УИХ-д “Ээ ийм гишүүн байдаг юм уу” гэх  тодотголд хамрагдах гишүүн нэлээд хэд бий. Тэдний нэг нь О.Батнасан.  Энэ эрхмийн талаар сураг тавих аваас   “уулзаж байгаагүй, нэрийг  нь дуулсанаас цаашгүй” гэх хүн олон таарав. Харин  мэргэжил нэгт нэгэн танил маань “ Хуралдаа суудаггүй  шахуу нөхөр. Тасалсан өдрийнхөө тоогоор зургаад цохиж явсан шүү” гэх нь тэр. Ингээд бодохоор    түүнийг  зөвхөн ховдчууд л, тойргийнх нь хэд л зүс мэддэг  юм биш үү.   “УИХ-д  бүртгэлтэй ч  юм шиг, бүртгэлгүй  ч  юм шиг явж ирсэн О.Батнасан гэх УИХ-ын гишүүний   24 баримтыг хүргэж байна.

Баримт 1. Ховд аймгийн Булган суманд төрсөн, торгууд ястан.

Баримт 2 . Тэрбээр айлын ууган хүү.  Эцэг Ц.Отгоо нь Ховд аймгийн Булган сумаас төрсөн анхны эрдэмтэн.

Баримт3. О.Батнасан гишүүн   УИХ-ын чуулганы нэгдсэн хуралдааныг үе үе тасалж орхидог нь түүний багийн хүмүүжилтэй холбоотой байж мэднэ.  Дунд сургуулийн  сурагч байхдаа сав л хийвэл хичээлээ пялчихдаг нөхөр байж. Өөрөө ч бага насныхаа тухай  “Аавын зураг сургуулийн хананд хадаатай.  Гэрийн даалгавар хийхгүй ирэх,  тасалж  самбарын өмнө зогсох тоолонд  багш нар  маань  “Эрдэмтний хүү ийм байх ч гэж дээ” хэмээн дурссан байдаг.

 Баримт 4. Түүний анхны эзэмшсэн мэргэжил нь бага ангийн багш.  Арван жилийн сургуулиа  боломжийн дүнтэй төгссөн ч уралдаант шалгалтад бүдэрсэн тэрбээр  Архангай аймгийн Багшийн сургуулийн хуваарь авчээ.

 Баримт 5. Мань эр хоёрдугаар курст элссэн  жилээ Архангай аймгийн МХЗЭ-ийн   үүрүүдийг татан буулгахад гар бие оролцож,  оюутны зөвлөл байгуулан, 1990 оны цагаан морин жилийн МХЗЭ-ийн XX их хуралд төлөөлөгчөөр сонгогдож явсан удаатай.   Энэ утгаар  нь түүнийг  Ардчилсан хувьсгалын партизаны хэмжээнд үзэх нь бий.

Баримт 6. Багшийн коллежийг төгссөнийхөө дараа Нийслэлийн 82-р сургуульд бага ангийн  багш, Замын цагдаагийн газарт сургагч багшаар ажиллаж байжээ. Мэргэжлээрээ цөөхөн жил  ажилласан.

Баримт7. Боловсролын байгууллагаас урвасан шалтгаанаа  багшийн  цалингаар амьдрал авч явахад бэрх байсан тул аргагүйн эрхэнд  бизнест хөл тавьсан  гэж тайлбарладаг.

Баримт 8.   Гахай үүрэн, ганзагын наймаанд  арав гаруй жил хоол, нойргүй зүтгэсний хүчинд “Кондитер Улаанбаатар” ХХК  байгуулсан түүхтэй.  Эдүгээ  түүний компани 70 гаруй ажилтантай болтлоо өсч томорсон.

Баримт 9.  Эрх зүйч мэргэжлийг хожим эзэмшсэн.  Чингэс хаан дээд сургуулийг төгссөн.

Баримт 10. Бэл бэнчинтэй болсон тэрбээр   улс төрд орох сонирхол өвөртөлж, будилж явсаар 2014 онд МАН-д элссэн.

Баримт 11.  УИХ-ын 2016 оны  сонгуульд өрсөлдөхдөө бусдынхаа жишгээр нутгийнхандаа нүүрс, 40-ын бидон гэх мэтчилэн  юм, юм л тарааж явсан эр.

Баримт12. “Эрийг бүү бас далайг бүү янд” гэдгээр мань эр  харагдах төрх шигээ байгаа байхгүй нь мэдэгдэггүй нэгэн биш бололтой. Улстөрчийнх нь хувьд  сонирхох аваас  О.Батнасан нь  УИХ дахь МАН-ын бүлгийн зөвлөхөөс гадна МАН-ын бага хурлын гишүүн аж.

 Баримт 13.   “Ховд  торгон нутаг” сангийн ерөнхийлөгч,  “Минжит Булган” нутгийн  зөвлөлийн дарга гэсэн сонгуульт ажилтай.

Баримт 14.  Түүний талаар хэвлэлд бичсэнээр бол орос чихэр, бидон хоёроор сонгогчдын тархийг барьсан юм байх.  Ийн хэлэх үндэслэл ч бий аж.  Түүний байгуулсан  хувийн “Кондитер Улаанбаатар ” ХХК нь оросоос чихэр экспортлодог юм байна.

 Баримт1 5.  Энэ эрхмийг  намынх нь нөхдүүд С.Бямбацогтын хүн гэцгээдэг. Улс төрийн талаар “А” ч үгүй түүнийг С.Бямбацогт гишүүн УИХ дахь МАН-ын бүлгийн даргаар ажиллаж байхдаа зөвлөхийн сэнтийд залсан төдийгүй  чирж явсаар УИХ-ын сонгуульд өрсөлдөх квот өвөртлүүлж чадсан ачтан нь.

Баримт16.  NEWS.mn  сайтад өгүүлснээр,  С.Бямбацогт гишүүн андынхаа нэрийг УИХ-д дэвшүүлэх гэж оготны нүхээр орж гарч,   хоёр сонгууль дараалан ялалт байгуулсан тойргоо түүнд бэлэглэх дээрээ тулж байж, сугандаа хавчуулан байж зүтгэсээр  Монголын төрийг түшилцэх эрхийг бэлэглэсэн хэмээжээ.

Баримт17. О.Батнасангийн өрсөлдөгчид шаггүй нөхдүүд байсан.  АН-аас УИХ-ын гишүүн Д.Батцогт, “Ховд нутгийн хөгжлийн төлөө сан”-гийн тэргүүн Ш.Адьшаа,  Монголбанкны ерөнхийлөгч асан Пүрэвдоржийн хүү П.Хангал,  Д.Кёкүшюзан Батбаяр /АН/, Монголын Хэрэглэгчдийн эрх ашгийг хамгаалах нийгэмлэгүүдийн үндэсний холбооны гүйцэтгэх захирал ,Ховд аймгийн Засаг даргын орлогч асан У.Батзаяа /МАХН/, аймгийн Засаг дарга асан Г.Нямдаваа /МАН/, Боловсрол, соёл, шинжлэх ухааны дэд сайд асан Я.Төмөрбаатар/МАХН/ нар.

Баримт18.  Анх бүлгийн даргын зөвлөх болоход нь МАН дотор эргэлзэж, тээнэгэлзсэн олон нүд угтсан нь 2012 онд Ардчилсан намд элсэн, Ховд аймгийн Ардчилсан намын даргад өрсөлдөх боломж хайн гүйж явсан түүхтэй нь холбоотой.

Баримт 19. Урваж шарваж явсан тухайгаа мань хүн УИХ-ын2012 оны  сонгуульд МАН-аас нэр дэвших боломж хайсан ч олдоогүй тул  Ардчилсан намд хандсан хэмээн тайлбарласан  байдаг. Гэвч АН-ынхан түүнтэй мөр зэрэгцэн алхахаас татгалзсан тул буцаад намаа бараадсан нь бий.

Баримт 20. Харин 2016 оны сонгуульд  сонгогчид “О.Батнасан Ш.Адьшааг бардаг болов уу, яадаг бол” гэцгээн ярьж байсан ч   сайн нөхрийн дэмээр ялалт байгуулснаар  чихрийн худалдаачнаас хууль тогтоогч болжээ.

Баримт 21.  О.Батнасан гишүүний  ХОМ-ийг  сонирхох аваас  жилээс  жилд буурсан байх юм. Тухайлбал,  2015, 2016 онд  жилийн 130 сая төгрөгийн орлоготой хэмээн мэдүүлж байсан бол 2017, 2018 онд  орлогоо эрс бууруулж, жилийн 20 гаруйхан сая төгрөгийн орлоготой хэмээжээ. Өнгөрсөн 2019 онд  22 сая төгрөгийн орлоготой гэсэн байх юм..

 Баримт 22. Үл хөдлөх хөрөнгийн тухайд 740 сая төгрөгөөр үнэлэгдэх хоёр орон сууцтай, 89 сая төгрөгийн үнэлгээтэй 2 машинтай, 80 сая төгрөгийн мал, 70 сая төгрөгийн газар, 85 сая төгрөгийн үнэлгээ бүхий үнэт эдлэлтэй гэдгээ ХОМ-тээ бүртгүүлсэн байна.

Баримт 23.  Сонирхол татах өөр нэг сэдэв гэвэл мань хүн  хадгаламж, өр, зээл авлага байхгүй гэнэ. Хэдийгээр Кондитер-Улаанбаатар ХХК-ийнхаа 45 хувийг эзэмшдэг ч, ганц төгрөгийн ч ашиг олоогүй гэж харагдуулахаар ХОМ-ээ бөглөсөн нь анхаарал татаж байна.

 Баримт24.  Дэлхий даяар корона вирустэй тэмцэж буй цагт  УИХ-ын гишүүн О.Батнасан  Эрүүл мэндийн яаманд 12 мянган амны хаалт бэлэглэж байгаагаа  индрээсээ зарласан анхны  төрийн түшээ. Тойргийнхондоо бидон бэлэглэж байсан юм чинь   аж төрж буй Улаанбаатарын иргэдийг халдварт өвчнөөс сэргийлж байгаа нь хүн чанар шүү, угтаа.