Оны 157  дахь өдөр, шинэ он хүртэл 208 хоног үлдлээ.

Өнөөдрийн тэмдэглэлт өдөр

Орос дахь Пушкины өдөр буюу Орос хэлний баяр

Өнөөдөр Орост тус орны утга зохиолын хэлийг үндэслэгч  гэж нэрлэгддэг А.С.Пушкины өдөр буюу төрөлх хэлнийхээ баярыг тэмдэглэж байна.Орос хэл нь дэлхийн томоохонд ордог славян хэл бөгөөд 166,2 сая хүн ярьдаг.Харин 110 сая хүний хоёрдагч хэл нь болдог байна. ОХУ-аас гадна Тусгаар тогтносон орнуудын заримд мөн Абхаз, Өмнөд Осетид албан ёсны хэл нь болдог. Мөн энэ өдөр НҮБ-ын байранд орос хэлэнд зориулсан албан ёсны арга хэмжээтэй.

Сонирхолтой түүх

Цахилгаан индүү патент авчээ

Генри Силийн  төхөөрөмжөөс өмнө индүүг ширмээр зутгаж түүнийг пийшэн дээр халаадаг байлаа. Европт XIX зууны хоёрдугаар хагаст хийн эсвэл шингэн түлшээр ажилладаг индүүнүүд хийгдэв. Гэсэн ч галын аюултай байлаа.Анхны цахилгаан индүүний халууныг тохируулагч нь байнга шатаж хувцас түлдэг гажигтай байсан юм. 1920 онд термостат удирдлагатай индүү гарч иржээ. ХХ зууны дундуур ууршилт гаргах төхөөрөмжтөй индүү бүтээгдсэн байлаа. Дараа нь индүүний хувьсгал эрчимтэй явагдсан билээ.

“Тетрис” төрөв

1984 – “Тетрисийг” зөвлөлтийн программчин Алексей Леонидович Пажитнов зохиожээ.Пажитнов тэр үед Зөвлөлтийн ШУА-ийн Тооцоолон бодох төвд хиймэл  ой ухаан, хэл таних асуудал дээр ажиллаж байхдаа ажлаа урагшлуулахын тулд элдэв  тоглоом туршиж байв. Дүрс нь дөрвөн сегментээс бүрэлдсэн “тетрамино” ба өөрийнх нь дуртай спорт “теннис” хоёроос “Тетрис” нэрийг нь гаргажээ. Анх шинэ тоглоомынхоо хувилбарыг тэр хамтран ажиллагч нартаа 1984 оны зургаадугаар сарын 6-нд үзүүлжээ.Сурагч түүхдүүд уг тоглоомыг  эхлээд Москвад дараа нь дэлхийд тараасан гэдэг. Тетрис тоглох цахим төхөөрөмж 1985 онд гарч ирсэн. Түүгээр мөнгө олж болохыг ойлгосон Зөвлөлтийн дарга нар Пажитновыг  гадаад худалдааны «Электроноргтехника» нэгдэлд шилжүүлэв. Зөвлөлтийн компани бие даан эрхийг нь худалдаад зохиогчийг нь мартжээ. 1989 онд 30 сая Game Boy Tetris зарагдсан нь түүнд орлого оруулсангүй  Тэр 1991 онд АНУ-д цагаачлан 1996 онд Тетрис компани байгуулсны дараа лицензийн ашиг түүнд ирэх болов.

• Тетрисийг  албан ёсоор урлагийн бүтээл гэж зарласан ба 1984 оны  тоглоомын хуулбар нь Нью-Йоркийн Орчин үеийн урлагийн музейд тавигдсан байгаа.
• Та хэзээ ч энэ тоглоомыг төгсгөж чадахгүй. Зохиогчид нь тоглоомын үр дүнг хоёр долоо хоногийн дараа тэглэгдэж байхаар зохиожээ.
• Тетрисээс болоод Фейз Чопдат шоронд дөрвөн сар суужээ. Тэр Манчестер руу нисэж байдаа тоглоомоо унтраахаас татгалзсан ба тэр нь Гиннессийн номонд бүртгэгджээ.Ер нь энэ тоглоом уг номонд есөн удаа  бичигджээ.

Өнөөдөр түүхэнд

1761- М.В. Ломоносов Сугар гарагийг нарны наагуур өнгөрөхийг ажиглахдаа түүнийг агаар мандалтайг нээжээ.

1816- АНУ-ын зүүн хэсгээр цас оров. Тэр зун цас хэд хэдэн удаа оржээ.

1850- Ливай Страусс өөрийн хөх жийнсийнхээ эхнийхийг гаргав. Өмд дороо зарагдсан байв. Ливай түүний хүргэн хоёр Сан-Франческод  дэлгүүрээ нээв. 1853 онд  Страусс “Levi Strauss & Co.” компаниа байгуулжээ. Дарвуулын даавууны оронд “деним” гэх зөөлөн даавуугаар өмдөө оёх боллоо. Тэр нь Ним хотынх гэсэн үг ажээ

1922- Ардын Комиссаруудын зөвлөлийн зарлигаар Хэвлэл утга зохиолыг хянах газрыг байгуулжээ. Главлит гэх цензур  гар бичмэлийг танаж орос ба гадаадын уран зохиолд  марксист урьдчилсан үгийг бичдэг үүрэгтэй байв.

1942 – Синтетик материалаар хийгдсэн анхны шүхрээр  буулт хийжээ.

1995 – Эмэгтэйчүүдийн хөлбөмбөгийн дэлхийн аваргын тэмцээнд Норвеги Нигерийн багийг 8:0 харьцаатайгаар хожин дээд амжилтыг давтлаа.

1996 – Лондоны амьтны хүрээлэнгийн байранд Доминик О’Брайен гэдэг залуу хольсон хөзрийн байрлалыг 38,29 секундын дотор санасан дээд амжилт тогтоожээ.