УИХ-ын гишүүн  Б.Жавхлан Дархан-Уул аймагтаа МАН-аас нэр дэвшиж байгаа билээ. Түүнтэй холбоотой 24 баримтыг уншигч танд хүргэж байна.

 Баримт 1. УИХ-ын гишүүн Б.Жавхлан Сүхбаатар аймгийн уугуул боловч Дархан хот шилжиж очин, дунд сургуулиа дүүргэсэн.

Баримт 2.  МУИС-ийн Эдийн Засгийн Сургууль төгссөн. Эдийн засагч мэргэжилтэй.

Бартимт 3. Монголбанк хэмээх их айлын босгыг 1997 онд алхаж,  хянан шалгагчаас Монголбанкны тэргүүн дэд ерөнхийлөгч болтлоо өсч дэвшсэн нэгэн.

Баримт 4. Ер нь түүнийг сонирхох аваас банкирын тухай  өгүүлэх вий.  Худалдаа хөгжлийн банкинд ажиллаж байсан удаатай.

Баримт 5.  Банкир Б. Жавхлан тэрбум төгрөгөөр үнэлэгдэх орон сууцанд аж төрдөг.

Баримт 6.  Тэрбээр ХОМ-д 161 сая орчим  төгрөгөөр үнэлэгдэх малтай түүний  20 нь хурдан удмын адуу гэж  мэдүүлжээ.  Бас  40 сая төгрөгний үнэт эдлэлтэй  гэжээ.

Баримт 7. Түүнийг улстөрд Сү.Батболд хөтөлж авчирсан гэдэг. Гэхдээ МАН-ын дарга У.Хүрэлсүхтэй ойрын хамаатан, үеэлүүд гэх нь ч бий.

Баримт 8. Намтартаа Америкийн нэр бүхий сургуульд төгссөн гэж бичдэг ч угтаа хэлний курсэд л  суралцаж байжээ.

Баримт 9. Америкад сурч ажиллаж байхдаа Б.Жавхлан ЖДҮХСангийн захирал С.Төгсбилэгтэй танилцсан ба тэдний холбоо үргэлжилсээр түүнийг ЖДҮХСангийн захирлаар томилуулжээ.

Баримт 10. Б.Жавхлан иргэдийн боломжийг хулгайлсан ЖДҮ-гийн зээл авсан гишүүдийн нэгэн адил нэр бүхий компаниудад зээл олгуулахаар нөлөөлж, ХХААХҮ-ийн сайд Б.Батзориг болон ЖДҮХС-ийн захирал С.Төгсбилэг нар луу утсаар ярьж байсан гэдгийг өдөр тутмын хэвлэлүүд нотолж байжээ.

Баримт 11. Түүнийг ЖДҮХС-аас “Пример инвестмент групп” ХХК-иар 900 сая, “Жетте майнинг” ХХК-д 800 сая, “ Алтан олом” ХХК-д 250 сая төгрөг олгуулахад нөлөөлсөн гэж хэвлэл мэдээллийн хэрэгслүүдээр цацаж байжээ.

Баримт 12. Төрийн халамжийн бодлогыг хавтгайруулах хэрэггүй гэж үздэг. Халамжийн зарлага биш төсвийн орлого талдаа анхаарахыг чухалчилдаг. Гэхдээ өөрөө халамж болон танилын нүүрээр хөрөнгө оруулалтыг татдаг гэдгийг нотолсон нь ЖДҮ-чид болсноос нь харж болно.

Баримт 13. Спортын төрлөөс хоккей сонирхдог ба Монголын хоккейн холбооны тэргүүнээр ажилладаг.

Баримт 14. Үнэ тогтворжуулах хөтөлбөр, “Сайн” хөтөлбөрийн хүрээнд гурван их наяд төгрөгийн зөрчил хяналт шалгалтаар илэрсэн ба Монголбанкны ерөнхийлөгч асан Н.Золжаргалыг АТГ  шалгаж эхэлсэн ба Б.Жавхлан нь энэ үед Монголбанкны хяналт шалгалт хариуцаж байсны хувьд хамтдаа шалгуулах ёстой гэж  хэвлэлүүд онцолж байжээ. Энэ бол ганц Н.Золжаргалд хамаарах бус Монголбанкны тэргүүн дэд ерөнхийлөгчөөр ажиллаж байсан Б.Жавхлан ч бас хариуцлага хүлээх ёстой гэгдэж байжээ.

Баримт 15. Ерөнхий сайд Ж.Эрдэнэбатын Засгийн газрыг огцруулахад Шадар сайдын үүрэг гүйцэтгэгч У.Хүрэлсүхээр Ерөнхий сайдын үүрэг гүйцэтгүүлье гэж горимын санал гаргаж, ”Хүрэлсүхийн микрофон хийхээ боль” гэсэн эсэргүүцэлтэй тулгарч байв. Хууль тогтоогчийн хувьд хуулийн мэдлэггүйгээ харуулсан хэрэг ба энэ нь Сангийн сайдад санаархаж хуулиас давсан санал гаргасан гэж хэвлэлүүд онцолж байв.

Баримт 16. Тэрбээр дээр дурдсанчлан У.Хүрэлсүхийг Ерөнхий сайд болгохоор зүтгэсэн нь төрөл садны холбоогоо ч дахин ашиглах гэсэн бодолтой байсных болов уу.

Баримт 17. Анх удаагаа УИХ-ын гишүүнээр ажилласан тайлангаа дарханчуудад тайлагнасан ба бусад гишүүдийн адил төсвийн хөрөнгө оруулалт болон бусдын хийсэн ажлаар хүүдэгнэсэн нь ч бас итгэл хүлээлгэсэн сонгогчид нь таалагдсангүй.

Баримт 18. Түүнийг дарханчууд танихгүй шахам байсаар дөрвөн жилийг үдэж байна. Товчхондоо Б.Жавхлан өөрийн төгссөн дунд сургуулийн хамт төгссөн болон дээш, доош 2-3 төгсөлтийнхнөө л “тойглосоор” иржээ.

Баримт 19. Б.Жавхлан жижиг тойргоос сонгогдож, тэрхэн хэсгээ багахан усалсан учраас томсгосон тойргоор сонгуулиа зохион байгуулах болсон нь түүнд хүнд цохилт болсон. Дарханы сонгогчид нь түүнээс Дарханы замаа нэхэж буй бөгөөд Дарханчуудын өмнөөс энэ замын асуудалд анхаарал тавьсангүй, бид амь нас, эд хөрөнгөөрөө хохирч байна гэж гомдоллож байна.

Баримт 20. Томсгосон тойргоос нэр дэвшихээр Б.Жавхлангийн хувьд ялалт байгуулах нь эргэлзээтэй. Тиймээс Дархан-Уул аймгийн Засаг дарга С.Насанбаттай “гар” барьсан. Тэгсний хүчинд өөрийн хүмүүсээ Засаг даргын Тамгын газар болон аймгийнхаа төрийн байгууллагуудад шургуулж, бүр даргаар томилуулсан.

Баримт 21. УИХ-д анх удаагаа сонгогдон ажилласан банкираас сонгогчид нь ихийг хүлээсэн. Гэвч амалсан мөрийн хөтөлбөрөө хэрэгжүүлсэн нь хомс. Харин ч хуучин улс төрчидтэй адил хувиа борлуулж, довоо шарлуулахыг урьтал болгож, нэрээ хугалав. Нэр хугарахаар яс хугар гэдэг сэн.

Баримт 22. Эдийн засгаа дэмжихийн тулд пандемик бонд гаргах хэрэгтэй гэж  санал гаргаж байсан байна. Энэ удаагийн эдийн засгийн хямрал 2008 болон  2010 оны хямралуудтай харьцуулахад  бүтцийн хувьд өөр байна гэж УИХ-ын гишүүн Б.Жавхлан дүгнэж байжээ.

Баримт 23. Сошиал сүлжээг эрх  баригчид хяналтдаа авахыг эрмэлзэж ирсэн ба хувь хүний үзэл бодлоо илэрхийлэх талбарыг хаахаар санаархсан үйлдлүүд гарч байсан. Сошиал сүлжээнд хурууны хээ, регистрийн дугаараараа орох асуудлыг ч Б.Жавхлан ярьж байлаа. Залуу хүний хувьд  энэ тал дээр илүү дэвшилтэт үзэлтэй байж болмоор.

Баримт 24. Тэр өөрийгөө олон нийтэд Ерөнхий сайд У.Хүрэлсүхтэй холбоотой гэж мэдэгдэхийг хүсдэггүй ч үйл хөдлөлөөрөө байнга илэрхийлдэг. Тиймдээ ч Ерөнхий сайд У.Хүрэлсүх ЖДҮ-чдээ нэр дэвшүүлэхгүй гэж байсан ч Б.Жавхланг тойрог руу нь илгээхээр болсон. Энэ тухайгаа өөрөө цахим орчинд Ерөнхий сайд У.Хүрэлсүхийн багт багтаж, нэр дэвших эрхээ авлаа гэж мэдэгджээ.