Нийгэм
ДЭМБ-ын Номхон далайн баруун бүсийн хорооны 75 дугаар чуулган эхэллээ
Дэлхийн эрүүл мэндийн байгууллагын Номхон далайн баруун бүсийн хорооны 75 дугаар чуулганы хуралдаан Бүгд Найрамдах Филиппин Улсын Манила хотноо эхэллээ.
Чуулганд Монгол Улсын Засгийн газрыг төлөөлж Улсын Их Хурлын гишүүн, Эрүүл мэндийн сайд Т.Мөнхсайхан тэргүүтэй төлөөлөгчид оролцож байна.
Бүсийн хорооны чуулган нь бүс нутгийн хэмжээнд эрүүл мэндийн бодлогын чиглэлээр шийдвэр гаргадаг дээд түвшний механизм бөгөөд чуулганд тус бүс нутагт харьяалагдах 37 улс орны Эрүүл мэндийн сайд тэргүүтэй төлөөлөгчид оролцож байна.
Чуулганы даргаар Күүкийн Аралын Эрүүл мэндийн сайд, Дэд даргаар Бүгд Найрамдах Социалист Вьетнам Улсын Эрүүл мэндийн дэд сайд нар тус тус сонгогдлоо. Эхний өдрийн хуралдаанаар Номхон далайн баруун бүсийн захирал Др. Саиа Ма’У Пиукала өөрийн алсын хараа болох “Номхон далайн баруун бүсийн орнуудын гэр бүл, хамт олон, олон нийт, нийгэмд суурилсан эрүүл мэндийг бий болгох нь: Эрүүл мэнд, сайн сайхан байдлыг сайжруулах, амь насыг аврахын төлөө хамтран ажиллах” бодлогын баримт бичгийн талаарх танилцуулгыг хийсэн бөгөөд уг баримт бичгийг 2025-2029 онд хэрэгжүүлж ажиллах юм.
Түүнээс гадна энэ жилийн чуулганаар “Номхон далайн баруун бүсэд эрүүл мэндийн санхүүжилтийг сайжруулах арга хэмжээний төлөвлөгөөний хүрээ“, “Номхон далайн баруун бүсэд цахим эрүүл мэндийг ашиглах стратеги” зэрэг урт хугацаанд баримтлах бодлогын баримт бичгүүдийг хэлэлцэн батлах ба Монгол Улс дээрх хэлэлцүүлгүүдэд тус тус оролцож, байр сууриа илэрхийлнэ. Мөн энэ үеэр Эрүүл мэндийн сайд Т.Мөнхсайхан бүс нутгийн зарим улс орнуудын төлөөлөгчдийн тэргүүнтэй хоёр талын уулзалт хийж, хамтын ажиллагааны асуудлаар санал солилцоно.
Нийгэм
Химийн хорт болон аюултай бодис үйл ажиллагаандаа ашигласан хэргийг шүүхэд шилжүүллээ
Прокурорын байгууллага 2024 оны 10 дугаар сарын 14-18-ны өдрийг хүртэл хугацаанд хэрэг бүртгэлтийн 45922, мөрдөн байцаалтын 3662 хэрэгт хяналт тавьж, эрүүгийн 189 хэрэгт яллах дүгнэлт үйлдэн шүүхэд шилжүүллээ.
Яллах дүгнэлт үйлдсэн хэргийг тодруулбал, Эрүүл мэндийн халдашгүй байдлын эсрэг 78, Өмчлөх эрхийн эсрэг 54, Хөдөлгөөний аюулгүй байдал, тээврийн хэрэгслийн ашиглалтын журмын эсрэг 37, Хүрээлэн байгаа орчны эсрэг 8, Авлига, албан тушаалын 8, Хүний бэлгийн эрх чөлөө, халдашгүй байдлын эсрэг 6, Хүний амьд явах эрхийн эсрэг 4, Мансууруулах эм, сэтгэцэд нөлөөт бодисыг хууль бусаар ашиглах 4, Эдийн засгийн эсрэг гэмт хэрэг 3, Кибер аюулгүй байдлын эсрэг гэмт хэрэг 2, Нийтийн албаны ашиг сонирхлын эсрэг 2, Хэрэг шалган шийдвэрлэх ажиллагааны эсрэг, Хүний халдашгүй, чөлөөтэй байх эрхийн эсрэг, Мөрийтэй тоглоом зохион байгуулсан тус бүр нэг хэрэг байна.
Шүүхэд шилжүүлсэн зарим хэргээс дурдвал:
Нийслэлийн прокурорын газраас химийн хорт болон аюултай бодисын жагсаалтад багтсан шар давсны хүчил, хүхрийн хүчил, азот, натри хлорид болон Монгол Улсад хэрэглэхийг хуулиараа хориглосон цианит зэрэг 43 нэр төрлийн сав баглаа боодолтой бодисуудыг хууль бусаар олж, нэр бүхий компанийн үйл ажиллагаанд ашигласан О.Э-д холбогдох хэрэгт Эрүүгийн хуулийн 24.3 дугаар зүйлийн 1 /Химийн хорт, аюултай бодисыг хууль бус эргэлтэд оруулах/-д зааснаар яллах дүгнэлт үйлдэж Сонгинохайрхан дүүргийн Эрүүгийн хэргийн анхан шатны шүүхэд,
Гаалийн байгууллагын нийтийн албан тушаалтан Ж.М нь эрх мэдэл, албан тушаалын байдлаа ашиглан, нүүрс олборлох чиглэлээр үйл ажиллагаа явуулдаг нэр бүхий компанид давуу байдал бий болгож, гэрээ байгуулсан хэрэгт Эрүүгийн хуулийн 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/-д зааснаар яллах дүгнэлт үйлдэж Дорноговь аймгийн Эрүүгийн хэргийн анхан шатны шүүхэд,
Дорнод аймгийн прокурорын газраас Монгол Улсын Засгийн газрын 1995 оны 8 дугаар сарын 25-ны өдрийн 153 дугаар тогтоолын хавсралтаар “Ховор ургамлын жагсаалт”-д орсон “Дэрвэгэр жиргэрүү” гэх ургамлын 2.45 кг үндсийг зохих зөвшөөрөлгүйгээр түүж, байгаль экологид хохирол учруулсан Д.Х-д холбогдох хэрэгт Эрүүгийн хуулийн 24.8 дугаар зүйлийн 1 /Байгалийн ургамлыг хууль бусаар бэлтгэх/-д зааснаар яллах дүгнэлт үйлдэж тус аймаг дахь Сум дундын Эрүүгийн хэргийн анхан шатны шүүхэд,
Хэнтий аймгийн прокурорын газраас тус аймгийн нутаг дэвсгэрт тусгай зөвшөөрөлгүй, хууль бусаар ашигт малтмал буюу жонш олборлож, байгаль орчинд 7.479.418 төгрөгийн хохирол учруулсан нэр бүхий 9 иргэнд холбогдох хэрэгт Эрүүгийн хуулийн 24.2 дугаар зүйлийн 1 /Хууль бусаар ашигт малтмал хайх, ашиглах, олборлох/-д зааснаар яллах дүгнэлт үйлдэж Хэнтий аймаг дахь Сум дундын Эрүүгийн хэргийн анхан шатны шүүхэд тус тус шилжүүллээ.
Нийгэм
Монгол Улсын Консерваторын ахмад багш нартай уулзав
Боловсролын сайд П.Наранбаяр Монгол Улсын Консерваторын ахмад багш нартай уулзав.
Консерватор нь 1937 онд Уран сайхны сургууль нэртэй байгуулагдсанаасаа хойш Монголын урлагийн боловсролын системийг төлөвшүүлэхэд томоохон үүрэг гүйцэтгэсэн хөгжмийн мэргэжлийн дээд боловсролын байгууллага юм.
Их сургуульд багшлах мэргэжлийн хөгжимчдөд урлагийн доктор зэрэг олгох эрх зүйн орчныг бүрдүүлэх, урлагийн сургуулиудын хөтөлбөрийн давхцалыг зохицуулах, Консерваторт хөгжмийн багш бэлдэх хөтөлбөрийг бий болгохдоо консерваторын төгсөгчдөөс элсэлт авах гэх мэт саналыг ахмад багш нар хэлэв.
Боловсролын сайд П.Наранбаяр саналуудыг дэмжиж буйгаа илэрхийлээд, хөгжим, урлагийн боловсрол өндөр ач холбогдолтойг онцоллоо гэж Боловсролын яамнаас мэдээллээ.
Нийгэм
Өмнөговь аймгийн газар нутгийн 90 хувь нь үүрэн холбооны сүлжээнд хамрагдлаа
“Нутгийн хишиг” мөрийн хөтөлбөрийн хүрээнд “Алслагдсан сум, багийн нутагт үүрэн холбооны сүлжээний тархалтыг нэмэгдүүлж, өрх бүрт өндөр хурдны интернет, утасны сүлжээ хүргэх боломжийг бүрдүүлэх” ажлыг үе шаттайгаар орон нутгийн төсвийн хөрөнгө оруулалтаар хэрэгжүүлж байна.
2024 онд 12 сумын 12 байршилд 4G сүлжээг нэвтрүүлээд байна.
Ингэснээр Өмнөговь аймгийн газар нутгийн 90 хувь нь үүрэн холбооны сүлжээнд хамрагдаад байна гэж Өмнөговь аймгийн ЗДТГ-аас мэдээллээ.
-
Энтертайнмент3 цаг өмнө
Монголоос бильярдын анхны Ази тивийн аварга төрлөө
-
Улс төр3 цаг өмнө
Нидерландын хаант улс болон Саудын Арабын хаант улстай агаарын харилцааны хэлэлцээр үзэглэж, тохиролцлын бичиг байгуулав
-
Нийгэм3 цаг өмнө
Нийтийн тээврийн зарим чиглэлийг өөрчилнө
-
Нийгэм3 цаг өмнө
Өмнөговь аймгийн газар нутгийн 90 хувь нь үүрэн холбооны сүлжээнд хамрагдлаа
-
Нийгэм3 цаг өмнө
Химийн хорт болон аюултай бодис үйл ажиллагаандаа ашигласан хэргийг шүүхэд шилжүүллээ
-
Нийгэм3 цаг өмнө
Загасны уурга нь цахилгааны утсанд хүрснээр тогонд цохиулж амиа алджээ
-
Нийгэм3 цаг өмнө
Монгол Улсын Консерваторын ахмад багш нартай уулзав