Оросын Кемеров мужийн Кузбасс дахь “Листвяжная” уурхайд дараалсан дэлбэрэлт болон түймэр гарснаар 51 хүн амь үрэгдсэний 45 нь уурхайчин, зургаа нь  уулын аврагч байлаа гэж ОХУ-ын Онцгой байдлын яам  арваннэгдүгээр сарын 26-нд мэдээлжээ.

Осол гарах үеэр гүний уурхайд 285 хүн байсны ихэнхийг гаргаж амжсан байна. Арван нэгдүгээр сарын 26-ны байдлаар газар дороос гарч ирсэн 63 хүнийг эмнэлэгт хэвтүүлэн эмчилж байгаа  гэж Кемеров мужийн амбан захирагч Сергей Цивилев мэдэгдээд хамгийн сүүлд аврагчид уулын аврагч Александр Каковряшинийг амьд мэнд олж гаргаж ирсэн, биеийн байдал нь хүнд байна гэж  мэдээлснийг РЕН ТВ телевиз дамжуулжээ.

Ер нь дэлбэрэлт болсноос хойш нэг хоногийн туршид уурхайн гүнд нуранги дор байсан хүмүүсийн бие  бүгд хүнд байдалд байгаа юм байна. Эмч нарын хэлснээр бол арваннэгдүгээр сарын 26-ны байдлаар дөрвөн хүн сэхээн амьдруулах тасагт байгаагийн нэг нь уулын аврагч, бусад нь уурхайчин байжээ.

Арваннэгдүгээр сарын 26-нд “Листвяжная” уурхайн удирдлагыг ОХУ-ын Эрүүгийн хуулийн 217 дугаар зүйл буюу “Үйлдвэрлэлийн байрны аюулгүй байдлын шаардлагыг зөрчиж хүний аминд хүрэх нөхцөл бүрдүүлсэн” гэсэн зүйл ангиар буруутган саатуулаад байгаа юм байна. Оросын Мэргэжлийн хяналтын газар тус уурхайд энэ 2021 онд хийсэн шалгалтаар 914 зөрчил илрүүлэн засахыг анхааруулж байсан гэнэ. Оны эхнээс  мэргэжлийн хяналтынхан “Листвяжная” уурхайд 127 удаа шалгалт хийж, зөрчил дутагдлын улмаас ажлыг нь есөн удаа зогсоон уурхайг хааж, нийтдээ дөрвөн сая орчим рублиэр торгож  байжээ.

“Энэ уурхайд ноцтой үйл явдал жил бүр л гарч байдаг юм. Уурхайчнаар ажилладаг Борис
Пиялкин гэхэд л хөлөө хугалаад эмнэлэгт хэвтэж байгаад саяхан эдгэрээд гарсан. Тэгээд л дөнгөж ажилдаа ороход нь энэ түймэр дэлбэрэлт боллоо” гэж уурхайчны хамаатан Анжелика “360” хэвлэлд ярьжээ.

Таван жилийн өмнө  энд бас техникийн аюулгүй байдлын дүрэм зөрчсөний улмаас осол гарч хүний амь үрэгдэж байсан юм байна.

Саяын аймшигт осол болохоос өмнө  уурхайчид уурхайн гүнд метан хийн түвшин ерийнхөөс өндөр байгаа талаар гомдол мэдүүлж байсан гэж Оросын Ерөнхий прокурорын орлогч Дмитрий Демешин хэлснийг ТАСС агентлаг дамжуулсан байна. Түүний хэлснээр бол уурхайд гарсан дэлбэрэлт яг метан хийтэй холбоотой гэх нь эрт байгаа, мөрдөн байцаалт, шалгалтаар тодорхойлох гэнэ.

Оросын Мөрдөн байцаах хороо бас Сибирийн Мэргэжлийн хяналтын газрын орон нутгийн салбарын хоёр ч байцаагчид мөн  ажлын хариуцлага алдсаны улмаас хоёроос дээш хүний аминд хүрсэн хэмээн эрүүгийн хэрэг үүсгэн шалгаж эхэлсэн байна. Тэднийг хянан шалгах явцдаа үйлдвэрлэлийн аюулгүй байдал, хөдөлмөр хамгааллын талаар хайхрамжгүй хандаж, үнэн зөв дүгнэлт гаргаагүй гэж үзэж байгаа юм байна.

Кузбасст болсон уурхайн ослын асуудлаар ажиллах Засгийн газрын комиссыг Ерөнхий сайдын орлогч Александр Новак тэргүүлнэ гэж ОХУ-ын Засгийн газрын тэргүүн Михаил Мишустин мэдэгдсэн байна.

Мишустин Засгийн газрын шуурхай хуралдааны үеэр өнөөгийн хамгийн эн тэргүүний зорилт бол бэртэж гэмтсэн  уурхайчдад туслах явдал гэжээ. Кемеров муж руу  эмнэлгийн нэн шаардлагатай эм хэрэгсэл, тоног төхөөрөмж бүхий тусгай онгоц илгээсэн байна.

Уурхайчдын гэр бүлд сэтгэл санааны дэмжлэг үзүүлэх хэрэгтэй. Хүмүүс ойр дотныхоо хүмүүсийг алдаад байгаа болохоор сэтгэл санаагаар дэмжих хэрэгтэй” гэж Мишустин хэлжээ.

Уурхай байрладаг Прокопьевск хотын мэр Вячеслав Старченко “Листвяжная” уурхайд осол гардаг яг тэр өдөр энэ албан тушаалд томилогдсоноо тэмдэглэн хүлээн авалт зохион байгуулж байсан хэмээн Кемеров мужийн амбан захирагч Сергей Цивилев түүнийг албан тушаалаас нь огцруулсан байна. Уурхайд осол гарч, олон хүн амь эрсдэн гурав хоногийн гашуудал зарлаад байхад Старченко зоогийн газагт зочид урин тэмдэглэж байсан гэнэ. Хотын дарга асан Вячеслав Старченко харин үүнийг няцааж, ямар ч хүлээн авалт, баяр ёслол болоогүй, энэ асуудлаар хуулийн байгууллагад хандана гэжээ.