Х.ӨЛЗИЙ

Английн зүүн өмнөд нутаг, нийслэл Лондон хот ороод коронавирусын цар тахлын шинэ хэлбэрийн тархалт аюултай байдалд хүрсэн тул хөл хорионы хамгийн хатуу хэлбэр болох дөрөвдүгээр зэргийн хязгаарлалтад энэ сарын 20-ноос эхлэн шилжлээ гэж Их Британийн Ерөнхий сайд Борис Жонсон мэдэгдсэн байна.
Ийнхүү коронавирусын мутанд орсон шинэ хэлбэрээс үүдээд хатуу хөл хорио тогтоосон нь Лондонгийн иргэд нийслэл хотыг бөөнөөрөө орхин гарахад хүргэлээ гэж The Daily Mail хэвлэл бичжээ.
Хэвлэлд бичсэнээр бол өвчний тархалт өндөрссөн хотын иргэд Лондонг орхихоор хотын галт тэрэгний буудлуудыг дүүргээд байгаа бол хотоос гардаг гол гол авто замуудад бөөн түгжрэл үүсчээ.
Их Британийн эрх баригчид үүний өмнө коронавирусын шинэ хэлбэр ердийнхийгөө бодвол халдварлах чадвар нь 70 хувь илүү учраас хүн ард илүү их болгоомжтой байх хэрэгтэй гэж анхааруулж байсан юм.
Дэлхийн эрүүл мэндийн байгууллагын мэдээлж байгаагаар бол Covid-19-ийн энэ шинэ хэлбэр нь өмнөхөөсөө илүү хурдан халдварлан тархдаг болохоос биш энэ нь үхлийн аюултай гэсэн үг биш гэнэ. Мутацад орсон энэ шинэ коронавирусэд өнөөдөр бүтээгээд байгаа вакцин хэрхэн нөлөөлөхийг эрдэмтэд яг тодорхой баталж чадаагүй байна.
Энэ шинэ хэлбэрийн коронавирус мөн Нидерланд, Дани, Австрид илэрсэн гэж Дэлхийн эрүүл мэндийн байгууллага мэдээлж байна. Энэ шинэ халдварыг эх орондоо нэвтрүүлчихгүйн тул Европын улс орнууд ороод нийт 50 гаруй улс Их Британиас тээврийн харилцаагаа зогсоогоод эхэлжээ.
Европын холбоо ойрын үед Их Британитай тээврээр харилцах асуудлаар шинэ дүрэм боловсруулна гэж Францын эрх баригчид мэдээлжээ. Ийн Британи руу улс орнууд нислэг үйлдэхгүй байгаагаас Хатан хаант улс үндсэндээ бүрэн бүслэлтэд ороод байна. Европын орнууд дээр нэмээд Энэтхэг, Хонконг ч тус улс руу нисдэг нислэгээ зогсоожээ. Францаас Английг зорьдог Ла Маншийн хоолой доогуурх галт тэрэгний хөдөлгөөн ч зогссон байна.
Европын холбоо хариуцсан францын сайд Клеман Бон “Бид Их Британитай тээврийн харилцаагаа 48 цагаар зогсоолоо. Энэ хугацаанд Европын холбооны бүх орон Британитай харилцдаг харилцаагаа зохицуулах ёстой. Манай ард иргэд энэ хугацаанд Нэгдсэн хатан хаант улсаас Зул сарын баяртаа эсэн мэнд, аюулгүй эргэн ирэхэд зориулсан механизм бүрдүүлэх нь бидний үүрэг” гэж тэр онцолжээ.
Их Британид коронавирусын цар тахал эхэлснээс хойш өнөөдрийн байдлаар 2 040 147 хүн энэ халдвараар өвчилж 67 401 хүн нас бараад байгаа юм.