Монгол Улсын Засгийн газрын хуралдаанаар “Залуучуудыг хөдөлмөрт бэлтгэх” төсөл, хөтөлбөр баталжээ. Сүүлийн гурван сар ажилгүй байгаа ч ажил хийх, амьдралаа өөрчлөх хүсэлтэй, 18-34 насны 1,000 хүнийг нэг сарын хугацаагаар  сая төгрөгийн тэтгэлэгтэй сургах гэнэ.

Энэ сонин шийдвэрийг сонсоод ойлгох гэж хэчнээн оролдоод ч учрыг нь үл олох өчнөөн зүйл ухаан самууруулаад болох биш. Нэгэн зүйл: Энэ сургалтаар, эртэч, амьдралын идэвхтэй хэв маяг, ажил, мэргэжлийн чиг баримжаа олгох, зөвлөгөө өгч, өөрийгөө танин мэдэх, зөв дадал хэвшил, харилцаа хандлага, эх оронч үзэл санааг ойлгуулж, бие бялдрын зөв хүмүүжил, гэр бүлийн эерэг харилцаа, соёл төлөвшүүлэх юм байна.

Сонсоод байхад ийм амьдралын зөв төлөвшлийг Япон улс бол сургуулийн өмнөх боловсролын хүрээнд олгодог юм гэсэн. Манайд бол 30 гарсан хойно нь заах нь л дээ.

Нэгэн зүйл: Энэ сургалт нэг сард нэг сая төгрөгийн тэтгэлэгтэй. Өглөө эрт босох, гэр бүлийн эерэг харилцааг заалгасныхаа төлөө нэг сая төгрөг авах нь. Гэтэл жинхэнэ ажил мэргэжил олж авч байгаа их дээд сургуулийн оюутнууд сургуульдаа төлбөр төлдөг, мэргэжил эзэмшиж байгаа МСҮТ-ийн сурагчид сарын 100 мянган төгрөгийн тэтгэлэгтэй.

Нэгэн зүйл: Хэнийг сургах юм бэ… Үнэхээр өглөө унтаад орой босдог, хүнтэй зөв харилцаж чаддаггүй, эх оронч бус, соёлгүй хүмүүсийг сургах уу… Ажилгүй ч, ар гэрээ аятайхан аваад явж байгаа, зөв сайхан төлөвшилтэй хүн энд нь багтаад ирвэл яах вэ.

Нэгэн зүйл: Сургалтын зорилго дотор мэргэжлийн чиг баримжаа олгох гэсэн үг харагдана. Их, дээд сургуульд 4-5, МСҮТ-д 2-3 жил сурч байж эзэмшдэг мэргэжлийг ганц сард олгочихож барах уу. Тэр олон хүнд бөөнд нь нэг мэргэжил олгох хичээл заах уу, 40 хүн өөр өөр мэргэжил сонирхож байвал 40 өөр багш хичээл заах уу. За яахав, зардал гаргаад төрөл бүрийн мэргэжил олгочихдог юм гэхэд ажлын байр нь хаана байна аа. Ажлын байр нь байх юм бол манай залуучууд хичээл заалгасан заалгаагүй хийчихнэ л дээ.

Нэгэн зүйл: Засгийн газар хуралдаанаараа энэ жил 5000 залууг  ийм сургалтад хамруулна гэж. Гэсэн атлаа энэ жил 11.8 тэрбум төгрөгийг Хөдөлмөр, нийгмийн хамгааллын сайдын батлагдсан төсвийн багцад зохицуулж, Хөдөлмөр эрхлэлтийг дэмжих сан санхүүжүүлнэ гэсэн байх юм. Таван мянган хүнийг сургах юм бол таван тэрбум төгрөг л зарцуулах баймаар юм. Таван тэрбумыг хэн дундаас нь хаашаа шингээх гэж байна гэсэн хар бас л төрж сууна.

Ингээд бодохоор энэ бол ердөө МАН-ын Ерөнхийлөгчийн сонгуулийн бэлтгэл ажлын л нэг хэсэг гэдэг нь харагдаад болох биш. УИХ, Засгийн газар, аймаг сум бүхэлдээ МАН-ынхан зайгүй чигжчихсэн энэ улс орон ийм өндөр тэтгэлэгтэй сургалтад ердөө МАН-ынхаа л гишүүдийг, албан тушаалтнууд өөр өөрийн цүнх баригчаа л ирүүлнэ. Заах хичээл нь ч ойлгомжтой, коммунист намаа л магтан дуулж, сайрхан, төрийн бүх институци нэг намд байж л Монгол Улс сэргэн мандана, тэгэхгүй бол мөхнө  гэсэн хичээл байх нь. Аягүй бол сонгууль будилаантуулдаг цүнх баригчид нь  эхнэр, нөхөртэйгөө ийм сургалтад хэд, хэд суугаад амжина.

#МонголынМэдээСонин #Дугаарын60мөр