Баян-Өлгийн дотоодын нийт бүтээгдэхүүний хэмжээ нэмэгдэж, улсаас авах татаас багасаж, дотоодын аялал жуулчлал 2016 онтой харьцуулахад бараг 4 дахин нэмэгдэж, 25.000-д хүрчээ. Мөн иргэдийн хадгаламж 122 тэрбум төгрөг болж, хүний хөгжлийн индекс, хөгжлийн үзүүлэлтүүдээрээ тэргүүлэх аймгийн нэг болсон байна.

Тус аймагт бүтээн байгуулалт эрчимтэй өрнөж, 2020 онд л гэхэд 155 тэрбум төгрөгийн ажил хийжээ. Сүүлийн 4 жилд 80 км авто зам, 12 сургууль, 7 дотуур байр, 5 соёлын төв, төрийн үйлчилгээний 6 байр, 73 гүүр, 20 км гэрэлтүүлэг зэрэг 327 тэрбум төгрөгийн хөрөнгө оруулалт хийсэн аймгийн Засаг дарга А.Гылымхан УИХ-ын дарга Г.Занданшатарт танилцуулсан байна.

Сүүлийн 4 жилд 80 км авто зам, 12 сургууль, 7 дотуур байр, 5 соёлын төв, төрийн үйлчилгээний 6 байр, 73 гүүр, 20 км гэрэлтүүлэг зэрэг 327 тэрбум төгрөгийн хөрөнгө оруулалт хийсэн

УИХ-ын дарга Г.Занданшатар Баян-Өлгий аймагт ажиллах үеэрээ мал аж ахуй, газар тариаланг эрчимжүүлж бүс нутгийн экспортын төв болох, Асгатын ордыг эдийн засгийн эргэлтэд оруулж, үр өгөөжийг нь орон нутгийн хөгжил, иргэдийн амьжиргааг дээшлүүлэхэд чиглүүлэх, өсөн нэмэгдэж байгаа аялал жуулчлалын урсгалыг бодлогоор дэмжиж орлогоо нэмэгдүүлэх зэрэг боломжийг бодит ажил хэрэг болгохын төлөө санаачилгатай, зүтгэлтэй, нэг зорилготой ажиллахыг хүссэн байна.

Тэрбээр Өлгий сумын 7-р цэцэрлэг, 7-р бага сургууль, бүрэн дунд боловсролын 5-р сургуулийн үйл ажиллагаатай танилцав. Бага сургууль, цэцэрлэг нь аж ахуйн аргаар барьсан байртай бол 5-р сургууль зориулалтын бус байранд үйл ажиллагаа явуулдаг юм байна. 60 хүүхдийн цэцэрлэгт 175 хүүхэд хүмүүжиж, 350 хүүхдийн бага сургуульд 510 сурагч суралцаж, 928 хүүхдийн багтаамжтай 5-р дунд сургууль 2360 сурагчтай байна. Хоёр сургууль хоёулаа 3 ээлжээр хичээллэдэг, цайны газар, урлагийн танхим, номын сангүй аж. 7-р сургууль төвийн дулаан, цэвэр, бохир усны сүлжээнд холбогдоогүй, 5-р сургууль сонгон суралцах болон дугуйлан, секцээ бямба, ням гарагт явуулдаг.

Тиймээс шинэ байр, өргөтгөл барьж өгөх хөрөнгийг төсөвт суулгаж өгөхийг УИХ-ын даргаас хүслээ. Иргэдтэй хийсэн уулзалтын үеэр эдгээр сургууль, цэцэрлэгийн барилгын асуудлыг шийдвэрлэх боломжтой гэдгээ Боловсрол, шинжлэх ухааны дэд сайд Г.Ганбаяр хэллээ.

Эвээ эрхэмлэж, монгол казах иргэдийн хооронд яс хаях гэсэн явуургүй оролдлоготой хатуу тэмцэх зэрэг саналыг дэвшүүллээ

Баян-Өлгий аймгийн иргэд ажилгүйдлийг багасгах, нэгдсэн эмнэлгийн оношлогооны тоног төхөөрөмжийг шинэчлэх, бүсийн нэмэгдлийг дорвитой шийдвэрлэх, Өлгийн нисэх буудлыг олон улсынх болгож өргөтгөх, эвээ эрхэмлэж, монгол казах иргэдийн хооронд яс хаях гэсэн явуургүй оролдлоготой хатуу тэмцэх зэрэг саналыг дэвшүүллээ.

УИХ-ын гишүүн Т.Аубакир говийн аймгуудад өрнөж байгаа томоохон бүтээн байгуулалтын ажлуудтай танилцсаныхаа дараа Баян-Өлгий аймгийн ажилгүй байгаа залуусыг эдгээр бүтээн байгуулалтад оролцуулах санаачилга гаргаж, эхний ээлжинд 10 залууг Дорноговь аймгийн МСҮТ-д 200.000 төгрөгийн тэтгэлэгтэй сургахаар болсноо танилцууллаа. Эдгээр залуус ирэх хавар гэхэд мэргэжил эзэмшиж, сургалтаа дүүргээд эх орныхоо ирээдүйг тодорхойлох бүтээн байгуулалтад оролцож, ажилтай орлоготой болно. Казахын ард түмэн Монгол Улсын өнцөг булан бүрд өрнөсөн Налайх, Багануур, Шарын голын уурхайг байгуулах, атар газар эзэмших зэрэг их бүтээн байгуулалтад гар бие оролцож, алдар гавьяагаа дуурсгаж байсан сайхан уламжлалыг шинэ үеийнхэн өвлөн уламжлуулах нь нэр төрийн хэрэг гэдгийг хэлсэн гэж УИХ-ын Хэвлэл мэдээлэлтэй харилцах хэлтсээс мэдээллээ.