Я.МОНГОЛ

Дэлхийн PubG спортын хам­гийн хүчтэй багуудыг сандаргаж, мэргэжлийн, өндөр зохион байгуулалт бүхий сая сая ам.долларын орлоготой Хятадын багуудтай эн тэнцүү өрсөлдсөн ZEUS CLAN гэж хэн бэ? Саяхан болж өнгөрсөн PubG Mobile ДАШТ-д хоёрхон жилийн өмнө байгуулагдсан ийм нэгэн баг Хятадын хамгийн алдартай, хамгийн хүчтэй хоёр багийн араас гуравдугаар байрт орж, олон улсад эргэлт буцалтгүй танигдлаа. Монголын CS:GO хүчтэй гэдгийг мэдрүүлж, Азийн аварга болсон МONGOLZ багийн амжилтын буухиаг эдгээр тамирчид үргэлжлүүлж, PubG Mobile-ын төрөлд Дэлхийн аваргын гутгаар байрыг эзлэв.
PubG сонирхон тоглогч хэсэг хүүхдүүд нэгдэж ZEUS нэртэй баг байгуулаад, яваандаа мэргэжлийн цахим спортын түвшинд хичээллэж эхэлсэн нь хоёрхон жилийн өмнө юм. Явцын дунд багийн зарим гишүүд солигдож, жил орчмын өмнөөс одоогийн бүрэлдэхүүнээрээ тоглож эхэлсэн байна. Багийн үүсгэн байгуулагч С.Ундрах Япон улсад амьдардаг бөгөөд багийн гишүүдтэйгээ өдөр бүр онлайнаар холбогдон заавар, зөвлөгөө өгч, бэлтгэл сургуулилт нь хангагдахад алсаас тусалдаг тухай багийнхан нь ярьсан. Монголд байгаа гишүүн О.Бат-Оргил (Ronin), Б.Золбоот (Zyol), Н.Дулаанжаргал (Abely), Б.Тэнгис (ICY), Б.Билгүүн (Godless) нар бол 16-21 насны хүүхдүүд юм.
Тэд PubG Mobile Global Championship тэмцээнд орохын тулд эхлээд бүсийн тэмцээнд тогложээ. Ийнхүү 13 орны баг өрсөлдсөн “Wildcard” бүсийн тэмцээнд бүтэн сарын турш тоглоод, нийт оноогоороо тэргүүлж, дараагийн шат болох Тайванийн Тайпей бүсийн тэргүүн 10 багтай тоглож ялснаар PubG Mobile Global Championship тэмцээнд оролцох цорын ганц эрхийг авчээ. Бүсийн тэмцээнд тоглох явцдаа өдөрт 2-3 цагийн халаалт хийж хоорондоо тоглоод, оройд нь тэмцээндээ тоглож, бусад цагаар тархи толгойгоо амраах гэж агаарт алхах нь олонтаа байсан тухайгаа тэд ярив.
Ийнхүү ДАШТ-ий эрхээ өвөртлөн Дубайг зорьсон залуусын хувьд хамгийн хүчтэй өрсөлдөгч нь Хятадын багууд байхыг таамаглаж байж. Тэдний төсөөлөл ёсоор тэдгээр багуудтай оноогоороо урд хойноо орон тоглосоор тэмцээний сүүлийн мөчид гуравдугаар байрт орлоо. Тэр хүртэл түрүүлж ч болохоор нөхцөл байдалтай байсан нь олон хүнийг гайхшруулсан юм. Тайлбарлагч нар тэднийг Монголын “underdog” баг гэж олонтаа дурдсан нь хэний ч мэдэхгүй, санаанд оромгүй баг ийм амжилт үзүүлж буйг гайхан биширсэн хэрэг байлаа.
Монголын багийн хоёр тоглогч тэмцээний шилдэг 10 тоглогчийн жагсаалтад багтсаныг мөн дурдах хэрэгтэй. Тус багийнхан энэ жил PubG Mobile-ын дэлхийн хамгийн том тэмцээн PMCO-д оролцох урилгаа аваад байгаа ажээ. Дашрамд дурдахад, олон улсад зорчих хөдөлгөөн хязгаарлагдаад буй цар тахлын энэ үед ZEUS CLAN багийнхан азтай ч гэмээр тохиолдлоор Дубайд хүрч, тэмцээндээ оролцож чаджээ. Нэгдүгээр сарын 8-нд Катарын Доха хотод болсон жүдогийн Грандприкс тэмцээнд Монголын тамирчид тусгай үүргийн онгоцоор нисэх гэж буйг дуулаад Монголын цахим спортын холбоо болон бусад хүмүүс УОК-т хүсэлт гаргаж, ном журмын дагуу шинжилгээнүүдээ өгч, тэрхүү онгоцонд дайгдан очоод хүрэл цомын эзэн болжээ.