 сая тонн нүүрс экспортолж, нийт нүүрсний экспортын 40.8 хувийг дангаараа бүрдүүлж Монгол Улсын төсөвт 2.8 их наяд төгрөгийн татвар хураамж төвлөрүүлсэн амжилттайгаар 2024 оны хувьцаа эзэмшигчдийн ээлжит хурлыг хийлээ.
Тайлангийн хугацаанд компанид Засгийн газраас онцгой дэглэм тогтоосноор засаглал, санхүүгийн сахилга бат сайжирч, нүүрс ачих, экспортлох, тээвэрлэх, хил нэвтрүүлэх үйл явц сайжирсныг компанийн ТУЗ-өөс онцлон тэмдэглэлээ.
Хуралд оролцогч хувьцаа эзэмшигчид компанийн ТУЗ болон удирдлагын бүрэлдэхүүнээс компанийн үйл ажиллагаа, ногдол ашиг хуваарилах болон бусад асуудлаар нээлттэй асуулт асууж хариулт авлаа.
Хувьцаа эзэмшигчдийн ээлжит хурлыг компанийн албан ёсны цахим хуудас болон бусад хэвлэл мэдээллийн хэрэгслээр шууд дамжуулан нийт хувьцаа эзэмшигчдэд нээлттэй, ил тод зохион байгууллаа гэж Эрдэнэс Тавантолгой ХК-иас мэдээллээ.
Нийгэм
Авто замын нүхэн эвдрэл засварлах ажил үргэлжилж байна
2024 онд нийслэлийн замын сангийн хөрөнгөөр нийт 17 байршилд хотын гол болон туслах гудамж, замуудыг шинэчилж байна.
Өнөөдрийн байдлаар 6 байршилд засвар, шинэчлэлтийн ажил үргэлжилж байна. Тодруулбал,
-Намьяанжүгийн гудамж буюу Зүүн 4 замаас урагш Нарантуулын уулзвар хүртэлх
-Амгалангийн зам буюу Ботаникийн эцсээс Улиастайн гүүр хүртэлх
-ХААИС-ийн уулзвараас зүүн тийш Буган халиун чиглэл
-Соёолжийн нүхэн гарцаас Нарантуулын уулзвар хүртэлх
-Хилчин гудамжны засвар шинэчлэлтийн ажил үргэлжилж байна.
Мөн хотын гол болон туслах гудамж, замын урсгал засвар буюу нүхэн эвдрэлийг засварлах ажлыг төвийн 6 дүүрэгт 201 байршилд хийнэ. Өнөөдрийн байдлаар замын нүхэн эвдрэлийг засварлах ажил 35 хувьтай үргэлжилж байна. Тодруулбал,
-Чингэлтэйн өргөн чөлөө,
– Галданбошогтын гудамжны авто зам,
-Хайлаастын зам,
-Ажилчны гудамжны авто зам,
– Хараагүйчүүдийн төвийн зам,
-Хасбаатарын гудамж,
-Ард Аюушийн гудамжны авто зам,
-Хүннүгийн гудамжны авто зам,
-Шархадны гудамжны авто зам,
-Натурын туслах авто зам,
-Олимпын гудамжны авто зам,
-Парисын гудамжны авто замын нүхэн эвдрэлийг засварлаж дууслаа.
Харин Нарны зам, Энхтайваны өргөн чөлөө, 22-ын товчооны авто зам, Өнөр хорооллын авто зам, Үйлдвэрчний гудамж, Хүнсчдийн гудамжны авто зам зэрэг 30 орчим байршилд авто замын нүхэн эвдрэл засварлах ажил үргэлжилж байна.