“Улаанбаатар орон сууцжуулалт” ХХК-ийн Хөрөнгө оруулалт, төлөвлөлтийн газрын холбогдох мэргэжилтнүүд Толгойт дэд төвийн төсөл хэрэгжүүлэгч нэгжийн зөвлөх баг, “Ус сувгийн удирдах газар”, “Улаанбаатар цахилгаан түгээх сүлжээ”, “Улаанбаатар дулааны станц” ТӨХК-иудын ерөнхий инженерүүдтэй уулзалт, хэлэлцүүлэг зохион байгуулж байна. Орон сууцжуулах ажлын хүрээнд хамгийн их тулгамдаж байгаа асуудал бол дэд бүтэц, ус дулаан, цахилгаан хангамж. Эдгээр хүчин зүйлс дээр тооцоолол бүрэн хийгдээгүй, бодит байдлын дүн шинжилгээнд тулгуурлаагүйгээс болж хүндрэл чирэгдэл тасардаггүй. Барилгын компаниуд хийгээд иргэдийн зүгээс энэ талын мэргэжлийн хүмүүстэй уулзаж, зөвлөгөө мэдээлэл ч дутуу дулимаг авдаг байна.

Энэ удаагийн уулзалтаар ашиглалтын шаардлага хангахгүй орон сууцны дахин төлөвлөлтийн ажилд дэд бүтцийн хувьд тулгарч болзошгүй хүндрэл, анхаарал хандуулах байршлуудын асуудлыг хэлэлцлээ. Сүүлийн жилүүдэд Улаанбаатар хотын усны хэрэглээ өсөж, 70 хувиас дээш ачааллыг авч байгаа талаар “Ус сувгийн удирдах газар” ТӨХК-ийн Цэвэр усны горим тооцооны инженер Р.Атаржаргал онцолж байлаа. Цахилгаан түгээх сүлжээний шийдвэрлэж чадахгүй хэмжээний байршлууд олон байдаг. Барилгын томосгосон эрчим хүчний тооцоолол маш чухал.  Хуучны 1-5 давхар барилгуудыг орчин үеийн өндөр барилга болгоход одоогийн тэжээж байгаа станцын хүчин чадал хүрэхээ больчихдог. Станц барих гэхээр газрын асуудал үүсдэг. Тэгэхээр цаашдаа орон сууцны төлөвлөлт дээр инженерийн шугам сүлжээ барих газрын асуудлыг шийдвэрлээд явах хэрэгтэй гэж “Улаанбаатар цахилгаан түгээх сүлжээ” ТӨХК-ийн Техник нөхцөлийн хэлтсийн дарга Б.Дуламжав тодотгов.

Харин  Улаанбаатар дулааны станц ТӨХК-ийн Ерөнхий инженер Ш.Мөнхжаргал “Улаанбаатар бол инженерийн байгууламж байхгүй суурин газар. 2013 оноос хойш амьдрах бололцоогүй газар олголт, дахин төлөвлөлт нэртэй батламж гээд амьгүй төлөвлөлтүүд гарч эхэлсэн. Тиймээс хот зохион байгуулалтын бүтцээ оновчтой болгох хэрэгтэй. Газар олголтоосоо төсөв төвлөрүүлдэг бол дэд бүтэц рүүгээ түүнээсээ төсөв хуваарилж өгдөг байх хэрэгтэй. Төсөв төлөвлөгөөгөө ярьж, бодит нөхцөл байдлыг сонсож, харилцан хамтарч ажиллах санал дэвшүүлж байгаа “Улаанбаатар орон сууцжуулалт” ХХК-ийн алба хаагчдад баярлаж байна” хэмээлээ.

Нийслэлийн ИТХ-ын Бүсчилсэн хөгжлийн хороо өнөөдөр хуралдлаа. Хуралдааны эхэнд НИТХ-ын төлөөлөгч, Бүсчилсэн хөгжлийн хорооны дарга Л.Ариунтуяа хэлэлцэх асуудлыг танилцууллаа. Нийслэлийн Газар зохион байгуулалтын албаны дарга Г.Мөнхбаатар газрыг улсын тусгай хэрэгцээнд авах хэд хэдэн асуудлыг танилцуулж, хорооны гишүүдэд мэдээлэл өгч, тайлбар хийлээ. Төслийн хэрэгжилтийг хангах чиглэлээр авах арга хэмжээний тухай буюу Үндэсний цэцэрлэгт хүрээлэн ОНӨТҮГ-ын эзэмшлийн газарт хийн түлшний станц байгуулах талаар хэлэлцэв. Мөн Нийслэлийн ЗДТГ-ын даргын албан үүргийг түр орлон гүйцэтгэгч Д.Амгалан Цөлжилттэй тэмцэх тухай НҮБ-ын суурь конвенцын талуудын 17-р бага хурал (COP-17)-ыг Үндэсний цэцэрлэгт хүрээлэн ОНӨТҮГ-ын эзэмшил газарт зохион байгуулах зөвшөөрөл олгох тухай асуудлыг танилцуулж, мэдээлэл өглөө. Үүний дараа хорооны гишүүд өөрсдийн байр сууриа илэрхийллээ. НИТХ-ын төлөөлөгч, Бүсчилсэн хөгжлийн хорооны гишүүн Б.Ану-Үжин тухайн төлөвлөсөн газарт айлын эзэмшил газар эсэх талаар тодруулсан бол төлөөлөгч, хорооны гишүүн Т.Батцогт “Томоохон төсөл хэрэгжүүлэх гэж байгаа нь сайн ч юм л бол Үндэсний цэцэрлэгт хүрээлэнгийн газарт халдах нь зохимжгүй. Өөр гарц гаргалгаа судалж үзсэн үү” гэдгийг онцлон асуулаа. Харин төлөөлөгч, хорооны гишүүн Ж.Батбаясгалан “Захиргааны байгууллагууд хэлэлцэж буй асуудалд төлөөлөгчдөөс гаргасан саналыг тусгахгүй, судалж ч үзэхгүй хорооны хурлаар дахин дутуу дулимаг оруулж ирж байна. Үеийн үед НИТХ-ын төлөөлөгчид Үндэсний цэцэрлэгт хүрээлэнгийн газрыг хамгаалж, зохистой дэд бүтэц хийхийг эрмэлзэж ирсэн.Өмнөх үеэ одоогийн удирдлагууд нь үгүйсгэж, ажил хийхдээ шалтаг тоочмооргүй байна” гэлээ.

Хэлэлцсэн асуудал:

1. Газрыг улсын тусгай хэрэгцээнд авах саналыг дэмжих тухай (Багахангай дүүрэгт 104.2 га)
2. Газрыг улсын тусгай хэрэгцээнд авах саналыг дэмжих тухай (Багануур дүүрэгт 636 га)
3. Газрыг орон нутгийн тусгай хэрэгцээнд авах тухай
4. Төслийн хэрэгжилтийг хангах чиглэлээр авах арга хэмжээний тухай (Нийслэлийн Боловсролын газрын эзэмшлийн газрын талаар)
5. Төслийн хэрэгжилтийг хангах чиглэлээр авах арга хэмжээний тухай (Үндэсний цэцэрлэгт хүрээлэн ОНӨТҮГ-ын эзэмшлийн газрын талаар)
6. Цөлжилттэй тэмцэх тухай НҮБ-ын суурь конвенцын талуудын 17-р бага хурал (COP-17)-ыг Үндэсний цэцэрлэгт хүрээлэн ОНӨТҮГ-ын эзэмшил газарт зохион байгуулах зөвшөөрөл олгох тухай