Нийгэм

Төвийн бүсийн хоршоологчид зөвлөлдөж байна

Нийтэлсэн

3 өдөр өмнө

2025-02-17

Нийтэлч

Төвийн бүсийн хоршоологчдын зөвлөгөөн Дархан-Уул аймаг дахь Хүнс, хөдөө аж ахуй, хөнгөн үйлдвэрийн яамны байранд эхэллээ. Зөвлөгөөнөөр Дархан-Уул, Төв, Сэлэнгэ аймгийн хоршоологчид, холбогдох төрийн болон төрийн бус байгууллагуудын төлөөлөл цаашдын хөгжлийн бодлого тодорхойлж, нэгдсэн зөвлөмж гарган салбарын яаманд хүргүүлэх юм.

Хүнс, хөдөө аж ахуй, хөнгөн үйлдвэрийн сайд Ж.Энхбаяр зөвлөгөөнийг нээж хэлсэн үгэндээ, салбарын яамнаас уламжлалт мал аж ахуй зонхилж, газар тариалангийн бүс, хот, суурингийн орчимд эрчимжсэн мал аж ахуйг төрөлжүүлэн хөгжүүлэх замаар хөдөө аж ахуйг эдийн засгийн голлох хөшүүрэг болгон хөгжүүлэх бодлого баримталж буйг тодотголоо. Энэ зорилтыг хэрэгжүүлэхэд хоршоологчид хамгийн өндөр үүрэг гүйцэтгэх бөгөөд улсдаа газар тариалан, эрчимжсэн мал аж ахуй хөгжлөөрөө тэргүүлэгч Төвийн бүсийн аймгууд манлайлагч байр сууринаас оролцоно гэдгийг онцлов.

Тэрээр “Монгол Улсын Засгийн газраас санаачлан 2025 оныг Олон улсын хоршооллын жил болгон зарлах саналыг НҮБ-д хүргүүлснээр Ерөнхий ассамблейн 2024.06.20-ны өдрийн хуралдаанаас 2025 оныг Олон улсын хоршооллын жил болгон зарлаж, улс орнуудын Засгийн газарт “Хоршоод бүх нийтийн төлөө илүү сайхан ирээдүйг бүтээнэ” уриан дор хоршоодыг дэмжиж ажиллахыг уриалсан. НҮБ-аас хоршооллыг дэмжих нь хоршоолол хүнсний аюулгүй байдлыг хангах, хүртээмжтэй, уян хатан хүнсний тогтолцоог бий болгох, иргэдийн эдийн засгийн чадавхийг бэхжүүлэхэд хувь нэмэр оруулна гэж үзжээ.

Монгол Улсын ДНБ-ий 30.8 хувийг хүнс, хөдөө аж ахуй, хөнгөн үйлдвэрийн салбар бүрдүүлж байгаагийн 10.2 хувь нь хөдөө аж ахуйн салбарт ногдож, ажиллах хүчний 55.8 хувийг хангадаг. Иймд УИХ-аас 2022 онд “Хүнсний хангамж, аюулгүй байдлыг хангах талаар авах зарим арга хэмжээний тухай” 36 дугаар тогтоол, УИХ-ын 2024 онд “Малын гаралтай түүхий эдийг боловсруулах үйлдвэрлэлийг дэмжих зарим арга хэмжээний тухай” 63 дугаар тогтоолыг батлан гаргасан. Засгийн газраас уламжлалт мал аж ахуйд тулгамдаж байгаа уур амьсгалын өөрчлөлтөөс шалтгаалсан сөрөг нөлөөллийг бууруулах тухай хууль батлагдсантай холбогдуулан 2024 оны “Шинэ хоршоо хөдөлгөөн” өрнүүлэх тухай 166, 167 тогтоол, “Атар-IV тариалангийн тогтвортой хөгжлийн аян” зэрэг бодлогыг уялдуулан ажиллаж байна.

“Атар-IV тариалангийн тогтвортой хөгжлийн аян”-ы зорилго нь тариалангийн дэвшилтэт технологийг нэвтрүүлж, хөрс, уур амьсгалын онцлогт тохирсон шинэ болон ашигт таримлыг нутагшуулах, тэжээлийн үйлдвэрлэлийг нэмэгдүүлэх замаар газар тариалан, мал аж ахуйн төгс хослолыг бий болгож, Төвийн бүсийг хөдөө аж ахуйн төрөлжсөн, жишиг бүс болгон хөгжүүлэхэд чиглэж байна.

Засгийн газраас өнгөрсөн хугацаанд малчдын орлогыг нэмэгдүүлэх зорилгоор “Шинэ хоршоо-Чинээлэг малчин” хөдөлгөөнийг эрчимжүүлснээр 2023 оны жилийн эцсийн байдлаар 4447 хоршоонд 227497 гишүүн бүртгэлтэй байсан бол 2024 оны 12 дугаар сарын 31-ний байдлаар улсын хэмжээнд 7184 хоршоо шинээр байгуулагдаж, нийт 11631 хоршоо 304730 гишүүдтэй болон малчин ганц нэг гэрээрээ бус нэгдэн нийлэн хоршиж үйл ажиллагаа явуулж байна” гэв.

Зөвлөгөөний үеэр Хүнс, хөдөө аж ахуй, хөнгөн үйлдвэрийн яамны мэргэжилтнүүд Төрөөс хоршооллын талаар баримталж буй бодлого, шийдвэрүүдийг танилцуулж, Зээлийн батлан даалтын сан, арилжааны банкны төлөөллүүд хөнгөлөлттэй нөхцөлтэй эргэлтийн хөрөнгийн зээлд хэрхэн хамрагдах талаар мэдээлэл өглөө. Мөн АДРА олон улсын байгууллагуудын төлөөлөл Монгол Улсад амжилттай хэрэгжиж органик хөдөө аж ахуйн төслүүдийг онцлон танилцуулсан бол Сэлэнгэ аймгийн хоршоологчид өөрсдийн сайн туршлагаасаа хуваалцлаа.

Сэдвүүд:

Дэлгэрэнгүй ...

Нийгэм

“Улаанбаатар орон сууцжуулалт” ХХК-ийнхан дэд бүтцийн асуудал хариуцсан инженер техникийн ажилчидтай уулзлаа

Нийтэлсэн

2 цаг өмнө

2025-02-20

Нийтэлч

24barimt

“Улаанбаатар орон сууцжуулалт” ХХК-ийн Хөрөнгө оруулалт, төлөвлөлтийн газрын холбогдох мэргэжилтнүүд Толгойт дэд төвийн төсөл хэрэгжүүлэгч нэгжийн зөвлөх баг, “Ус сувгийн удирдах газар”, “Улаанбаатар цахилгаан түгээх сүлжээ”, “Улаанбаатар дулааны станц” ТӨХК-иудын ерөнхий инженерүүдтэй уулзалт, хэлэлцүүлэг зохион байгуулж байна. Орон сууцжуулах ажлын хүрээнд хамгийн их тулгамдаж байгаа асуудал бол дэд бүтэц, ус дулаан, цахилгаан хангамж. Эдгээр хүчин зүйлс дээр тооцоолол бүрэн хийгдээгүй, бодит байдлын дүн шинжилгээнд тулгуурлаагүйгээс болж хүндрэл чирэгдэл тасардаггүй. Барилгын компаниуд хийгээд иргэдийн зүгээс энэ талын мэргэжлийн хүмүүстэй уулзаж, зөвлөгөө мэдээлэл ч дутуу дулимаг авдаг байна.

Энэ удаагийн уулзалтаар ашиглалтын шаардлага хангахгүй орон сууцны дахин төлөвлөлтийн ажилд дэд бүтцийн хувьд тулгарч болзошгүй хүндрэл, анхаарал хандуулах байршлуудын асуудлыг хэлэлцлээ. Сүүлийн жилүүдэд Улаанбаатар хотын усны хэрэглээ өсөж, 70 хувиас дээш ачааллыг авч байгаа талаар “Ус сувгийн удирдах газар” ТӨХК-ийн Цэвэр усны горим тооцооны инженер Р.Атаржаргал онцолж байлаа. Цахилгаан түгээх сүлжээний шийдвэрлэж чадахгүй хэмжээний байршлууд олон байдаг. Барилгын томосгосон эрчим хүчний тооцоолол маш чухал. Хуучны 1-5 давхар барилгуудыг орчин үеийн өндөр барилга болгоход одоогийн тэжээж байгаа станцын хүчин чадал хүрэхээ больчихдог. Станц барих гэхээр газрын асуудал үүсдэг. Тэгэхээр цаашдаа орон сууцны төлөвлөлт дээр инженерийн шугам сүлжээ барих газрын асуудлыг шийдвэрлээд явах хэрэгтэй гэж “Улаанбаатар цахилгаан түгээх сүлжээ” ТӨХК-ийн Техник нөхцөлийн хэлтсийн дарга Б.Дуламжав тодотгов.

Харин Улаанбаатар дулааны станц ТӨХК-ийн Ерөнхий инженер Ш.Мөнхжаргал “Улаанбаатар бол инженерийн байгууламж байхгүй суурин газар. 2013 оноос хойш амьдрах бололцоогүй газар олголт, дахин төлөвлөлт нэртэй батламж гээд амьгүй төлөвлөлтүүд гарч эхэлсэн. Тиймээс хот зохион байгуулалтын бүтцээ оновчтой болгох хэрэгтэй. Газар олголтоосоо төсөв төвлөрүүлдэг бол дэд бүтэц рүүгээ түүнээсээ төсөв хуваарилж өгдөг байх хэрэгтэй. Төсөв төлөвлөгөөгөө ярьж, бодит нөхцөл байдлыг сонсож, харилцан хамтарч ажиллах санал дэвшүүлж байгаа “Улаанбаатар орон сууцжуулалт” ХХК-ийн алба хаагчдад баярлаж байна” хэмээлээ.

Дэлгэрэнгүй ...

Нийгэм

Бүсчилсэн хөгжлийн хорооны хуралдаанаар дараах асуудлыг хэлэлцлээ

Нийтэлсэн

3 цаг өмнө

2025-02-20

Нийтэлч

24barimt

Нийслэлийн ИТХ-ын Бүсчилсэн хөгжлийн хороо өнөөдөр хуралдлаа. Хуралдааны эхэнд НИТХ-ын төлөөлөгч, Бүсчилсэн хөгжлийн хорооны дарга Л.Ариунтуяа хэлэлцэх асуудлыг танилцууллаа. Нийслэлийн Газар зохион байгуулалтын албаны дарга Г.Мөнхбаатар газрыг улсын тусгай хэрэгцээнд авах хэд хэдэн асуудлыг танилцуулж, хорооны гишүүдэд мэдээлэл өгч, тайлбар хийлээ. Төслийн хэрэгжилтийг хангах чиглэлээр авах арга хэмжээний тухай буюу Үндэсний цэцэрлэгт хүрээлэн ОНӨТҮГ-ын эзэмшлийн газарт хийн түлшний станц байгуулах талаар хэлэлцэв. Мөн Нийслэлийн ЗДТГ-ын даргын албан үүргийг түр орлон гүйцэтгэгч Д.Амгалан Цөлжилттэй тэмцэх тухай НҮБ-ын суурь конвенцын талуудын 17-р бага хурал (COP-17)-ыг Үндэсний цэцэрлэгт хүрээлэн ОНӨТҮГ-ын эзэмшил газарт зохион байгуулах зөвшөөрөл олгох тухай асуудлыг танилцуулж, мэдээлэл өглөө. Үүний дараа хорооны гишүүд өөрсдийн байр сууриа илэрхийллээ. НИТХ-ын төлөөлөгч, Бүсчилсэн хөгжлийн хорооны гишүүн Б.Ану-Үжин тухайн төлөвлөсөн газарт айлын эзэмшил газар эсэх талаар тодруулсан бол төлөөлөгч, хорооны гишүүн Т.Батцогт “Томоохон төсөл хэрэгжүүлэх гэж байгаа нь сайн ч юм л бол Үндэсний цэцэрлэгт хүрээлэнгийн газарт халдах нь зохимжгүй. Өөр гарц гаргалгаа судалж үзсэн үү” гэдгийг онцлон асуулаа. Харин төлөөлөгч, хорооны гишүүн Ж.Батбаясгалан “Захиргааны байгууллагууд хэлэлцэж буй асуудалд төлөөлөгчдөөс гаргасан саналыг тусгахгүй, судалж ч үзэхгүй хорооны хурлаар дахин дутуу дулимаг оруулж ирж байна. Үеийн үед НИТХ-ын төлөөлөгчид Үндэсний цэцэрлэгт хүрээлэнгийн газрыг хамгаалж, зохистой дэд бүтэц хийхийг эрмэлзэж ирсэн.Өмнөх үеэ одоогийн удирдлагууд нь үгүйсгэж, ажил хийхдээ шалтаг тоочмооргүй байна” гэлээ.

Хэлэлцсэн асуудал:

Газрыг улсын тусгай хэрэгцээнд авах саналыг дэмжих тухай (Багахангай дүүрэгт 104.2 га)
Газрыг улсын тусгай хэрэгцээнд авах саналыг дэмжих тухай (Багануур дүүрэгт 636 га)
Газрыг орон нутгийн тусгай хэрэгцээнд авах тухай
Төслийн хэрэгжилтийг хангах чиглэлээр авах арга хэмжээний тухай (Нийслэлийн Боловсролын газрын эзэмшлийн газрын талаар)
Төслийн хэрэгжилтийг хангах чиглэлээр авах арга хэмжээний тухай (Үндэсний цэцэрлэгт хүрээлэн ОНӨТҮГ-ын эзэмшлийн газрын талаар)
Цөлжилттэй тэмцэх тухай НҮБ-ын суурь конвенцын талуудын 17-р бага хурал (COP-17)-ыг Үндэсний цэцэрлэгт хүрээлэн ОНӨТҮГ-ын эзэмшил газарт зохион байгуулах зөвшөөрөл олгох тухай

Дэлгэрэнгүй ...

Нийгэм

“Эрдэнэс Тавантолгой” ХК 2024 онд 4.5 их наяд төгрөгийн цэвэр ашигтай ажиллажээ

Нийтэлсэн

3 цаг өмнө

2025-02-20

Нийтэлч

24barimt

“Эрдэнэс Тавантолгой” ХК –ийн удирдлагууд өнөөдөр /2025.02.20/ 2024 оны үйл ажиллагааны тайлангаа сэтгүүлчдэд танилцууллаа. Компанийн санхүүгийн тайлан Үндэсний аудитын газраар баталгаажсанаар олон нийтэд танилцуулж байна.

“Эрдэнэс Тавантолгой” ХК 2024 онд 30.4 сая тонн нүүрс олборлож, 29.6 сая тонн нүүрс борлуулж, 4.5 их наяд төгрөгийн цэвэр ашигтай ажиллалаа. Компанийн түүхэн дэх хамгийн өндөр борлуулалт хийж 10.2 их наяд төгрөгийн борлуулалтын орлоготой ажиллаж, Монгол Улсын төсөвт 3.4 их наяд төгрөгийн татвар төвлөрүүлж, Монгол Улсын эдийн засгийн өсөлтөд бодит хувь нэмэр оруулан ажиллалаа.

Мөн 2024 онд Нүүрс баяжуулах үйлдвэр, Тавантолгойн нүүрс ачих логистикийн төв, Загийн усны хоолой зэрэг нэмүү өртөг шингээх үйлдвэрлэлийн төслүүдийг ашиглалтад оруулж, ордын нөөц баялгийн нэмэгдүүлэн урт хугацаанд үр ашигтай, тогтвортой үйл ажиллагаа явуулах боломжийг бүрдүүлэн ажилласан.

2023 оноос биржийн арилжааг эхлүүлж өнөөдрийг хүртэлх хугацаанд нийт 115 удаагийн биржийн арилжаа зохион байгуулж, 2.8 тэрбум ам.долларын үнэлгээтэй 25 сая тонн нүүрсийг биржээр борлуулаад байна. 2023 онд 9.8 сая тонн нүүрс биржээр арилжаалсан бол 2024 онд 15.3 сая тонн болгон нэмэгдүүлсэн. Энэ онд биржээр арилжаалах нүүрсний хэмжээг 50 хувьд хүргэх зорилт тавин ажиллаж байгааг компанийн удирдлагууд сэтгүүлчидтэй уулзалтын үеэр онцлон тэмдэглэлээ.

Дэлгэрэнгүй ...