Дэлхийн хамгийн баян хүн болоод байгаа Tesla, SpaceX компаниудын гүйцэтгэх захирал Илон Маск твиттер хуудсандаа үе үе маргаантай мэдэгдэл хийж, шуугиан дэгдээдгээрээ алдартай.

Ням гарагт тэр твиттер хуудсандаа татварын асуудлаар Ардчилсан Намын ахмад сенатор Берни Сандерстай “шөргөөцөлдсөн” байна.

Социалист үзэлтэй Сандерс нь баялгийг нийгэмд тэгш хуваарилах талаар их ярьдаг улстөрч юм. Өчигдөр Сандерс өөрийн твиттер хуудсанд “Онцгой баян хүмүүсээс бусадтай ижил тэгш татвар төлөхийг бид шаардах ёстой. Урагшаа” гэж бичсэн байна.

Хариуд нь Маск “Би амьд байгааг тань үргэлж мартаад байх юм” гэж тохуурхжээ.

Дараа нь тэр “Намайг илүү олон хувьцаагаа зар гэж байгаа юм уу? Берни?” гэж асуусан юм.

Сандерс одоогоор Маскийн асуултад хариулт өгөөгүй байна.

Өнгөрсөн долоо хоногт Илон Маск бараг $7 тэрбумтай тэнцэх Tesla-гийн хувьцаагаа зарсан юм. Твиттерийн дагагчдынхаа дунд санал асуулга явуулсны дараа тэр $5 тэрбумын хувьцаагаа зарсан бөгөөд Баасан гарагт нэмж $1 тэрбум гаруйг заржээ.

Тэрбумтнуудыг татвар бага төлдөг гэсэн шүүмжлэл гарах болсонтой холбоотойгоор тэр зориуд хувьцаанаасаа зарж, татвар төлөхөөр болсон байна.

Америкийн тэрбумтнуудын хөрөнгийн ихэнх нь хувьцаа хэлбэртэй байдаг. Хувьцааны үнэ ханш бизнесийн үр дүнгээс хамааран өсөхтэй зэрэгцэн тэдний хөрөнгө ч бас өсдөг юм. Гэхдээ энэхүү өсөлтөөс тэрбумтнууд татвар төлдөггүй, зөвхөн хувьцаагаа зарж, бэлэн мөнгө болгосон тохиолдолд татвар төлдөг.

Сүүлийн үед Ардчилсан Намын улс төрчид хөрөнгийн өсөлтөөс татвар авах санаа гаргах болсон. Сандерс 2016, 2020 онуудад Ардчилсан Намаас ерөнхийлөгчийн сонгуулийн сунгаанд өрсөлдөөд Хиллари Клинтон, Жо Байден нарт ялагдаж байсан түүхтэй.

Тэрбээр одоо Сенатын төсвийн байнгын хороог даргалдаг.

Тэрбумтнуудаас татвар авах санааг боловсруулсан сенатор Рон Уайден өнгөрсөн долоо хоногт Маскийн твиттер санал асуулгыг шүүмжилж бичихдээ “Тэрбумтан бүр Америкийн жирийн иргэд шиг жил бүр татвар төлдөг болох ёстой. Дэлхийн хамгийн баян хүн татвараа төлөх эсэхийг Твиттерийн санал асуулгаар шийдэж болохгүй” гэж байжээ.

Аравдугаар сард Илон Маск твиттер хуудсандаа “Тэд бусад хүмүүсийн мөнгийг үрж дуусгаад одоо бидний мөнгийг авахаар айсуй” гэж Уайдены саналыг шүүмжлэн бичиж байв.

Эх сурвалж: The Guardian