Дэлхий дахинд
НҮБ-ын Ерөнхий ассамблей Израил-Хамасын дайны асуудлаар ээлжит бус чуулган хуралдуулна
Израил-Хамасын дайнд Израилын тал агаарын цохилтоо өргөжүүлснээс Палестины энгийн иргэдийн хохирол нэмэгдсээр байна. Дайныг өргөжүүлэхгүйн төлөөх олон улсын дипломат ажиллагаа явж байгаа ч Израил Газын Зурваст Хамасыг үндсээр нь устгах зорилгоор хуурай замын дайны ажиллагаа явуулахаар бэлтгэлээ хангаж, Газын Зурвасын иргэдийг өмнөд бүс рүү нүүн шилжихийг дахин шаардсаар байна. НҮБ-ын Ерөнхий ассамблей энэхүү дайны эсрэг авах хариу арга хэмжээг хэлэлцэхээр энэ пүрэв гарагт ээлжит бус чуулган хуралдуулахаар боллоо. НҮБ-ын Аюулгүйн Зөвлөл өнгөрсөн 7 хоногт шуурхай хуралдаан хийсэн ч тогтоол баталж чадаагүй. Иймээс Йордан болон Арабын бусад улсуудын хүсэлтээр Ерөнхий Ассамблейг ээлжит бусаар хуралдуулахаар болжээ.
НҮБ-ын ерөнхий ассамблей хамгийн сүүлд өнгөрсөн онд Орос Украинд дайн эхлүүлсний дараа ээлжит бус чуулган хуралдуулж байсан. Харин Палестины нөхцөл байдлын талаар сүүлийн таван жилд анх удаа ээлжит бусаар хуралдах нь. Дэлхий дахины аюулгүй байдал, энх тайван байдлыг хангаж, хамгаалах үүрэгтэй Аюулгүйн зөвлөлийн 12 гишүүн нь уг тогтоолыг дэмжсэн ч байнгын гишүүн АНУ Израилын өөрийгөө хамгаалах эрхийн талаар тусгаагүй байна гэсэн үндэслэлээр тогтоолд хориг тавьсан. НҮБ-ын гишүүн 193 улсын аль нь ч Ерөнхий ассамблейн ээлжит бус чуулганд оролцох боломжтой. Олон улс орон байр сууриа илэрхийлэх төлөвтэй байгаагаас Арабын улсууд Газын зурваст хуурай замын дайны ажиллагаа явуулахаар бэлтгэж байгаа Израилын эсрэг шахалт үзүүлэх бололтой байгаа. Катарын Эмир Газын Зурваст дайны байдал өргөжих нь бүс нутаг болоод дэлхий нийтэд аюултай. Иймээс Израилд Палестинчуудын амийг үг дуугүй хөнөөх эрхийг ногоон гэрлээр өгч болохгүй гэж мэдэгдэж байна.
Одоогоор Израил Газын Зурваст зөвхөн агаарын цохилт өгч байна. Агаарын цохилтын хүрээг өмнөд бүс рүү тэлснээр өчигдөр гэхэд Палестины 140 гаруй энгийн иргэн амь үрэгдсэн байна. Дайны туршид Газын Зурваст амь үрэгдсэн Палестин хүний тоо 5087-д хүрсэн байна. НҮБ Газын зурвас руу оруулж байгаа хүмүүнлэгийн тусламж тэр дундаа эмнэлгийн тусламжийг саадгүй, таслахгүй оруулахыг уриалж байна. Одоогоор Газа руу хүмүүнлэгийн тусламжийг тасралтгүй оруулах зорилготой хэлэлцээ АНУ, Израил, Египет, НҮБ гэсэн дөрвөн талын дунд болж байна. Газа хотын нийт 24 эмнэлгийн 8 нь агаарын цохилтод өртсөн, түлш эрчим хүч, эм хангамжийн дутагдлаас болж үйл ажиллагаа явуулах боломжгүй болжээ.
Хамас бүлэглэл өчигдөр дахиад барьцааны хоёр хүнийг хүмүүнлэгийн үүднээс гэсэн тайлбартайгаар сулласан байна. Израилын тооцоолж байгаагаар Хамасын барьцаанд 220 орчим хүн байгаа юм байна. Америк барьцаанаас илүү олон хүнийг суллуулахын тулд Израилыг хуурай замаар дайны ажиллагаа явуулахаа түр азнахыг шахсан гэж хэвлэлүүд мэдээлж байгаа. Гэхдээ Байден Хамас барьцааны хүмүүсийг сулласны дараа гал зогсоох талаар хэлэлцээ хийнэ гэсэн байр суурь илэрхийлж байна.
Мөн цагаан ордон Израилын Хамастай хийж байгаа дайныг дэмжих зорилгоор Ойрх Дорнодод цэргийн хүчин чадлаа зузаатгаж байгаа гэсэн тайлбар хийжээ. Харин Америкийн стратегийн зэвсэг, цэрэг Ойрх Дорнодод нэмж ирж байгаад Иран улс ихээхэн дургүйцэж, Америкийн энэ үйлдэл Израил Хамасын дайныг өргөжүүлэх эрсдэлтэйг анхааруулсаар байна. Францын ерөнхийлөгч Израилтай эв санаа нэг байгаагаа илэрхийлэх зорилгоор Тел Авивд буужээ.
Тэрээр Палестинд мөн очих юм байна. Макрон дайныг бүс нутагт тараахгүй, барьцааны хүмүүсийг бүгдийг суллах, Израилд аюулгүй байдлын баталгаа гаргаж өгөх, хоёр тусдаа улс байх шийдлийг урагшлуулах гэсэн дөрвөн саналтай очсон байна.
Дэлхий дахинд
Кени улсад үерийн улмаас 71 хүн амь насаа алдаж, 110 хүн эмнэлэгт хүргэгджээ
Кени улсын Накуру мужийн Май Махиу хотын ойролцоо болсон үерийн улмаас 71 хүн нас барж, 110 хүн эмнэлэгт хүргэгдсэн гэж тус мужийн захирагч Сюзан Кихика өчигдөр мэдэгджээ.
Тус хотын үерийн далан сэтэрч, төмөр замын доогуурх гармаар дамждаг ус зайлуулах хоолой бөглөрснөөр хот үерт автжээ.
Үүний улмаас мод үндсээрээ булгарч, тээврийн хэрэгсэл болон байшингууд олноор урсаж, олон хүн амь насаа алдсан байна.
Аврах багийнхан үүссэн шавар, хог хаягдлыг цэвэрлэж байгаа бөгөөд амиа алдагсдын тоо нэмэгдэж болзошгүй байгаа аж.
Кени улсад гуравдугаар сараас хойш бороотой байгаа бөгөөд энэ хугацаанд 103 иргэн амиа алдаж, олон мянган айлыг нүүлгэн шилжүүлээд байна.
Түүнчлэн сүүлийн жилүүдэд орсон борооны нөлөөлөл олон газарт мал аж ахуй, газар тариаланг устгаж, өлсгөлөн, усны хомсдолд оруулаад байгаа талаар Засгийн газрын Хэвлэлийн төлөөлөгч Исаак Майгуа мэдэгдлээ гэж ОБЕГ-аас мэдээллээ.
Дэлхий дахинд
Японд газар хөдлөлтийн улмаас есөн хүн хөнгөн гэмтжээ
Дэлхий дахинд
АНУ-ын Ерөнхийлөгч асан Дональд Трампд холбогдох эрүүгийн хэргийн анхны шүүх ажиллагаа эхлэв
АНУ-д Ерөнхийлөгч асан Дональд Трампын эсрэг дөрвөн ч эрүүгийн хэрэг үүсгэн шалгаж байна.
Тэгвэл энэ хэргүүдийн эхнийх нь буюу хувийн мэдээллээ далдлах зорилгоор төлбөр хийсэн гэх хэргийн шүүх ажиллагаа Нью-Йоркийн шүүх дээр эхэлж байгаа тухай олон улсын хэвлэлүүд мэдээлж байна.
Шүүхийн ялын тогтоол гартал нэгээс хоёр сар үргэлжилж болзошгүй гэж тооцогдож байгаа энэ шүүх ажиллагаагаар өдгөө 77 настай Дональд Трампын 2016 оны Ерөнхийлөгчийн сонгуулийн өмнө насанд хүрэгсдийн киноны жүжигчин Сторми Дэниелс хэмээх эмэгтэйд дотно харилцаатай байснаа нууцлахыг даалгаж өмгөөлөгчөөрөө дамжуулан 130 мянган ам.доллар төлсөн, үүнийгээ ажил хэргийн нөхцөлийн дагуух хууль ёсны төлбөр мэтээр санхүүгийн хуурамч баримт бүрдүүлсэн хэрэгт өнгөрсөн оны гуравдугаар сард эрүүгийн хэрэг үүсгэсэн хэргийг хэлэлцэнэ.
Прокуроруудын зүгээс Дональд Трампын энэ үйлдлийг сонгуулийн боломжид нь нөлөөлж болзошгүй гэдэг үүднээс мэдээллийг нуун далдлахыг завдсан хэрэг гэж үзсэн.
Ирэх 11 дүгээр сард болох АНУ-ын Ерөнхийлөгчийн сонгуульд Бүгд найрамдах намаас нэр дэвших эрхээ долоодугаар сард болох намынхаа их хурлаас баталгаажуулахаар зэхэж байгаа Дональд Трамп харин өөрт нь тулгаж байгаа бүх гэмт хэргийг үндэслэлгүй гүтгэлэг гэж үгүйсгэдэг.
Тэрбээр шүүх танхимд орох үедээ ч гэсэн “Улстөрийн мөрдлөг хавчлага болж байна” гэдэг байр сууриа сэтгүүлчдэд илэрхийлжээ.
Үүнээс гадна экс Ерөнхийлөгчийг төрийн нууцын зэрэглэлтэй баримт бичгүүдэд хайхрамжгүй хандсан, 2020 онд өөрийн ялагдал хүлээсэн Ерөнхийлөгчийн сонгуулийн дүнг цуцлуулах санаархлаар үйлдсэн гэдэг өөр хоёр гэмт хэрэгт нийт 34 зүйл ангиар буруутгасан.
Сүүлийн хоёр нь, 2021 оны нэгдүгээр сард Капитолын ордонд дайран орж, хүмүүс амь эрсдэхэд хүргэсэн үймээн самууныг өдөөн турхирсан, нөгөө нь Жоржия муж улсад мөн тэндхийн сонгуулийн үйл явцыг тасалдуулахыг завдсан гэх хэргүүд юм.
Үүний зэрэгцээ АП-Чикагогийн ИС-ийн дэргэдэх судалгааны төв хамтран явуулсан судалгаагаар, гурван америк хүн тутмын нэг нь Трампын мөнгө шилжүүлсэн үйлдлээ нууцалсан нь хууль бус, өөрөөр хэлбэл, гэмт хэрэг мөн гэж үзжээ.
Мөн тал шахам хувь нь бусад гурван гэмт хэрэгт ч Дональд Трампыг ямар нэг байдлаар гэм буруутай гэсний дээр, бүх шүүх үйл явц тэгэхдээ прокурорууд болоод шүүгчид нь зөв шударга ажиллаж, үнэн зөв шийдвэр гарна гэдэгт төдийлөн итгэлтэй бус байгаагаа илэрхийлжээ.
-
Нийгэм3 цаг өмнө
Аюулт үзэгдэл, ослын 99 удаагийн дуудлагаар үүрэг гүйцэтгэжээ
-
Нийгэм3 цаг өмнө
Уламжлалт анагаах ухааны 7 их сургууль цөм төлөвлөгөөгөө нэгдсэн байдлаар тогтжээ
-
Нийгэм3 цаг өмнө
ОХУ-аас ирүүлсэн хүмүүнлэгийн тусламжийн үр тарианы тэжээлийг хүлээн авч, орон нутагт олголоо
-
Нийгэм3 цаг өмнө
Замын-Үүд сумын ойн барилдаанд Б.Орхонбаяр арслан түрүүллээ
-
Нийгэм55 мин өмнө
ЦЕГ: 350 хэргийг шүүхэд шилжүүлэх саналтай прокурорт хүргүүллээ
-
Улс төр21 мин өмнө
Монгол Улсын Ерөнхийлөгч У.Хүрэлсүх ээжүүдэд Алдарт эхийн одон гардууллаа
-
Нийгэм15 мин өмнө
Монгол Улсаас жүдо бөхийн 6 дахь Дэлхийн аварга төрлөө