Монголын үндэсний бөхийн холбоо /МҮБХ/-ны тэргүүлэгчид хуралдан, улсын гарьд Ө.Бат-Орших, улсын заан Б.Пүрэвсайхан, улсын начин Э.Даш нарын допинг хэрэглэсэн бөхчүүдэд оноосон шийт­гэлийн үлдсэн хугацааг чөлөөлж, хугацаанаас нь өмнө барилдах эрхийг сэргээх шийдвэр гаргажээ. МҮБХ энэ талаар бямба гаригт мэдэгдэж, бөхчүүдийн эрхийг сэргээсэн нь өчигдөр /2019.06.23/ болсон “Наадмын сорилго” барилдааны үеэр бөхчүүд барилдаанд гарахгүй гэж эсэргүүцэл үзүүлэхэд хүргэв.

МҮБХ-ноос гаргасан мэдэгдэлд “Боловсрол, соёл, шинжлэх ухаан, спортын сайдын 2017 оны зургаадугаар сарын 23-ны өдрийн №А/39 тоот тушаалаар батлагдсан төсөв хөрөнгөөр Биеийн тамир спортын тухай хуулийн 2-р зүйлд заасны дагуу БСШУСЯ, БТСГ, Допингийн эсрэг үндэсний төв хамтран “Допингийн Эсрэг Үндэсний Хяналт-1” төслийн хүрээнд 16 спортын төрлийн 198 тамирчнаас 2017 оны арванхоёрдугаар сар, 2018 оны нэг, хоёрдугаар саруудад допингийн шинжилгээг авснаас үндэсний бөхийн 43 тамирчин шин­жил­гээнд хамрагдсаны дотор долоон бөх допингийн төрлийн эм бэлдмэл хэрэглэсэн нь БНСУ дахь ОУОХ-ны итгэмжлэгдсэн лаборо­торийн шинжилгээгээр тогтоогдсон юм. Иймд МҮБХ-ны тэргүүлэгчид хуралдаж, Ө.Бат-Орших, Б.Пүрэвсайхан, Э.Даш, Б.Номиндалай, С.Майнбаяр нарын таван бөхөд хариуцлага тооцож, 2018 оны хоёрдугаар сарын 01-нээс 2020 оны хоёрдугаар сарын 1 хүртэл хоёр жилээр барилдах эрхийг нь түдгэлзүүлсэн билээ. Дээрх бөхчүүд 2019 оны зургадугаар сарын 14-ний өдөр БЗД-ийн Шүүхийн захирамж, Нийслэлийн шийдвэр гүйцэтгэх газрын албадан гүйцэтгүүлэх даалгаврын хамт МҮБХ-ны тэргүүн Б.Бат-Эрдэнэд өргөдөл гаргаж, өөрсдийн буруутай үйлдлээ ухамсар­лаж, дахин ийм алдаа гаргалгүй, монгол бөхийн нэр төрийг эрхэмлэж явахаа амлаж, барилдах эрхийг нь сэргээж өгөхийг хүссэн юм. МҮБХ-ны тэргүүлэгчид дээрх бөхчүүдийн өргөдлийг хүлээн авч хэлэлцээд, шийтгэлийн хугацаанаас 70 гаруй хувийг эдэлснийг харгалзаж үзэн санал хурааж, олонхийн саналааар тэдний барилдах эрхийг сэргээхээр шийдвэрлэлээ” гэжээ.

Нэгэнт эрх нь сэргээгдсэн гэж үзсэн бөхчүүд өчигдөр барилдахаар “Бөхийн өргөө”-нд ирсэн ч аварга Ч.Санжаадамба нар эсэргүүцэн бараг бүх бөхчүүд барилдаанаас татгалзахад хүрсэн тул МҮБХ-ны дэд тэргүүн Ц.Магалжав допинг хэрэглэсэн бөхчүүдийг хасч, сорилго барилдааныг явуулах шийдвэр гаргасан. Улмаар талбайд гараад байсан улсын заан Б.Пүрэвсайхан дэвжээнд мөргөн, талбайг чөлөөлснөөр сорилго барилдаан эхэлсэн юм.

Нэг хэсэг нь бөхчүүдийг уучлан барилдуулахыг дэмжсэн, нөгөө хэсэг бөхчүүд нь допингийн эсрэг тэмцсэн энэ үйлдэл үндэсний их баяр наадам дөхсөн өдрүүдэд бөхийн ертөнцийг бужигнуулж мэдэхээр болж байна. МҮБХ-ны Тэргүүлэгчдийн шийдвэр хүчинтэй юу, шүүхийн шийдвэрийг яах вэ, бөхчүүдийн эсэргүүцэл баяр наадмыг бойкотлоход хүрэх үү гэхчлэн олон асуулт урган гарч ирж байна. Үндсэндээ амралтын хоёр өдөр өрнөсөн үйл явцад үндсэндээ дийлэнх олонхийн зүгээс Үндэсний бөхөд допинг хэрэглэхийг “хүлээн зөвшөөрлөө” гэсэн ойлголт өгсөн ч байж магад. МҮБХ-ны удирдлагууд нь хүртэл “Допингтой бөх, допинггүй бөх” гэж зарлаад, нэгэнт энэ сэдвийг олны анхааралд аваачлаа. Нэг талаар сайн хэрэг. Бөхчүүд допингийн эсрэг зогсч байгаа нь ч зөв. Хөврүүлэн хөөвөл олон асуудал дагуулдаг бөхийн ертөнц нутаг усаараа талцах бус ”Допингтой”, “Допинггүй” гэж хуваагдаж байгаа нь нэг бодлын шударга  ч юм шиг. Гэхдээ асуудал, асуултын аль аль нь бий.