АН-ын ҮБХ-ын гишүүн Д.Мөнх-Эрдэнэ намын дарга С.Эрдэнэд “залуучуудыг үзэл бодлоор нь биш мөнгөөр уралдуулахаа болих”, 100 саяа тушаасан гишүүдийнхээ нэрсийг ил болгохыг шаардсан шаардах бичиг хүргүүлж байгаа талаар мэдээлэл хийлээ.
Тэрбээр “Сонгуульд нэр дэвшигчдийг үзэл бодлоор нь уралдуулах ёстой, гэтэл С.Эрдэнэ дарга мөнгөөр нь уралдуулж байна. Үндэсний аудитын газар сонгуулийн зардлын дээд хэмжээг тогтоосон. Гэтэл манай аймагт 398 буюу 400 сая төгрөг баталсан. Үүгээр С.Эрдэнэ дарга хоёрдугаар шатны гэрээг хүчээр хийлгэсэн. 100 хүний 100 сая төгрөг гээд нийт 10 тэрбум төгрөгөөр нам сонгуулийн санхүү бүрдлээ гэж бодтол дахиад сонгуулийн зардал гэж гаргаж ирж байгаа юм. Дунд шатанд ахин мөнгө авна гэж гэрээ нууц байгуулсан. Гэрээ байгуулахгүй бол дэвшүүлэхгүй гэсэн. Нийт 400 саяын 300-г нь тушаачихаад мандатаа авч чадахгүй бол яах вэ гэсэн “хохичино” гэж байгаа юм.
60 тэрбумын схемийн хоёрдугаар хувилбарыг С.Эрдэнэ дарга хэрэгжүүлж байна. Сонгуулийн тухай хууль,Үндсэн хуульд сонгууль зарлагдсанаас хойш хандивын дансаа нээж хуулийн дагуу хандиваа цуглаалж,сонгуулийн дараа аудитад тайлагнадаг. Гэтэл манай С.Эрдэнэ дарга нууц гэрээг төрийн эрх мэдлийг хууль бусаар авах гэж байгаа юм шиг хүч түрэн байгуулсан. ҮБХ-ын 100 гишүүнээс 51 хүн нь С.Эрдэнэ даргын ойр дотны хамаарал бүхий хамаатан садан байдаг. Хурал болгоноор 51 хүн хүч түрээд, хурал дуусахад баахан мөнгөний схем баталдаг.
Нам дээр нэг 2-3 тэрбум төгрөг цуглардаг боловч ҮБХ-ийн гишүүд юунд зарцуулж байгааг нь мэдээллэдэггүй. Үүнийг мэдээл гэсэн шаардлагыг хүргүүлж байна. Манай намын байр болох “Шонхор” тауэр С.Эрдэнэ даргын нэр дээр байдаг. Гэтэл бүх урсгал зардлыг намынхан гаргадаг. Намын байр өнгө ороод байдаг, нам өнгө ордоггүй ээ. Тэр дунд шатны дарга нарыг шууд томилдог болсон. Энэ нь намын дотор хагарал бий болгож байна. Үгээ хэлэх гэхээр хөөнө, тууна гэж загнадаг. Намайг шүүмжиллээ гээд сануулга өгсөн. Би 40 гаруй гишүүнтэй цуг ороод “Мөнгөний уралдаанаа зогсоо” гэдэг шаардлагыг тавьсан. Гэтэл хүргэн хүү нь “Манай хадам аав руу битгий дайраад бай” гэж хэл амаар доромжилсон. АН өнөөдөр гэр бүлийн нам болчхож. Намын дарга өөрийн хамаатан саднаа нэр дэвшүүлэх гэж байна. Тиймээс би гурван шаардлага тавьж байна. Ажлын гурав хоногийн дотор хариу өгч ҮБХ-ныхоо гишүүдийг зарлахгүй бол АТГ, ТЕГ, Хүний эрхийн үндэсний комисс, цагдаагийн байгууллагад хандана” хэмээв.