Монгол Улсын Далай ашиглах тухай хууль, далайн салбарын олон улсын гэрээ конвенц болон Олон улсын далайн байгууллага /ОУДБ/-ын тогтоол, холбогдох дүрэм журмын дагуу Монгол Улсын хөлөг онгоцны бүртгэлд бүртгэлтэй хөлөг онгоцуудад далбааны эзэн улсын нэрийн өмнөөс буюу Далайн захиргаанаас хяналт, шалгалтыг хийдэг.

Энэ хүрээнд Далбааны эзэн улсын хяналтын улсын байцаагч нь Монгол Улсын төрийн далбаа мандуулан их далайд далайн тээврийн үйл ажиллагаа явуулж буй 6 хөлөг онгоц дээр 10 дугаар сарын 28-наас 11 дүгээр сарын 7-ны өдрүүдэд Тайванийн Гаушун боомтод далбааны эзэн улсын хяналт, шалгалтыг хийлээ.

Тус шалгалтын гол зорилго нь их далайд аялж буй хөлөг онгоцны техникийн бүрэн бүтэн байдлыг нягтлан шалгах, олон улсын эрх зүйн хүрээнд нийцэхүйц үйл ажиллагаа явуулж байгаа эсэхэд хяналт тавихад оршдог.

Ингэснээр их далайд хөлөг онгоц осолдох, эвдрэх, мөргөлдөх, хүний амь нас эрсдэх, хүрээлэн буй орчныг бохирдуулах зэрэг учирч болзошгүй эрсдэлээс урьдчилан сэргийлэхэд томоохон хувь нэмрээ оруулдаг гэж Зам тээврийн яамнаас мэдээллээ. 

Монгол Улсын Үндэсний аюулгүй байдлын зөвлөлийн нарийн бичгийн дарга А.Бямбажаргал, Ажлын албаны дарга Д. Ариунболд нар Гадаадын иргэн, харьяатын газарт ажиллалаа.

Гадаадын иргэн, харьяатын газар нь Үндэсний аюулгүй байдлыг хангах тусгайлсан чиг үүрэгтэй байгууллага бөгөөд ГИХГ-ын дарга Н. Ууганбаяр Монгол Улсад оршиж сууж буй гадаадын иргэдийн тоон мэдээ, зөрчил шалган шийдвэрлэлт, иргэний харьяаллын асуудлаар мэдээлэл өгч, цахим үйлчилгээ, үйлчилгээний нэгдсэн системийн талаар танилцуулав. Мөн мэдээллийн аюулгүй байдлыг хангах, хувийн мэдээллийг хамгаалах, виз, зөвшөөрөл олголтын хяналтыг сайжруулах чиглэлээр цаашид авч хэрэгжүүлэх арга хэмжээний талаар санал солилцсон юм.

Гадаадын иргэн, харьяатын газрын виз, оршин суух зөвшөөрлийн үйлчилгээ 2024 онд бүрэн цахимжиж, гадаадын иргэн, түүнийг уригч иргэн, аж ахуйн нэгж байгууллагуудад хүргэх үйлчилгээний хүндрэл багасаж, чанар, хүртээмж нэмэгдсэн эерэг өөрчлөлт, үр дүн гарч байна. Үүнийг дагаад программ хангамж, мэдээллийн аюулгүй байдлын хамгаалалтыг сайжруулах, шинэ үеийн хиймэл оюун ухаан дээр суурилсан системийг хөгжүүлэх, аливаа төрлийн халдлага, эрсдэлээс урьдчилан сэргийлэх ажлыг үр дүнтэй зохион байгуулах нь дараагийн том зорилт болж байгааг Гадаадын иргэн, харьяатын газрын дарга Н. Ууганбаяр онцлов.

Монгол Улсын Үндэсний аюулгүй байдлын зөвлөлийн нарийн бичгийн дарга А.Бямбажаргал иргэдэд үзүүлэх үйлчилгээгээ цахимжуулах нь аялал жуулчлалыг нэмэгдүүлэх, эдийн засагт оруулах үр өгөөж талаасаа сайн боловч нөгөө талаасаа бодит эрсдэлийг дагуулж болзошгүй тул цаашид системийн хамгаалалт, аюулгүй байдлыг хангах, гадаадын иргэдийн хяналтыг сайжруулах чиглэлд анхаарч ажиллахыг чиглэл болгов. Мөн хоёр байгууллага хоорондын цахим системүүдийг холбож, мэдээлэл солилцох, мэдээллийн аюулгүй байдлыг хангах зэрэг бүхий л чиглэлээр дэмжлэг үзүүлж, хамтран ажиллахаа илэрхийллээ гэж Гадаадын иргэн, харьяатын газраас мэдээллээ. 

Онон-Балжийн байгалийн цогцолборт газрын биологийн олон янз байдал, өвөрмөц экосистем, соёлын өвийг тогтвортой хамгаалах зорилгоор “Өвлөгдөн үлдэх газар нутаг-Онон-Балжийн байгалийн цогцолборт газар” төсөл хөтөлбөрийг 15 жилийн хугацаанд хэрэгжүүлэхээр болсон билээ.

Энэхүү хөтөлбөр нь газар нутгийг хамгаалахдаа нийгэм, эдийн засгийн хөгжлийг хамтад нь бүрдүүлэх “загвар” бүхий тусгай хамгаалалттай газрыг бий болгохоор зорьж байна.

Тус төслийг Legacy Landscapes Fund (LLF), The Nature Conservancy (TNC) болон WWF-Mongolia буюу Дэлхийн байгаль хамгаалах сангийн Монгол дахь хөтөлбөрийн газар хамтран хэрэгжүүлэх бөгөөд төслийн “Эхлэлийн семинар”-ыг зохион байгууллаа.

Энэхүү төсөл хөтөлбөр нь 15 жилийн хугацаанд 198 сая ам.долларын хөрөнгө оруулалтыг орон нутгийн тогтвортой хөгжил, тусгай хамгаалалттай газар нутгийн менежментийг сайжруулах, байгаль хамгаалахад дэмжлэг үзүүлэх зорилготой “Өнө мөнхийн Монгол” байгаль хамгааллын байнгын санхүүжилтийн хөтөлбөрийн хүрээнд LLF-ийн оруулж буй хувь нэмэр юм гэж Байгаль орчин, уур амьсгалын өөрчлөлтийн яамнаас мэдээллээ.