Эрчим хүчний хөгжлийн төв гээч байгууллага  салбараа хөгжүүлэх гээд байна уу,  сайдаа ивээн тэтгэх үүрэг хүлээгээ юу  гэх тухайд  эргэж харах цаг иржээ.

Уг нь тус байгууллагын чиг үүргийг “Засгийн газрын үйл ажиллагааны тэргүүлэх чиглэл, Засгийн газрын үйл ажиллагааны хөтөлбөрт эрчим хүчний салбарын талаар дэвшүүлсэн зорилт, чиг үүрэг, Эрчим хүчний сайдын эрхлэх асуудлын хүрээний чиг үүрэг, зорилтыг хэрэгжүүлэхэд чиглэсэн Эрчим хүчний хөгжлийн төвийн захирлын үйл ажиллагаанд өндөр мэргэшлийн, цаг үеэ олсон шуурхай зөвлөлгөө болон бүх талын дэмжлэг үзүүлэхэд оршино” гэж тодорхойлсон байх юм.

Түүнчлэн “…эрчим хүчний сайдын эрхлэх асуудлын хүрээний чиг үүрэг, зорилтыг хэрэгжүүлэхэд чиглэсэн эрчим хүчний хөгжлийн төвийн захирлын үйл ажиллагаанд өндөр мэргэшлийн, цаг үеэ олсон шуурхай зөвлөлгөө болон бүх талын дэмжлэг үзүүлэхэд оршино…, Санхүү, эдийн засгийн хэлтэс нь үйл ажиллагааны стратеги зорилтын хүрээнд байгууллагын мөнгөн урсгалыг оновчтой төлөвлөх, төсвийн гүйцэтгэлд хяналт тавих, санхүүгийн менежментийг боловсронгуй болгоход санаачлагатай ажиллах, нягтлан бодох бүртгэлийн ажлыг Олон улсын бүртгэлийн стандартад нийцүүлэн зохион байгуулах, байгууллагын удирдлагын шийдвэр гаргахад санхүүгийн оновчтой шуурхай мэдээ, мэдээллээр хангах зэрэг үндсэн чиг үүргийг хэрэгжүүлэн ажиллахад оршино” гэх мэтчилэн чиг үүргүүдээ ялгаж, салгаж, бүр тусгайлан заажээ.

Гэвч өнгөрсөн жилийн буюу 2018 оны байдлыг харахад эрчим хүчний салбарын хөгжил гэхээсээ илүү эрхэм сайд Ц.Даваасүрэнгийн хөгжил, түүний сонгогдсон тойрог Хөвсгөл аймгийн хөгжилд ихээхэн анхаардаг газар болоо юу даа  гэх дүгнэлтэд хүрч болохоор.

Уг нь Засгийн газрын  2018 оны хоёрдугаар сарын 6-ны өдрийн хуралдаанаар тухайн  жилийг  “Хариуцлагын жил” болгон зарласан. Энэ хүрээнд Засгийн газрын 2016-2020 оны үйл ажиллагааны хөтөлбөрийг хэрэгжүүлэх төлөвлөгөө, Үндсэн чиглэлд тусгасан төсөл, арга хэмжээг хугацаанд нь зохион байгуулахыг сайд, аймаг, нийслэлийн Засаг даргад даалгаж, “Сахилга, хариуцлага, дэг журмыг чангатгах тухай” Засгийн газрын Албан даалгаврыг төрийн байгууллагын бүх шатанд бүрэн хэрэгжүүлэхийг үүрэг болгосон байна.

Харамсалтай нь Ц.Даваасүрэн сайдад тухайд  Ерөнхий сайдын энэхүү үүрэг даалгавар өөрт нь  огт хамаагүй бололтой. Төсвийн хөрөнгө мөнгийг хэмнэх байтугай, харин ч бүр эсрэгээрээ хаашаа л бол хаашаа томилолтоор явсаар жилийг үдсэн байх жишээний.

Эрчим хүчний сайд Ц.Даваасүрэнгийн 2018 оны  томилолтын зардлын ихэнх  хувийг дээр нэр дурдсан Эрчим хүчний хөгжлийн газраас санхүүжүүлсэн байдаг. Тухайн үед нь тус төвийн даргаар Ч.Саранжав /түүнийг олон нийт БСШУС-ын сайд асан Цогзолмаагийн нөхөр гэдгээр нь мэднэ/ ажиллаж байсан.

Эрчим хүчний салбар гэдэг их айл ихэнхдээ алдагдалтай ажиллаж, улсын  төсвийн  татаасаар санхүүждэг.  Засаг, төр аргаа барахдаа  иргэдийнхээ халаас руу өнгийж, ямар нэг байдлаар цахилгаан, дулааны үнийг нэмсэнээр  галыг түр боловч намжаадаг нь нууц биш.

Гэвч салбарын сайд нь томилолт нэрийн дор тойргоо усалсаар ирсэн байх жишээний. Энэ эрхэм  сайдаар томилогдсоноос хойш эрчим хүчний салбар хэрхэн өөрчлөгдөж, хөгжиж дэвжсэн талаар түмний нүдэнд харагдах байтугай цаасан дээр буусан зүйл ч маруухан болов уу.

Хөгжлийн төвийн хөрөнгөөр туйлсан түүний томилолтоос харахад,  өнгөрсөн  жилийн хугацаанд дотооддоо орон нутагт есөн удаа томилолтоор явсан байх юм. Үүний  тав нь Хөвсгөл аймагт ажилласан байх жишээтэй. Бүр тодруулбал, 2018 оны гуравдугаар сарын 22-нд Хөвсгөл аймгийн томилолтод 4.651.200 төгрөг, тавдугаар сарын 30-нд 2.162.900 төгрөг, наймдугаар сарын 2.217.900 төгрөг, 11 сарын 1-нд 1.890.600 төгрөг, 12 сарын 18-нд Архангай, Хөвсгөл аймагт 5.790.000 төгрөг зарцуулсан байх жишээтэй. Энэ 16.712.600 төгрөг бол ердөө л Хөвсгөл аймагт ажилласан гэх томилолтын зардалд Эрчим хүчний хөгжлийн төвөөс гаргасан хөрөнгө. Үүнээс гадна ч өөр олон гадаад, дотоод томилолтоо тус байгууллагын данснаас гаргуулсан байгаа юм.

Олон нийтэд бол их л хямгач, зөв улстөрчийн дүрээр харагддаг Ц.Даваасүрэн сайдын эргэн тойронд ажиллаж буй салбарынхан нь түүний зах замбааргүй томилолт зэрэгт ихэд дургүйцээд зогсохгүй, салбарын хөгжил, ажилчдын нийгмийн асуудал зэрэгт  анхаарахгүй байгаад нь тун чиг эгдүүцдэг болжээ. Ямартаа л хурданхан шиг сонгууль нь болж энэ хүн Хөвсгөл аймгаа бараадаасай хэмээн жиг жуг гэлцэж байх вэ.

Засгийн газрын тэргүүнийхээ “лүндэн”-г үл тоон салбарын хөрөнгөөр тойрогоо торддог  мань сайд  үнэнч шударга нэгний дүр эсгэвч хачир дээрээ ямагт өөртөө  ашигтай байдлаар ажиллаж чаддаг болохыг дээрх баримтууд нотлох аж. Түүний хувьд УИХ-ын сонгуульд хүчирхэг байх үед нь МАН-аас, хөгөө хөлдөө чирэх үед нь бие дааж, эргээд хүчээ авах үед нь МАН-аас гэх зэргээр хөлбөрч парламентад заларч сурсан хүн. Тэр ч агуулгаараа өдгөө Ерөнхий сайд, Засгийн газрын танхим нь хичнээн муу ажиллаж, муухай харагдсан ч өөрөө л “тогос” мэт байвал болох нь тэр гэсэн агуулгаар бие даасан тоглолтыг зохион байгуулсаар ирсэн байдаг. Юутай ч эрхэм сайдын энэ мэт төрийн мөнгөнөөр тойргоо усалдаг байдлыг засч залруулж авахгүй бол ирэх жил эрчим хүчний салбар дахиад л алдагдалтай гарч иргэд түүнийх нь горыг эдэлж, халаасаа тэмтрэх байх даа.