Дэлхий дахинд
АНУ пуужингаас хамгаалах системээ цэргүүдийн хамт Израильд илгээх ховор шийдвэр гаргалаа
АНУ пуужингийн довтолгооноос хамгаалах THAAD (Terminal High Altitude Area Defence) системээ ажиллуулах цэргүүдийн хамт Израил улсад илгээх болсныг Пентагон өчигдөр зарлалаа.
Ийм арга хэмжээ авахаар төлөвлөж буй тухай мэдээ тарсны дараа Иран улсын гадаад хэргийн сайд сошиал хуудсаараа цэрэг, зэвсгээ Израилиас хол байлгахыг АНУ-д анхааруулж байсан юм.
Гэсэн ч анхааруулгыг үл тоон ийм ховор шийдвэр гаргажээ.
Өнгөрсөн хугацаанд Иран улс хоёр удаа, энэ оны дөрөв болон аравдугаар саруудад Израилийн нутаг дэвсгэрт пуужингаар довтолсон юм.
АНУ-ын уг алхам нь Израилийн агаарын довтолгооноос хамгаалах хүчин чадлыг нэмэгдүүлэх зорилготойг Пентагоны төлөөлөгч тайлбарласан байна.
“Энэ нь Ираны цаашдын баллистик пуужингийн дайралтаас Израилийг хамгаалах, Израиль дахь Америкчуудыг хамгаалах АНУ-ын хатуу амлалтыг батлан харуулж байна” гэж Пентагоны хэвлэлийн төлөөлөгч, хошууч генерал Пэт Райдер мэдэгджээ.
Аравдугаар сарын 1-ний өдөр Иран улсын зүгээс Израилийн нутаг дэвсгэрт 180 орчим баллистик пуужингаар довтолсон юм.
Одоо Израилийн зэвсэгт хүчин үүний хариу арга хэмжээг авахаар бэлдэж байгаа.
АНУ-ын зэвсэгт хүчинд THAAD систем долоон ширхэг байдаг гэсэн мэдээлэл бий.
Ийм систем бүрийг зургаан ачааны автомашин, 48 пуужин харвагч, радио болон радарын тоног төхөөрөмжүүд, удирдаж ажиллуулах 95 цэрэг дагалддаг юм.
THAAD-ийг Patriot-ийн нэмэлт систем гэж үздэг ч илүү өргөн хүрээтэй газар нутгийг агаарын довтолгооноос хамгаалах чадвартай ажээ.
Тухайлбал дайсны пуужинг 150-200 км-ийн зайнаас мэдрээд амдаж устгах чадвартай юм байна.
Эх сурвалж: AFP
Дэлхий дахинд
Киргизстан улсын Жалал-Абад мужийн чаткал хотын ууланд цасны нуранги үүсэж зургаан иргэн амь насаа алджээ
Өнгөрсөн бямба гарагт Кыргызстан улсын Жалал-Абад мужийн Чаткал хотын ууланд эмийн ургамал түүхээр явж байсан 14 хүний бүрэлдэхүүнтэй баг цасны нурангид өртсөн аж.
Киргизстан улсын Онцгой байдлын яамнаас сураггүй алга болсон зургаан хүний цогцсыг бямба гарагийн орой гаргаж авсан бөгөөд ням гарагт үлдсэн найман гишүүнийг эсэн мэнд олж уулнаас буулгажээ.
Дэлхий дахинд
Флорида муж онц байдлын дэглэмээ өргөжүүллээ
АНУ-ын Флорида мужид Ням гаригт халуун орны Милтон шуурга хүчээ авсан байна. Тус шуурга нь нэгдүгээр зэрэглэлийн хар салхинаас зэрэглэл нэмэх төлөвтэй байгаа бөгөөд долоо хоногийн дунд үед их хэмжээний хохирол учруулж магадгүй байна. Тиймээс мужийн захиргаа онц байдлын дэглэмээ өргөжүүлэх болжээ. Энэхүү байгалийн гамшигт үзэгдэл нь Хелен хар салхинаас хэдхэн өдрийн дараа болох гэж байна. Хелен хар салхи Флорида муж, Хойд Каролина зэрэг АНУ-ын зүүн өмнөд хэсгийн томоохон хэсгийг сүйрүүлж, 230 гаруй хүн амь насаа алдсан юм.
Милтон шуурга Мягмар гаригийн өглөө /2024.10.08/ Флоридагийн хойгийг дайрах үедээ гуравдугаар зэрэглэлийн аюултай болно гэж цаг уурчид таамаглаж байна. Үндэсний цаг уурын алба амь насанд аюултай шуурга нь сүйрэлд хүргэж болзошгүй гэж мэдэгдээд Милтоныг ирэхэд бэлдэж, оршин суугчдыг нүүлгэн шилжүүлэхийг уриалаад байна.
Дэлхий дахинд
Амиа егүүтгэх машиныг анх удаа хэрэглэхэд оролцсон хүмүүсийг Швейцарын цагдаа баривчилжээ
Сайн дураар амиа егүүтгэхэд туслах зориулалттай “Sarco” машиныг анх удаа хэрэглэсэн асуудлаар хэд хэдэн хүнийг баривчлан шалгаж эхэлснээ Швейцарын цагдаагийн газар өчигдөр мэдээлжээ.
Тус улсад өмнө нь уг машиныг огт ашиглаж байгаагүй юм. Харин Даваа гарагт Мерисхаузен хотод “Sarco” машинаар нэг хүн сайн дурын үндсэн дээр амиа егүүтгэсэн талаар нэгэн хуулийн фирм Шаффхаузен мужийн прокурорын газарт мэдээлжээ. Үүний дараа дээрх үйлдэл хууль ёсны дагуу хэрэгжсэн эсэхийг мөрдөн шалгах ажил эхэлсэн байна.
“Sarco” машины дотор байрлах нэг товчийг дарснаар бүхээгийн дотор тал азотын хийгээр дүүрдэг бөгөөд дотор нь суусан хүн тэр дороо унтаж, хэдхэн минутын дараа хүчилтөрөгчгүй болсны улмаас амьсгал хураадаг юм.
Дэлхийн зарим улс оронд эвтанази буюу бусдын тусламжтай амиа егүүтгэхийг зөвшөөрдөг бол Швейцарын хууль сайн дураар амиа егүүтгэхийг зөвшөөрдөг ч ингэхдээ бусдаар туслуулахыг хориглодгоороо ялгаатай.
Энэ шаардлага нь тодорхойгүй байдал үүсгэж, хуульчдын дунд маргаан дэгдээдэг. Тиймээс “Sarco” машиныг хэрэглэсэн анхны тохиолдол хууль зөрчсөн байж болзошгүй гэж прокурорууд сэжиглэж байгаа юм байна.
Нидерландад төвтэй Exit International байгууллага $1 саяын өртөгтэй “Sarco” машиныг Швейцарт анх оруулж ирсэн юм.
Швейцар нь амиа егүүтгэх хүсэлтэй гадаадын иргэдийн хүслийг биелүүлэхийг зөвшөөрдөг цорын ганц улс тул Exit International ийм хүмүүст туслах зорилгоор оруулж ирж байжээ.
АНУ-ын иргэн, эдгэршгүй хүнд өвчтэй 64 настай эмэгтэй “Sarco” машины анхны хэрэглэгч болсон байна.
Exit International байгууллагын Швейцар дахь салбарын төлөөлөгч Флориан Уиллет эмэгтэйг “амар тайван, түргэн бөгөөд нэр төртэй” амьсгал хураасныг мэдээлжээ.
-
Энтертайнмент5 цаг өмнө
Монголоос бильярдын анхны Ази тивийн аварга төрлөө
-
Нийгэм5 цаг өмнө
Загасны уурга нь цахилгааны утсанд хүрснээр тогонд цохиулж амиа алджээ
-
Нийгэм5 цаг өмнө
Нийтийн тээврийн зарим чиглэлийг өөрчилнө
-
Улс төр5 цаг өмнө
Нидерландын хаант улс болон Саудын Арабын хаант улстай агаарын харилцааны хэлэлцээр үзэглэж, тохиролцлын бичиг байгуулав
-
Нийгэм5 цаг өмнө
Химийн хорт болон аюултай бодис үйл ажиллагаандаа ашигласан хэргийг шүүхэд шилжүүллээ
-
Нийгэм5 цаг өмнө
Өмнөговь аймгийн газар нутгийн 90 хувь нь үүрэн холбооны сүлжээнд хамрагдлаа
-
Нийгэм5 цаг өмнө
Монгол Улсын Консерваторын ахмад багш нартай уулзав
-
Энтертайнмент15 мин өмнө
“Улаанбаатар хот-100” үзэсгэлэн нээлтээ хийлээ