Монгол Улс Азийн хөгжлийн банктай Covid-19-тэй тэмцэх, хүртээмжтэй боловсролыг дэмжих төслийг санхүүжүүлэх гэрээнд гарын үсэг зурлаа. Монгол Улсын Засгийн газар болон Азийн хөгжлийн банк шинэ төрлийн коронавирусийн халдварын цар тахлын эсрэг авч хэрэгжүүлж байгаа хариу арга хэмжээг дэмжих болон хөгжлийн бэрхшээлтэй хүүхдүүдийг ерөнхий боловсролын сургууль, цэцэрлэгт тэгш хамран суралцуулах зорилготой төслүүдийн буцалтгүй тусламжийн гэрээнүүдэд тус тус гарын үсэг зурав.

Гэрээнд АХБ-ийг төлөөлж Монгол Улсыг хариуцсан захирал Павит Рамачандран Монгол Улсын Засгийн газрыг төлөөлж Сангийн сайд Ч.Хүрэлбаатар нар гарын үсэг зурлаа. Монгол Улсын цар тахлын эсрэг авч буй арга хэмжээг дэмжих 1,5 сая ам.долларын буцалтгүй тусламжийг энэ оны 5 сард олгосон 1 сая ам.долларын буцалтгүй тусламжийн нэмэлт болгон Япон Улсын Засгийн газрын санхүүжилттэй Ази Номхон далайн гамшгийн эсрэг хариу арга хэмжээ авах сангаас олгож байгаа бол 2 сая ам.долларыг  тэгш хүртээмжтэй боловсролыг дэмжих буцалтгүй тусламжийг АХБ-ны дэргэдэх Ядуурлыг бууруулах Японы сангаас олгож байна.

Монгол Улсад өнөөдрийн байдлаар 0-18 насны хөгжлийн бэрхшээлтэй 11,606 хүүхэд байдаг ба төслийн хүрээнд хөгжлийн бэрхшээлтэй хүүхдийг тэгш хамруулан ерөнхий боловсрол эзэмшүүлэх боломжийг бүрдүүлэх, ингэхдээ эхний ээлжид Дархан-Уул, Дорнод, Дундговь аймгууд болон Сонгинохайрхан дүүргийн 4 сургууль, 4 цэцэрлэгийн дэд бүтцийг сайжруулж, тэгш хамран сургах боловсролын үйлчилгээний чадавхыг бэхжүүлэн, тэгш хүртээмжтэй боловсролыг дэмжих нөөцийг сайжруулж, олон нийтийн оролцоо, мэдлэгийг сайжруулах чиглэлээр ажиллана.

Ингэснээр хөгжлийн бэрхшээлтэй хүүхдүүд үе тэнгийнхээ бусад хүүхдүүдтэй хамт ердийн сургууль, цэцэрлэгт тэгш хамрагдах боломж бүрдэж боловсрол, нийгэм сэтгэл зүйн бодитой өгөөжийг хүртэх юм.

Монгол Улс Covid-19 цар тахлыг дотооддоо тархаахгүйн тулд тохиолдол бүрийг хяналтад авч, хөл хорио тогтоох хатуу арга хэмжээнүүдийг амжилттай хэрэгжүүлсэн. Covid-19-ийн эмчилгээнд нэн шаардлагатай яаралтай тусламжийн үйлчилгээ болон эрүүл ахуйн шаардлага хангасан тусгаарлах байрны хүрэлцээг нэмэгдүүлэх, улмаар цар тахлын нөхцөл байдал хүндрэх тохиолдол эрүүл мэндийн салбарын нөөц, бэлэн байдлыг хангах шаардлага хэвээр байна. Үүнтэй холбогдуулж 1,5 сая ам.долларын буцалтгүй тусламжийг PCR  шинжилгээний лабораторид шаардлагатай 19 ширхэг тоног төхөөрөмж , нэн чухал хэсэг болох хүчилтөрөгчийн эмчилгээг бүрэн хийх зориулалттай хүчилтөрөгчийн үйлдвэр байгуулахад шаардлагатай 4804 ширхэг тоног төхөөрөмж иж бүрэн хэрэгслийг худалдан авахад зарцуулах юм. АХБ-ны энэхүү дэмжлэг нь Монгол Улсын Засгийн газарт үзүүлж буй Covid-19-ийн эсрэг авах арга хэмжээний багц дэмжлэгийн нэг хэсэг юм.