Нийслэлийн 2024-2025 оны өвөлжилтийн бэлтгэл ажлын хүрээнд цэвэр, бохир ус, цахилгаан, дулаан хангамж болон бусад шаардлагатай гэсэн нийт 654 төсөл, арга хэмжээг хэрэгжүүлээд байна.

Өнөөдрийн байдлаар өвөлжилтийн бэлтгэл ажил 98.5 хувийн гүйцэтгэлтэй байгаа талаар УБЗАА-ны Хотын инженерийн дэд бүтцийн газрын дарга, Ерөнхий инженер М.Балдандоржоос тодрууллаа.

Тэрбээр “Улаанбаатар хотын хэмжээнд дулаан хангамжийн чиглэлээр 18 байршилд 25.1 км шугам сүлжээ хийсэн. Үүнтэй холбоотойгоор нөхөн сэргээлт, бүтээн байгуулалтын ажлууд цаг хугацааны хувьд багахан хоцрогдолтой байсан хэдий ч өнөөдрийн байдлаар орон сууц, аж ахуйн нэгж байгууллагуудын халаалтыг бүрэн өгсөн. Мөн 2024-2025 оны өвлийн эрчим хүчний тасралтгүй байдлыг хангах хүрээнд Бөөрөлжүүтийн 150 МВт хүчин чадалтай цахилгаан станц, Багануурын 50 МВт хүчин чадалтай батарей хуримтлуурын станцыг энэ сард төвийн эрчим хүчний системд холбох бэлтгэл ажлыг хангаж байна” гэв.

Түүнчлэн Улаанбаатар хотын хэмжээнд 6100 тонн давс, 4405 тонн бодис нөөцөлсөн. Мөн нийт долоон дүүргийн 43 агуулахад 82,500 тонн сайжруулсан шахмал түлшийг бэлтгэж, гурван маршрутаар 27 аж ахуйн нэгж байгууллага түгээлт хийж байгаа бөгөөд шахмал түлш борлуулах 545 цэг ажиллаж байгаа юм.

Авлигатай тэмцэх газраас төсвийн хөрөнгөөр санхүүжих хөрөнгө оруулалтын төсөл, арга хэмжээний төлөвлөлт, хэрэгжилтийн талаарх мэдээллийн нээлттэй, ил тод байдлыг нэмэгдүүлж, иргэн, иргэний нийгмийн байгууллагын оролцоог хангах ажлын хүрээнд Соёл, спорт, аялал жуулчлал, залуучуудын яамнаас хэрэгжүүлж байгаа томоохон төсөл, арга хэмжээний сонгон шалгаруулалтын явц, гүйцэтгэлд хяналт тавьж ажиллалаа.

Соёлын салбарт 2019-2023 онд хэрэгжүүлж буй зарим төсөл, арга хэмжээний хүрээнд гэрээний үүргээ зөрчиж, олон жилийн туршид үйл ажиллагааг царцааж ашиглалтад өгөхгүй байгаа 7 аж ахуйн нэгж, байгууллага, компанийг тендерт оролцох эрхээ хязгаарлуулах этгээдийн бүртгэлд хамруулахаар холбогдох баримтыг 2023 оны 11 дүгээр сард Сангийн яаманд хүргүүлсэн байна.

Энэ талаар Сангийн яамнаас тодруулахад гэрээний үүргээ биелүүлээгүй, мэргэжлийн алдаа гаргасныг эрх бүхий этгээд тогтоосон, хуурамч баримт бичиг ирүүлсэн зэрэг үндэслэлээр “Уран-Охид” ХХК, “Наяд констракшн” ХХК, “ВоркМастер” ХХК, “АкмиХолдинг” ХХК, “Суурь” ХХК гэх 5 оролцогчийг тендер шалгаруулалтад оролцох эрхээ хязгаарлуулсан этгээдийн жагсаалтад 3 жилийн хугацаагаар бүртгэж, худалдан авах ажиллагааны www.tender.gov.mn цахим системд холбогдох мэдээллийг нийтэлсэн байна.

Цаашид авлигаас урьдчилан сэргийлэх чиглэлээр төрийн байгууллагуудын 2024 оны томоохон төсөл, арга хэмжээний сонгон шалгаруулалтын явц, гүйцэтгэлд үргэлжлүүлэн хяналт тавьж ажиллана гэж АТГ-аас мэдээллээ.