-БИРЖ ДЭЭР ГАРГАНА ГЭДЭГ БОЛ ХЭЛБЭР. ӨГӨХ САНАЛ ТАВЬЖ БАЙГАА НЬ ЗАРАХ ГЭЖ БУЙ АГУУЛГА-

–Тавантолгойн 30 хувийг хувьчлах тухай асуудлаар та өөрийн цахим хуудсаар дамжуулан мэдээлэл хийсэн. Үүнтэй холбогдуулан ЗГХЭГ-ын дарга Л.Оюун-Эрдэнэ мөн мэдээлэл хийсэн байна?

-Д.Сумъяабазар өөрийг нь гүтгэсэн гэдэг үндэслэлээр С.Эрдэнэ бид хоёрыг цагдаад өгсөн байна. Тэрээр “Би Тавантолгойг бирж дээр гаргах гэж байгаа болохоос биш зарах гээгүй” гэжээ. Бирж дээр гаргана гэдэг бол хэлбэр. Тавантолгойн 30 хувийг өгөх санал тавьж байгаа нь зарах гэж буй агуулга. Ийм УУХҮ-ийн сайдтай төр засаг хаашаа явах вэ гэдгийг ойлгохгүй байна. Бирж дээр гаргана гэдэг нь зарна, хувьчилна гэсэн үг. Улсын мэдэлд байгаа зүйл хувь хүнд очно гэсэн үг.

“Уурхайгаа зарж болохгүй. Нүүрсээ заръя” гэдэг миний байр суурь огт өөрчлөгдөөгүй

Тавантолгойн 30 хувийг ард түмнээс нууцаар зарах хэлэлцүүлэг хаана ч хэзээ ч явагдаагүй. ҮАБЗ-ийн зөвлөмжийг ил болгох Л.Оюун-Эрдэнийн саналыг дэмжиж байгаа. Тавантолгой гэдэг сэдэв яригдсанаас хойш “Уурхайгаа зарж болохгүй. Нүүрсээ заръя” гэдэг миний байр суурь огт өөрчлөгдөөгүй. Байр суурь нь өдөр болгон өөрчлөгдөж байдаг Л.Оюун-Эрдэнэ шиг хүмүүс үүнийг ойлгохгүй байх.

“49 ХУВИЙГ ЗАРАХ АСУУДАЛ Ц.ЭЛБЭГДОРЖ, Ч.САЙХАНБИЛЭГ ХОЁРЫН УИХ-ААС НУУЖ ХИЙСЭН ҮЙЛ АЖИЛЛАГАА”

-Зөвлөмж ил болсоны дараа Ерөнхий сайд гарах асуудал хөндөгдөнө. Хэрэгжиж байгаа томоохон бүтээн байгуулалт зогсоно гэдэг мэдэгдэж байсан шүү дээ?

–Нэгдүгээрт, Бүтээн байгуулалт зогсохгүй. Тавантолгойн 30 хувийг худалдах хууль бус үйл ажиллагаа зогсох ёстой. Л.Оюун-Эрдэнэ ярьж байгаа зүйлийнхээ учрыг ойлгохгүй жаахан хүүхэд байсан яг хэвээрээ байна. 2012 оны сонгуулийн дараа хар машиныг З.Энхболдын компани оруулж ирсэн гэж гүтгэсэн. Үүнтэй холбогдуулан цагдаад өгч, хил гарахыг нь хориглосон байсан. Тэрээр торгуулиад, уучлал гуйж байсан. Мэдээж гүтгэлэг байв. Одоо ч мөн ялгаагүй ҮАБЗ-ийн шийдвэрийг ил болгосон гэж намайг гүтгэж байна. Ямар ч аюулгүй байдлын шийдвэрийн талаар яриагүй.

Хоёрдугаарт, 49 хувийг намайг мэдэж байсан гэж байгаа. Энэ бол ээлжит гүтгэлэг. 49 хувийг зарах асуудлыг би огт мэдээгүй бөгөөд энэ талаар хангалттай олон ярьсан. Энэ бол Ц.Элбэгдорж, Ч.Сайханбилэг хоёрын УИХ-аас нууж хийсэн үйл ажиллагаа. Үүнээс болж Ардчилсан нам сонгуульд ялагдсан.

“Л.Оюун-Эрдэнэ мөрдөн байцаалтын нууц задалсан. Энэ бол гэмт хэрэг”

Гуравдугаарт, Л.Оюун-Эрдэнэ Ц.Элбэгдоржийг хаана байгааг мэдсэн мөртлөө АТГ-т хэлээгүй. Ц.Элбэгдорж хаана байгааг Төрийн тусгай хамгаалалтын газар мэдэж байгаа. Л.Оюун-Эрдэнэ ийм зүйл яриагүй мөртлөө маш олон болчимгүй зүйл ярьж байна лээ. Мөрдөн байцаалтын нууц задалсан. Энэ бол гэмт хэрэг.

ТАВАНТОЛГОЙН 30 ХУВИЙГ ХУДАЛДАХ ХУУЛЬ БУС ҮЙЛ АЖИЛЛАГАА ЗОГСОХ ЁСТОЙ

-Тавантолгойг хувьчлах асуудал яригдаж байгаа юу?

-Д.Сумъяабазар бирж дээр гаргах, хувьчлах, зарах ялгаагаа ойлгодоггүй сайд байна. Энэ хүнтэй МАН хэр хол явах вэ. Яригдаж байгаа зүйл биш ээ. Хамгийн түрүүнд 73 дугаар тогтоолыг хүчингүй болго гэдэг шаардлагыг тавьж байгаа. Арилжаална гэдэг бол зарна гэсэн үг. Энэ тогтоолыг дагаад бүх юм явчихсан. Одоо бол хувьчлагдахад буюу зарагдахад бэлэн болсон гэсэн үг. 73 дугаар тогтоолыг өнөө, маргаашгүй хүчингүй болгох хэрэгтэй.

“Д.Сумъабазар сарын өмнө “ Бүх зүйл бэлэн болсон. Нэг тэрбум орчим ам.доллараар зарна” гэх агуулга бүхий зүйл ярьсан. Харин хоёр жилийн өмнө ярихдаа нэг биш олон тэрбум ам.долларын тухай ярьж байлаа”

УИХ-ын гишүүдэд тавьсан танилцуулгаа одоо ил болго. 2018 оны зургаадугаар сарын 29-ний өдрийн УИХ-ын хуралдаан нууц байгаагүй. Тавантолгойн ордын талаар бид олон жил ярьж байна. Анх УИХ-аар ярихдаа таван тэрбум ам.доллар, гурван тэрбум ам, доллар гэх мэт олон тоо хэлсэн юм. Үүнд юу орж байсан бэ гэхээр Тавантолгойгоос Гашуунсухайт чиглэлийн 200 орчим км төмөр зам, Тавантолгойгоос Зүүнбаян чиглэлийн 414 км төмөр зам. Энэ хоёр бүтээн байгуулалтийн мөнгийг “Эрдэнэс Тавантолгой” өгчихсөн. Цаана нь цахилгаан станц барих, нүүрс угаах үйлдвэр барих мөнгө үлдэж байгаа юм. Энэ мөнгөө хаанаас олох вэ гэхээр зээл авч болно. Хувьцаа зарах ямар ч хэрэг байхгүй. Нийт гарахаар төлөвлөж байсан зардлын 70-80 орчим хувь нь гарчихсан. Энэ бол улс төр биш. Яагаад гэвэл Тавантолгой монголын ард түмний компани. Бид бүгд 1072 хувьцаатай. Миний компанийн хувьцааг зарах гэж байж яагаад надаас асуухгүй байгаа юм. Би зөвшөөрөл өгөх эрхтэй хүн нь шүү дээ. 2,3 сая гаруй монголчууд бүгд зөвшөөрөхгүй гэвэл яах юм бэ. Тавантолгойн нөөц бол МАН, УУХҮ-ийн сайдын өмч биш. Ийм чухал юмыг УИХ-аар таван тэрбум ам. доллараар зарна гэж оруулчихаад одоо нэг тэрбум ам.доллараар зарах гэж байгааг нь ярихаар улс төр гэж байна. Үүнд ямар ч улс төр байхгүй. Би өөрийнхөө эрх ашгийг хамгаалж байна.