24Баримт.МН сайт  долоо хоногийн лхагва гараг бүрт аймгийн ИТХ-ын дарга нарын 24 баримтыг уншигч танд хүргэж байх болно. Цагаан толгойн үсгийн дарааллаар Архангай аймгийн ИТХ-ын дарга Б.Өсөхбаяртай холбоотой  24 баримтыг дэлгэе.

 Баримт 1. Бидэрийн Өсөхбаяр нь Архангай аймгийн Батцэнгэл сумын уугуул.

Баримт 2. Тэрбээр мал зүйч мэргэжилтэй.   Гэхдээ  мань хүн намтартаа улс төр судлаач хэмээн нэмж бичсэн байна лээ. Тэгэхээр Удирдлагын академийг дүүргэсэн юм болов уу даа.

Баримт 3.   Эхнэр гурван хүүхдийн хамт амьдардаг. Түүний эхнэрийг Амгалан гэх бөгөөд аймгийн ЭМГ-т статистикч аж

Баримт 4.  Б. Өсөхбаяр даргын  санхүүгийн эх үүсвэр нь   ломбард аж.   Магадгүй  мань хүн эдүгээ   ИТХ-ын дарга болсон тул ломбард нь Банк бус санхүүгийн байгууллага болж өсч томорсон байхыг үгүйсгэх аргагүй.

Баримт 5.  Б.Өсөхбаяр 1995 он хүртэл хаана ямар ажил эрхэлж байснаа намтараа бичээгүй  байх юм. Бодвол  наймаа панз үсэргэж явсан байх.

 Баримт 6. Түүний ажил амьдралын гараа  төрж өссөн Батцэнгэл сумынхаа ЗДТГ-ын мэргэжилтэн гэх албан тушаалаас эхэлжээ.   Хугацааны хувьд нэгхэн жил.

 Баримт  7.  УИХ-ын ээлжит сонгуулийн дараа мань хүн ажлаа өгчихөөд  гудамжинд дөрвөн жил лааз өшиглөсөнгүй.  “Чингэлт-Уул” ХХК байгуулж, захирлаар нь ажиллаж.   Эрхэм даргын  байгуулсан ААН –ийг эхнэр нь эдүгээ үргэлжлүүлж,  эдийн засгийн асуудлыг  нь шийдэж яваа.

Баримт 8. Компаний  байгуулж,  дөрвөн жил  аймгийн төв, Улаанбаатарын  хооронд жим гартал  худалдаа эрхэлсэн бас ч үгүй халаасандаа овоо хэдэн төгрөгтэй түүнийг  МАН ивээлдээ авч ээлжит сонгуульд намаа дэмжиж, сумандаа сонгуулийн менежерээр ажиллахыг санал болгосон гэдэг. Ингэж тэрбээр  улс төрд хөл тавьжээ.  Мэдээж түүний хичээл зүтгэл талаар болоогүй  2000 оны намар Батцэнгэл сумын Засаг даргаар сонгогдов.

Баримт 9.  Намдаа үнэнч  зүтгэсэн, эдийн засгийн хувьд намаас санхүүжилт харахгүйгээр хоёрын зэрэг арга хэмжээг элбэгхэн зохион байгуулах чадвартай болсон түүнд итгэл үзүүлэн  2005 онд аймгийн МАН-ын дэд даргаар томилох нь тэр.  Өсөхбаяр  уг албан тушаалд дөрвөн жил ажиллажээ.

Баримт 10. Өсөхбаяр эзэмшсэн мэргэжлээрээ ердөө ганцхан жил ажилласан нэгэн. Гэхдээ даргаар. Тодруулбал, 2009-2010 онд Цөм сүрэг үржлийн төвийн даргаар.

Баримт 11. Малч зүйч мэргэжилтэй түүнд архангайчууд хөгжил цэцэглэлтээ даатгасан байх юм. Он цагийн хувьд 2010 он. Аймгийн ЗДТГ-т Хөгжлийн хэлтсийн даргаар томилогдсон явдал түүний тархинд  өшөө дээш  сэнтий ахих  мөрөөдөлд умбуулсан байж ч мэднэ.  Харин түүнтэй тухайн үед мөр зэрэгцэн алба хашиж явсан нөхдүүдийн  яриагаар бол  Архангай аймагт  Барилга, архитектатурын мэргэжлээр сургууль төгссөн боловсон хүчин олдоогүй тул тэс өөр мэргэжилтэй түүнийг томилсон  гэнэ.  Нөгөөтэйгүүр, эл албан тушаал түүнийг улс төрчдөд ойр байхын эхлэлийг  тавьсан гэдэг.

Баримт 12.  Малын бэлчээрт  мал дагаж үзээгүй шахам мал зүйч маань  улс төр дэх байр сууриа  ийн  бататгасаар. Үүнийг нь  2012-2016 онд аймгийн  ИТХ-ын төлөөлөгчөөр сонгогдон барьцаа лавшруулж авсан  явдал гэрчлэх аж.

Баримт 13. Эдүгээ тэрбээр Архангай аймгийн ИТХ-ын  даргаар ажиллахын зэрэгцээ  МАН-ын дэд дарга, үндэсний бөхийн холбооныхоо тэргүүлэгч гэсэн хавсарсан албан тушаалуудтай.

Баримт 14.  УИХ-ын 2016 оны ээлжит сонгуулийн дараа Архангай аймгийн ИТХ-ын анхдугаар хуралдаанаар /2016 оны  долдугаар сарын 18-ны өдөр/ ИТХ-ын даргаар Бидэрийн Өсөхбаярыг сонгосон байдаг. Аймгийн ИТХ-ын төлөөлөгч сонгох сонгуулийн 39 мандатын 13 буюу 33.4 хувийг Ардчилсан нам, 26 буюу 66.6 хувийг МАН-аас   нэр дэвшигч нар авсан.  Өсөхбаярын    олонхийн саналыг авах ажиллагаа өдөржин шөнөжин үргэлжилсэн гэх яриа байдаг.  Овоо ч хэдэн төгрөгийг зарцуулсан юм  даг уу даа.

Баримт 15. Архангайнхан л  мэддэг, танидаг байсан түүнийг эдүгээ монгол даяар мэддэг болсон. Энэ нь өөрийнхөө цалинг шинэчлэн тогтоосон тухай мэдээлэл цахим ертөнцөөр цацагдсанаас үүдэлтэй.  Тодруулбал, аймгийн ИТХ-ын даргын үндсэн цалин нэг сая байсныг нэмсэн тухай  1,700,900 төгрөг болгон шинэчлэн тогтоосон явдал.   Гэхдээ  хөөрхий тэр үед орон даяар цалин нэмж таарсан юм билээ.

Баримт 16. Ингэж  анх олонд   танигдсан тэрбээр  байсхийгээд л хэл аманд өртөж орхино.   Хамгийн сүүлд гэхэд л  2018 онд хөөн хэлэлцэх хугацаа дууссан гэдэг  хуулийн зүйл заалтаар үйлдсэн хэрэг нь хэрэгсэхгүй болж,  ялаас мултарч байсан удаатай.

 Баримт 17. Архангай аймгийн Иргэдийн хурлын төлөөлөгчийн дарга Б.Өсөхбаяр, Цэнхэр сумын иргэдийн хурлын дарга Ж.Эрдэнэцогт нар Архангай аймгийн Иргэдийн төлөөлөгчдийн хурал”-ыг 2018 оны дөрөвдүгээр сарын 18-нд хуралдаагүй байхад, хуралдаж “Газар орон нутгийн тусгай хэрэгцээнд” авах тухай асуудал хэлэлцсэн мэтээр хуурамч тогтоол үйлдсэн байдаг.

Баримт18.   Дээрх хэргийг  Авлигатай тэмцэх газрын Мөрдөн шалгах хэлтэс  шалгаж, тус газраас хэрэгт яллах дүгнэлт үйлдүүлэхээр прокурорт шилжүүлж байжээ.

Баримт 19.  Шалгалтын явцад  Архангай аймгийн Иргэдийн хурлын төлөөлөгчийн дарга Б.Өсөхбаяр нь аймгийн ИТХ нь хуралдаагүй байхад хуралдсан мэтээр хуурамч тогтоол үйлдсэн, Цэнхэр сумын иргэдийн хурлын дарга Ж.Эрдэнэцогт нь сумын ИТХ-ыг хуралдаагүй байхад хуралдсан гэх хуурамч тогтоол үйлдсэн, тус аймгийн засаг дарга Ц.Мөнхнасан нь дээрх баримт бичгүүдийг хуурамч гэдгийг нь мэдсээр байж Ашигт малтмал Газрын тосны газрын Кадарстрын хэлтэс хүсэлтийг нь уламжилж, гарын үсэг зурсан нь нотлогджээ.

Баримт 20.  Тэр байтугай,  аймгийн удирдлагууд  хуурамч тогтоолоо  Ашигт малтмал газрын тосны газарт хүргүүлсэн байдаг.

Баримт 21. Ашигт малтмалын газраас   Цэнхэр сумын нутаг дэвсгэрт байрлах “Шоронгийн ам” нэртэй газарт 4.75 га газрыг бичил уурхайгаар ашиглах боломжтой гэсэн дүгнэлт гарсан нь тэдэнд хууль завхруулах боломж болсон гэлтэй.

  Баримт 22. Эрхэм албан тушаалтнууд   уг дүгнэлтээ үндэслэл болгон таван жилийн хугацаатайгаар бичил уурхайгаар ашиглах гэрээ байгуулсан хууль бус үйлдэл нь илэрч, шуугиан тарьж байв.

   Баримт 23.  Прокуророос дээрх гэмт хэрэг нь баримтаар нотлогдон тогтоогдсон боловч, Эрүүгийн хуулийн ерөнхий ангийн 1-10 дугаар зүйлийн 1 дэх хэсэгт зааснаар “гэмт хэрэг үйлдснээс хойш нэг жил” өнгөрсөн нь хэргийн хөөн хэлэлцэх хугацаа дууссан үндэслэлээр хэрэг бүртгэлийн хэргийг хааж шийдвэрлэсэн байдаг.

Баримт 24. Архангайнхан түүнийг  УИХ-ын гишүүн Ж.Мөнхбатын хүн гэлцдэг ч үнэн хэрэгтээ Ганзоригийн хүү Тэмүүлэнтэй маш  ойр  байдаг юм билээ.   Түүний хууль бус үйлдлүүд нь нэгэнт ил болсон тул орон нутгийн сонгуульд түүнийг дэмжихгүй хэмээн  нутгийн олон нь  ярилцаж байна лээ.

Тиймээс нэр бүхий хүмүүс нь Монгол улсын төрийн албаны тухай хуулинд зааснаар Монгол улсын үндсэн хууль, бусад хуулийг хүндэтгэж, сахин биелүүлэх, өргөсөн тангарагтаа үнэнч байх, эх орон ард түмнийхээ тусын тулд иргэний ёсоор төрийн ашиг сонирхолд захирагдан өөрт олгогдсон бүрэн эрхийн хүрээнд ажиллах, Төрийн албаны болон төрийн албан хаагчийн ёс зүйн хэм хэмжээ, төрийн байгууллагын соёл, дэг журмыг сахиж, төрийн байгууллага, албан хаагчийн нэр хүндийг эрхэмлэн дээдлэх гэсэн үндсэн үүргүүдийг биелүүлээгүй учир, дээрх шалтгаан нөхцөлийг арилгах арга хэмжээ авч, хариуцлага хүлээлгэх, гэмт хэргээс урьдчилан сэргийлэх тухай холбогдох бусад хууль тогтоомжийг сахин биелүүлэхийг ийнхүү Нийслэлийн Прокурорын газраас мэдэгдэл гарган шаарджээ.