Дэлхий дахинд
ОХУ, БНАСАУ хооронд зорчигч тээврийн шууд галт тэрэгний үйлчилгээг сэргээнэ
![](https://24barimt.mn/wp-content/uploads/2024/06/05c4d6c182d6688f6c5420b4e3327fcc_x3.jpg)
ОХУ, Умард Солонгос хооронд шууд зорчдог зорчигч тээврийн галт тэрэгний хөдөлгөөн цар тахлын үеэс зогссоныг бүрэн сэргээхээр болжээ.
Энэ галт тэрэгний үйлчилгээг дөрвөн жилийн дараа буюу ирэх долоодугаар сараас сэргээх гэж байна гэж Оросын Приморын хязгаарын захирагч Олег Кожемяко мэдээлснийг “Интерфакс” уламжилсан байна.
Оросын Владивостокоос Умард Солонгосын “Расон” боомт хооронд явдаг энэ галт тэрэгний үйлчилгээг ирэх сараас нээснээр зорчигчид болон аялагч жуулчид ая тухтай шууд аялах боломжтой болно гэж тэрбээр Владивостокт болсон Умард Солонгосын барааны үзэсгэлэнгийн нээлт дээр мэдэгдсэн байна.
Мөн Умард Солонгосын хүүхдүүдийг Владивостокт байдаг “Океан” хүүхдийн зусланд амраах бол, Приморын хүүхдүүд мөн Умардад очиж амарна гэж Олег Кожемяко ярьсан байна.
Оросын Приморын хязгаартай хил залгаа Умард Солонгосын тусгай бүс “Расон” хот хХтадын Зилин мужтай бас хил залгадаг. 1991 онд энэ бүс нутгийг эдийн засгийн онцгой бүсийн статустай болгосон юм байна.
Орос, Умард Солонгос хоорондох зорчигчийн галт тэрэгний шууд хөдөлгөөнийг нээх тухай энэ мэдээлэлтэй холбогдуулж өрнөдийн тоймчид Москваг Орос-Украины дайн эхэлснээс хойш Ази болон Африкийн орнуудтай эдийн засаг, аюулгүй байдал, дипломатын холбоо харилцаагаа мэдэгдэхүйц эрчимжүүлж байгааг тэмдэглэж байна.
Өнгөрсөн 7 хоногт Оросын Ерөнхийлөгч Владимир Путин Умард Солонгост сүүлийн 24 жилийн түүхэнд анхны айлчлалаа хийж, Москва-Пхеньяны харилцааг улам гүнзгийрүүлж, хоёр талын баримт бичгүүд, түүний дотор батлан хамгаалах салбарт хамтрах гэрээ хэлэлцээрүүд байгуулсан юм.
Ямартай ч хоёр улсын хоорондох төмөр замын шууд хөдөлгөөнийг сэргээж байгаа нь илүү нягт холбоо харилцааг илтгэж болох шинэ санаачилга бус, өмнө байсан харилцааг сэргээж байгаа алхам гэдгийг тоймчид дурдсан байна.
![24barimt.mn](https://24barimt.mn/wp-content/themes/zox-news/images/logos/logo-nav.png)
Дэлхий дахинд
“Adidas” компани ажилтнуудаа “их хэмжээний хахууль авсан” хэргээр шалгуулж байна
![](https://24barimt.mn/wp-content/uploads/2024/06/adidas-1024x576-1.jpg)
Олон улсын брэнд болох Адидас нь “Ажилтнууд сая сая еврогоор их хэмжээний хахууль авсан” гэх гомдлын дагуу Хятад дахь зарим ахлах ажилтнуудаа шалгуулахаар мөрдөн шалгах ажиллагаа эхлүүлсэн тухай мэдээлжээ.
Тус компани шүгэл үлээгчдийн гомдлыг хүлээн авсны дараа шууд мөрдөн шалгах ажиллагааг эхлүүлсэн гэж Financial Times ням гарагт мэдээлэв.
“Адидасын ажилчид”-ын бичсэн гэж таамаглаж буй нэрээ нууцалсан захидалд тус компанийн Хятад дахь салбарын хэд хэдэн ажилчдыг гадны үйлчилгээ үзүүлдэг, хамтран ажилладаг бизнес эрхлэгчдээсээ мөнгө авсан хэмээн бичжээ.
Мөн компанийн нэг хэлтсийнх нь ахлах менежерийг “хэдэн саяар нь бэлэн мөнгө, үл хөдлөх хөрөнгө гэх мэт биет зүйл” авсан гэж тусгажээ. Гэсэн ч тус захидалд хахууль авсан этгээдүүдийн нэрийг нь бичээгүй байна.
Нэрээ нууцалсан захидлын эзэд авлигын хэргийн талаар баттай нотлох баримт ирүүлээгүй ч тэд маш эмзэг, дотоод нууц асуудлын талаар маш сайн мэдээлэлтэй байна, Иймд бүрэн хэмжээний мөрдлөгийн ажиллагаа явуулах шаардлагатай гэж Financial Times мэдээлжээ.
Тус захидалд компанийн албан тушаалтнуудыг, тэр дундаа ахлах менежерийг маркетингийн төсөвтэй холбоотой авлига авсан гэж хятадын олон нийтийн сүлжээгээр нийтлэгджээ.
Адидас компани нэрээ нууцалсан гомдлыг хүлээн авснаа хүлээн зөвшөөрч, хөндлөнгийн хуулийн зөвлөхтэй хамтран энэ асуудлыг шалгаж байна.
Тус компани Ройтерс агентлагийн асуултын хариуд гаргасан мэдэгдэлдээ: “Манай компани хууль тогтоомж зөрчсөн байж болзошгүй мэдээллийг маш нухацтай авч үздэг бөгөөд бидний үйл ажиллагаа явуулж буй бүх салбар хууль эрх зүйн болон дотоод журам, ёс зүйн стандартыг дагаж мөрдөх үүрэг хүлээн ажилладаг” хэмээжээ. Мөн мөрдөн байцаалтын ажиллагаа дуусах хүртэл нэмэлт мэдээлэл өгөх боломжгүй гэж мэдэгдлээ.
Тус компани нь цар тахлын үеэр уналтад орсны дараа бизнесээ сэргээх зорилгоор Хятад дах салбарынхаа удирдлагын багыг 2023 онд өөрчилж байжээ.
Энэ оны эхээр тус компани Хятад дахь борлуулалтын өсөлтийг хоёр оронтой тоогоор нэмэгдүүлнэ гэж таамаглаж байна. Мөн компанийн Хятад дахь борлуулалт энэ жилийн эхний улиралд найман хувиар өссөн гэж тус компани өмнө нь мэдээлж байжээ.
Дэлхий дахинд
Японд аминд халтай стрептококкийн халдвар дээд үзүүлэлтэд хүрч нэмэгджээ
![](https://24barimt.mn/wp-content/uploads/2024/06/U4-Q7MOUCM-6QUZESJ-M7D9RLE-LP.jpg)
Японд хордлогот, шоконд оруулдаг хүнд хэлбэрийн стрептококк халдварын тохиолдол урьд үзэгдээгүйгээр өсжээ.
NHK-ийн мэдээлж байгаагаар, бактерийн энэ халдвар хурдацтай тархаж, аминд хүрэх халтай байна. А хэлбэрийн стрептококк бактериар үүсгэгддэг энэ халдвар ихэвчлэн 30, түүнээс дээш насныхны дунд гол тархаж буй юм байна.
“Махчин бактер” гэгддэг эсийг үхжүүлж, бас олон эрхтний үйл ажиллагааг доголдуулах эрсдэлтэй энэ өвчин агаар дусал, хүртэхүйн замаар халддаг. Чихрийн шижинтэй хүмүүс эрсдэлийн бүлэгт хамаардаг байна.
Японы халдварт өвчин судлалын үндэсний хүрээлэнгийн мэдээгээр, энэ оны эхнээс хойш зургаадугаар сарын 2-ныг хүртэлх хугацаанд энэ өвчнөөр өвдсөн хүний тоо 977-д хүрсэн, энэ нь өнгөрсөн оны мөн үеийнхээс 2.8 дахин өссөн, мөн өнгөрсөн жилийн туршид өвдсөн нийт хүний тооноос бас давсан байна.
Дэлхий дахинд
АНУ-ын сенатор Боб Менендезийг авлигын хэргээр шүүж байна
![](https://24barimt.mn/wp-content/uploads/2024/06/f8a80e3f4c48e54a975d5df208615496_x3.jpg)
АНУ-ын сенатор Боб Менендезийг авлигын хэргээр шүүж байх явцад түүний өмгөөлөгч нар түүний эхнэрийг тус хэрэгт буруутгахыг оролдсон ба шүүх хурал болсон өдрийн маргааш Боб Менендез эхнэрийгээ хөхний хорт хавдартай болохыг илчилсэн байна.
Боб Менендезийг Египет, Катарын засгийн газарт болон Нью Жерсигийн бизнесменүүдэд тусалсныхаа төлөө хахууль авсан, тэр дундаа алтан гулдмай авсан хэрэгт буруутгаж байгаа юм.
Боб Менендезийн эхнэр Надине Менендез нь уг хэргийн хамсаатан боловч түүнийг тусад нь шүүнэ гэв. Шүүгдэгч талын хоёр хоёулаа Боб Менендезийн карьерт нөлөөлж байгаа уг хэргийг үгүйсгэж байгаа.
Ноён Менендез пүрэв гаригт хийсэн мэдэгдэлдээ түүний 57 настай эхнэр нь хөхний хорт хавдрын 3-р зэрэгтэй гэсэн оноштойгоор мастэктомын мэс засалд орно гэж хэлжээ.
Тэрээр хэлэхдээ хатагтай Менендез нь түүнээс өөрийнх нь эрүүл мэндийн нөхцөл байдлын талаар нийтэд илчлэхийг хүссэн гэв. Учир нь хатагтай Менендезийг хэвлэлийнхэн байнга дагаж, сэтгүүлчид асуултаар булдаг тул тэрээр эрүүл мэндийн байдлаа нийтэд дэлгэхийг хүсчээ.
“Мэдээж бид өвчний байдал хүндрэх асуудалд санаа зовж байна” гэж сенатор нэмж хэлжээ.
Түүний авлигын хэргийг тангарагтны шүүгчид хэлэлцэж байх үед Холбооны мөрдөх товчооны ажилтан хэлэхдээ Нью-Жерси мужийн Энглвуд Клиффс дэх Менендезийн гэрт хийсэн ажиллагаагаар олдсон бүх бэлэн мөнгийг тоолохын тулд нэмэлт хүч дуудах шаардлагатай болсон гэв.
Холбооны мөрдөх товчооны ажилтан Аристотелис Кугемитросын хэлснээр тэд нийтдээ 486,000 долларыг (383,000 фунт) бэлэн мөнгөөр хураан авсан ба эдгээр бэлэн мөнгөнүүдийг байшингийн эргэн тойрон, булан тохой бүрд янз бүрийн зүйлд чихэж хийсэн байжээ. Жишээлбэл Burberry цүнх, бор цаасан уут, шар гялгар уут, хүрэм, жижиг хар цүнх, Тимберландын гутал зэрэг.
Ноён Кугемитрос шүүхэд хэлэхдээ “Та бүгдийн гэрэл зургаас харж байгаачлан олдсон мөнгөн дэвсгэртүүдийг гараар тоолоход хэтэрхий их байсан” гэв.
Мөн 0.02 кг (1 oz) жинтэй 11 ширхэг “мини” алтан гулдмай, тус бүр 1 кг жинтэй хоёр ширхэг алтан гулдмайг хураан авсан ба тэдгээрийг шүүгчдийн бүрэлдэхүүнд шилжүүлэн өгчээ.
Прокурорууд шүүх хурлын нээлтийн мэдэгдэлдээ 2006 оноос хойш сенатчаар ажиллаж байгаа ноён Менендезийг “хахууль авахын тулд ард түмнээсээ урвасан” гэж мэдэгджээ.
Түүний гэрээс олдсон бэлэн мөнгө болон алтан гулдмайг Египетийн албан тушаалтнууд Вашингтон дах улс төрийн ашиг сонирхлын зорилгоор бэлэглэсэн гэж тэд мэдэгджээ.
Прокурор Лара Померанц нь ноён Менендезийг энэ хэргийн хамсаатан Египет гаралтай Америк бизнесмен Ваэль Ханатай холбоотой эрүүгийн хэрэгт хөндлөнгөөс оролцож нөлөөснийхөө хариуд Мерседес Бенз машин авсан гэж буруутгасан.
Мөн хатагтай Менендезийг эдгээр хээл хахуулийн хэргүүдийн зуучлагч гэж буруутгаж байгаа юм.
Харин ноён Менендезийн өмгөөлөгч Ави Вайцман үйлчлүүлэгчээ авлига аваагүй, хууль зөрчөөгүй гэж мэдэгджээ. Тэрээр зарим алтан гулдмай нь хатагтай Менендезийнх байсан гэж нэмж хэлэв.
Шүүх хурлын үеэр ноён Вайцман бурууг сенаторын эхнэрт шилжүүлэхийг хичээж, түүний эхнэр нь түүнийг санхүүгийн нээлттэй бус байдалд байлгадаг байсан гэж хэлсэн ба хосууд тусдаа банкны данстай байсан гэв.
Ноён Менендезд бэлэн мөнгө, алтан гулдмай өгсөн хэрэгт буруутгагдаж буй хэргийн хамсаатнууд болох Ноён Хана болон Нью Жерсигийн үл хөдлөх хөрөнгө хөгжүүлэгч Фред Дайбес нар нь хатагтай Менендезийн олон жилийн дотны найзууд, мөн тэд дандаа хоорондоо бэлэг солилцдог байсан гэж тэдний өмгөөлөгч нар хэлжээ.
Ноён Ханагийн өмгөөлөгч Лоуренс Лустберг хэлэхдээ “Бэлэг болгоныг хахууль гэж битгий хэлээрэй” гэв.
Ноён Менендез Сенатын Гадаад харилцааны хороонд таван жил гаруй хугацаанд даргаар ажиллаж байх үедээ АНУ-ын гадаад бодлогод давамгай нөлөөлж байсан. Түүнийг яллагдагчаар татсаны дараа албан тушаалаас нь чөлөөлсөн.
Түүнийг хээл хахууль авсан, бусдын эд хөрөнгийг залилан мэхэлсэн, шүүхийн үйл ажиллагаанд саад учруулсан зэрэг 16 гэмт хэрэгт буруутгаж байгаа бөгөөд хэрвээ гэм буруутай нь тогтоогдвол хорих ялаар шийтгэгдэх юм.
Хатагтай Менендезийг хахууль, авлигын хэргээр долоодугаар сард шүүнэ.