“Зүрхэнд шивнэсэн үг” уран сайхны кино  үзэгчдийн сэтгэлийг хөдөлгөсөөр ирсэн.  Нэр алдартай жүжигчидтэй энэ зэрэгцэн өөрийн дүрийг гайхалтай бүтээж чадсан бяцхан охиныг үзэгчид  кино гарах тоолонд өр зүрхнийхээ угаас хайрлах нь бий.  “Мөн ч их хүлээсэн дээ, Ээж хэлээрэй гэсэн юм” хэмээгээд гүйн одох  бяцхан охин.  Энэ л дүрийн эзэн, “Тэрлэг” брендийн автор  Б.Эрдэнэцэцэгийг зочин хоймортоо урилаа.

“Зүрхэнд шивнэсэн үг” кинонд  хэдэн настай тоглосон бэ?

Би  найман настай байсан.  Тэр л дүрээрээ Монголын ард түмний сэтгэлд үлдэж чадсандаа баяртай явдаг.  Кино урлагийн гайхамшиг гэж энэ л байх.   Хүмүүс  хараад л кинонд тоглосон охин мөн үү. Багын чинь төрх  өөрчлөгдөөгүй байна гэдэг.

 Кинонд тоглох эрхээ хэрхэн авч байв?

– Монголын Хүүхдийн ордны дугуйлангийн сурдаг байсан маань  дүр бүтээхэд их хэрэг болсон. Дээр нь миний ээжийн хичээл зүтгэл кино урлагт хөл тавиулсан.   Кинонд тоглох хүүхдүүдийг сонгон шалгаруулж байгаа тухай  Ариунзаяа багшаасаа сонсоод очтол шалгаруулалт дууссан байсан. Ээж бид хоёр хожимдож очсон хэрэг.  Комиссынхонд  учир байдлаа хэлээд “Намайг шалгаад өгөөч ээ” гэж гуйсан.  О.Бат-Өлзий ах, С.Сарантуяа эгч хоёр  “Чи уйлж чадах уу, морь унаж чадах уу” гэж асууж байсныг санаж байна. Миний дүрийг хүмүүс магтаж байгаа нь кино багийнхны хичээл зүтгэл гэж би бодож, тэдэндээ ямагт талархаж явдгийг минь дамжуулж өгөөрэй.

-Тэр үед киноныхоо агуулгыг ойлгож байсан уу.   “Мөн ч их хүлээсэндээ гэсэн шүү. Ээж хэлээрэй гэсэн юм” гэдэг үгийн цаад мөн чанарыг танд  маш сайн  ойлгуулж чадсан  учраас үзэгчдийн сэтгэлд  хоногшиж үлдсэн болов уу?

-Кино нь зохиол сайтай, найруулагч их мундаг хүн байсан.  Дэлгэцнээ гараад олон жил болсон байна.   Жинхэнэ жүжигчидтэй хамтарч, тэдний үг сургаалыг сайн биелүүлсэн учраас дүр маань амьд болсон хэрэг. Тэдний хэн нь ч намайг загнаж байгаагүй.   О.Бат-Өлзий ах намайг байнга үүрч явдаг байж билээ.

 Зураг авалтын үед  хамгийн их ажиллагаа шаардсан хэсэг нь юу байв?

-Ээж  өөд болсон тэр агшинд өнчирч үлдэж буй охины дүрийг гаргах хамгийн хэцүү байсан.  “Миний ээжийг үхсэнийг нь мэдээд ирээ юу” гэж хэлдэг хэсэгт олон хүний хичээл зүтгэл орсон.  Одоо ч  киногоо үзэх бүртээ тэр л агшныг   мэдрэх хэцүү байдаг. Үзэх бүртээ уйлдаг.

 Ээжтэйгээ голоос  ус зөөж байгаа тэр  мөч хамгийн аз жаргалтай үе. Гэвч хяруун дундуур   хөл нүцгэн явах нь  хотын хүүхдэд амаргүй байсан болов уу?   

-Тухайн үед  маш  их хэцүү санагдаж  байсан. Хөдөөгийн эгэл боргил амьдралыг мэдэхгүй жаахан охин майханд хонох, өвсөн дээр хөл нүцгэн гүйх зэрэг  халширмаар зүйл байсан.  Сараа ээжийнхээ хайр энхрийлэлд тэр бүхнийг ажрахгүй давсан.

–

.

-Одоо хаана, юу хийж байгаа вэ?

-Гурван жилийн өмнө эх орондоо ирээд  “Тэрлэг” брендээ байгуулсан. Монгол дээл дагнан оёдог болохоор хүмүүс анддаггүй юм. Монгол туургатнуудын  зорьж ирдэг дэлхийд танигдсан бренд болгохын төлөө хичээн ажиллаж байна даа.