“И март” дэлгүүр  ашиг, хонжоог хайж, үнэ, ханшаа нэмсэн нь үнэн болж таарлаа.  Шударга өрсөлдөөн, хэрэглэгчийн төлөө газрын шалгалтаар “И март” дэлгүүр гуравдугаар сарын 11-ний өдөр хонины махны үнийг 1 кг тутамд 1200-1350 төгрөгөөр, үхрийн махыг 1 кг тутамд 1300-1700 төгрөгөөр тус тус нэмсэн нь тогтоогдсон тул Зөрчлийн тухай хуулийн дагуу 20 сая төгрөгийн торгууль оногдуулсан.

Уг нь Улсын онцгой комисс, Засгийн газраас коронавирусын халдвар, тархалтаас урьдчилан сэргийлэх зорилгоор гамшгаас хамгаалах бэлэн байдлын зэрэгт хэсэгчилсэн байдлаар шилжих шийдвэр гаргаад байгаа. Үүнтэй холбоотойгоор хүнсний гол нэрийн бүтээгдэхүүний хангамж, нийлүүлэлт, борлуулалтын байдал, нөөцөд хяналт тавьж, нийлүүлэлтийн болон үнийн түвшинг тогтвортой байлгах, үнийн хөөрөгдөл, зохиомол хомсдол үүсгэх, дамлан худалдаалахад хяналт тавьж ажиллахыг Шударга өрсөлдөөн, хэрэглэгчийн төлөө газар болон холбогдох бусад төрийн захиргааны байгууллагуудад үүрэг болгосон.

Гэтэл дээрх тогтоол, шийдвэрүүдийг үл тоон “И март” дэлгүүр махны үнийг нэмсэн байдаг. Энэ нь иргэдийн гомдлоор ил болж, шалгалтын багийнхан очиход ч тус дэлгүүрийнхэн “үнийг нь нэмээгүй” хэмээн гүрийсээр байсан тухай уншигч танд хүргэж байсан билээ. Тэр бүү хэл,  тв -ээр махны үнэ нэмээгүй хэмээн улаан цайм мэлзэцгээсэн.

“И март” сүлжээ дэлгүүрийн тохижилт, барааны чанар, ая тухтай байдал зэргээрээ иргэдийг татдаг нь гарцаагүй. Гэвч тийм байдал нь бараа бүтээгдэхүүний үнийг үндэслэлгүйгээр нэмэх шалтгаан биш гэдгийг хаа хаанаа мэднэ.

Бэлэн байдлын үед махны үнийг нэмсэн байна хэмээн холбогдох байгууллага 20 сая төгрөгийн торгууль ногдуулсан гэсээр атал “БИД ҮНЭ НЭМЭЭГҮЙ” гэж мэлзсээр байгаа нь Монгол Улсын хууль тогтоомж, дүрэм журмаас дээгүүр загнадаг гэдгийг нь бататгаж буй хэрэг. Үнэн хэрэгтээ “И март”-д 20 сая төгрөгийн торгууль ногдууллаа гэхэд сарын байтугай өдрийн орлоготой нь харьцуулахад юу ч биш.

Дээр дурдсанчлан, хонины махны үнийг 1 кг тутамд 1200-1350 төгрөгөөр, үхрийн махыг 1 кг тутамд 1300-1700 төгрөгөөр тус нэмсэн байдаг. Тэгэхээр энэ нөгөө талдаа буюу “И март”-ын хувьд “ЦОЧИР ҮНЭ” гэж үзэхээр байгаа юм. Учир нь тус сүлжээ дэлгүүрийнхэн 14 хоногийн хугацаанд хямдрал зарлаж, ихэнхдээ “ЦОЧИР ҮНЭ”-тэй болгодог. Тэр нь үндсэндээ сонгосон бараа бүтээгдэхүүнээ 10-40 хувиар хямдруулж, түүнийгээ цочир үнэ хэмээн тайлбарладаг. Тэгэхээр махны үнийг ч гэсэн төрлөөс нь хамаарч 1200-1700 төгрөгөөр нэмсэн нь ЦОЧИР ҮНЭ гэхээс өөрөөр тайлбарлах боломжгүй юм.