Цар тахлын улмаас бизнесүүдийн үйл ажиллагаа саатсан ч оны эхний 10 сард суудлын автомашины импорт 46.3 мянга орчим болж, жилийн дүнгээр 24.1 хувиар буурсныг Гаалийн статистик харуулж байна.

Харин үнийн дүн нь 245.4 сая ам.доллар болж, 34.3 хувиар буурчээ. Өөрөөр хэлбэл үнийн дүн нь тоо хэмжээнээс илүү эрчтэй буурсан байгаа нь хямд үнэтэй автомашины импорт нэмэгдсэн байж магадгүй гэж үзэхээр байна. Үүнийг улсаар нь задлаад харвал 82.3 орчим хувийг нь Японоос, 4.2 хувийг нь Австралиас, 3.7 хувийг нь Германаас импортолжээ.

НҮБ-ын Байгаль орчны хөтөлбөрийн судалгаанд хуучин автомашины импорт хэт өндөр байгааг онцлоод байгаа юм. Ялангуяа Япон улсын хосолмол хөдөлгүүртэй хуучин автомашиныг монголд хамгийн ихээр оруулж ирж буйг судалгаа харуулж байна. Тэр дундаа насжилт өндөртэй, хуучин автомашин гол асуудал болоод байгаа юм.

Одоогоор нийт бүртгэлтэй автомашины 55 хувийг 10-аас дээш жилийн насжилттай хуучин автомашин бүрдүүлж байгааг “Мада” ТББ-ын судалгаа харуулж байна.

Хосолмол хөдөлгүүртэй хуучин автомашины импортод онцгой албан татвар, агаарын бохирдлын татвар ногдуулдаггүй нь үүнд голлон нөлөөлж буйг НҮБ-ын тайлан дурджээ.