Оросын Авлигын эсрэг санг үндэслэгч, Путиныг  шүүмжлэгч блогч Алексей Навальныйг суллахыг шаардаж байгаа Европын хүний эрхийн шүүхийн шаардлага нь оросын хууль тогтоомжид нийцэхгүй, ямар ч үндэслэлгүй учраас биелүүлэх боломжгүй юм гэж ОХУ-ын Хуульзүйн сайд Константин Чуйненко мэдэгдсэн байна.

Европын хүний эрхийн шүүх энэ хоёрдугаар сарын 16-нд Оросын засгийн газарт хандаж энэ сарын эхээр залилангийн хэрэг гэгчээр урьдчилан хориод байгаа Алексей Навальныйг суллахыг уриалж тогтоол гаргасан юм. Уг тогтоолоо “энэ арга хэмжээ нэн даруй хүчин төгөлдөр болно” гэжээ.

Харин Оросын хуульзүйн яамны тэргүүн Константин Чуйненко Европын хүний эрхийн шүүхийн шаардлагыг хэрэгжүүлэхгүй байх хэд хэдэн шалтгаан байна гэжээ.

“Нэгдүгээрт, Энэ бол тусгаар улсын шүүх засаглалын үйл ажиллагаанд хөндлөнгөөс бү­дүүлгээр оролцож байгаа хэрэг. Хоёрдугаарт, Энэ шаардлага эрхзүйн үндэслэлгүй, энэ шаардлагыг нь биелүүлэх нэг ч баримт, эрхзүйн хэм хэмжээ агуулаагүй байна” гэж сайд сэтгүүлчдэд мэдэгдсэн байна.

Түүнийхээр бол Европын шүүх энэ бүх нөхцөл байдлыг ойлгож байгаа ч Европын зөвлөлтэй харилцаа хурцатгаж болзошгүй ийм улс төрийн шийдвэр гаргасан байлгүй гэнэ.

Сайд бас энэ тогтоолыг хэрэгжүүлэх нь харин ч Европын хүний эрхийн шүүхийн өөрийнх нь хуулийг дээдэлнэ гэсэн үйл ажиллагааны нь зар­чимтай зөрчилдөх болно гэжээ.

Авлигатай тэмцэх санг үндэслэгч Алексей Навальныйг Германд эмчлүүлж байгаад эх орондоо эргэж ирэхэд нь шууд нисэх онгоцны буудлаас баривчлан саатуулаад энэ хоёрдугаар сарын 2-ны өдөр Москвагийн Симоновын шүүх тэнсэн харгалзах ялыг нь биеэр эдлүүлэх ял болгон өөрчилсөн юм. Шүүхийн тогтоолд тэмдэглэснээр бол шүүгдэгч нь тэнсэн харгалзах шийдвэрийг 60 орчим удаа зөрчиж, олон удаа захиргааны шийтгэл хүлээсэн гэнэ.

Шүүх Алексей Навальный, түүний дүү Олег хоёр 30 гаруй сая рублийг “Ив Роше” компаниас залилан авсан, өөр бас нэг байгууллагад хэвлэлийн бүтээгдхүүн нийлүүлнэ гэж хэт өндөр үнээр гэрээ хийсэн гэж ийн ялласан юм.

Алексей Навальныйг Орост эргэж ирж, түүнийг баривчилсны дараагаар “Путины ордон” гэдэг нэвтрүүлэг олон нийтийн сүлжээнд тарснаар оросын бүх хотуудад эрх баригчдын авлигыг эсэргүүцэж, Алексей Навальныг дэмжсэн цуглаан болж хэдэн зуун мянган хүн оролцсон юм. Эрх баригчид цуглаанд оролцогсдоос бараг 4000 хүн баривчилж, нэг хэсгийг нь шүүхээр оруулан шийтгэсэн дотор ахлах ангийн сурагчийг ч 14 хоногоор саатуулсан явдал гарчээ.

#МонголынМэдээСонин #ЯрилцахТанхим