Х.ӨЛЗИЙ

Европын улс орнуудад коронавирусын халдвар тархах нь эрс өссөн учир Европын холбооны гишүүн улсууд арга барилаа өөрчлөн хатуу хөл хорионд шилжиж эхэллээ.
Францын ерөнхийлөгч Эммануэль макрон өнгөрөгч 2020 оны арванхоёрдугаар сарын 30-наас эхлэн улс орон даяараа нэг сарын хөл хорио тогтоосон байна. Цар тахлын хоёр дахь давалгааг тогтворжуулахад чиглэсэн энэ арга хэмжээний хүрээнд сургууль цэцэрлэгүүд, зайлшгүй хэрэгцээний бүтээгдхүүн борлуулдаг хүнсний дэлгүүрүүд хэвийн ажиллаж бусад бүх байгууллага хаалттай байх юм байна. Францад өдөр тутам коронавирусын 40-50 мянган тохиолдол шинээр бүртгэгдэж байна гэж Макрон ард түмэндээ хандаж телевизээр хэлсэн үгэндээ тэмдэглэжээ. Зарим бүсийн эмнэлгүүд өвчтөнөөр дүүрээд байгаа болохоор цэргийн болон арилжааны нисэх хүчнийг ашиглан өвчтөнүүдийг нэг бүсээс нөгөө рүү шилжүүлэн зөөж байгаа юм байна.
Германы Засгийн газар мөн зоогийн газар, баар, кафе, кинотеатр, театр үзвэрийн газруудыг нэг сарын хугацаатайгаар хаах шийдвэр гаргасан байна. Тус улсад нэг хоногт хамгийн олон буюу 15 мянган хүн коронавирусын халдвар авсан нь тогтоогдсоны дараа Холбооны Эрүүл мэндийн яам ийм шийдвэр гаргасан байна. “Энэ онцгой нөхцөл байдлаас гарахын тулд бид одоо л чардайх ёстой” гэж ХБНГУ-ын канцлер Ангела Меркель хэлжээ.
Чехийн Засгийн газар бүх нийтийн хөл хориогоо чангатгаж оройн 21:00 цагаас өглөөний 06:00 цаг хүртэл хөл хорионы цаг тогтоосон байна. Энд хоногт өвчлөгсдийн тоо 15 мянга давсан учраас дэлгүүр, зоогийн газар, сургууль цэцэрлэгүүдийг бүгдийг хаажээ.
Испанид шинэ хориг тогтоож зургаагаас илүү хүн нэг дор цугларахыг хориглосон байна. Испанийн ерөнхий сайд Педро Санчес “Бид маш ноцтой нөхцөл байдалд амьдарч байна. Энэ бол сүүлийн 100 жилд тохиосон эрүүл мэндийн хамгийн ноцтой хямрал” гэж Засгийн газрын хуралдааны дараа хийлгэсэн мэдээлэлдээ дурдсан байна.
Швейцарьт бас хөл хорио тогтоож зоогийн газар баарууд оройн 23:00 цагт хаалгаа барих болж байна. Ийм хориг хэдий хүртэл үргэлжлэхийг заагаагүй гэнэ.
Белги, Их Британи, Нидерландад цар тахлын дэгдэлт ихэсч байгаа учраас хөл хориогоо чангатгаад байна.
“Цар тахлын хоёр дахь давалгаа эхэлчихлээ. Зул сарыг энэ жил огт өөрөөр тэмдэглэлээ” гэж Еврокомиссын ерөнхийлөгч Урсула фон дер Ляйен хэлсэн байна.
Хамгийн сүүлийн мэдээгээр Европын улс орнуудад хоногт 202.9 мянган хүн коронавирусын халдвар аваад байгаа юм. Цар тахал дэлгэрснээс хойш Европт нийт 250 гаруй мянган хүн COVID-19-ийн улмаас нас баржээ.