Украинд арванхоёрдугаар сарын нэгнээр төрийн эргэлт хийх гэж байна гэсэн мэдээлэл хүлээн авсан гэж Украины Ерөнхийлөгч Владимир Зеленский  хэвлэлийн бага хурал дээр мэдэгдсэн байна. “Украины төлөөлөл, Рината Ахметовын оролцоотойгоор Оросын төлөөлөлтэй тохиролцон  Украинд төрийн эргэлт хийх гэж байгаа тухай зөвхөн тагнуулынхны мэдээлэл төдийгүй утсаар ч бидэнд мэдээлэл ирж байна” гэж тэр хэлжээ.

Ийн төрийн эргэлт хийхийн тулд нэг тэрбум ам.доллар босгох тухай ч яриа байгаа юм байна.

Украины ерөнхийлөгч бас энэ мэдээллүүд нь өөрийнх нь эсрэг болон Украин улсын эсрэг “Ахметовыг дайсагнуулахын” тулд гарсан гэж үзэж байгаагаа хэлжээ. “Энэ бол маш том эрсдэл гэж санагдаж байна. Би бол төрийн эргэлт хийнэ гэдэгт итгэхгүй байна, Ахметов ч шууд үүнийг хийнэ гэдэгт итгэхгүй байна. Би энэ бүхнийг эцсийн маш том алдаа гэж харж байна” гэж Зеленский мэдэгджээ.

Украины парламент Дээд Радагийн депутат, Радикал намын дарга Олег Ляшко үүний өмнө ерөнхийлөгч Владимир Зеленский арванхоёрдугаар сарын 1-нээс улс орондоо цэргийн байдал тогтоох гэж байна хэмээн мэдэгдэж байсан юм.

Рина́т Леони́дович Ахме́тов нь Украины Донецк мужид 1966 онд төрсөн бизнесмэн, улстөрч, олигарх, эдийн засагч, банкир тэрбумтан. “Бүс нутгийн нам”-аас 2006-2007, 2007-2012 онуудад Дээд Радагийн гишүүн байсан хүн. 2021 оны есдүгээр сарын байдлаар түүний хөрөнгө 7.6 тэрбум доллар гэж Forbes дэлхийн хамгийн баян хүмүүсийн жагсаалтын 327 дугаарт оруулсан байна.

Харин бизнесмэн Ринат Ахметов ерөнхийлөгч Зеленскийн хэлсэн өөрийг нь төрийн эргэлтэд бэлтгэж байна гэсэн үгийг тайлбарлаж “Намайг төрийн эргэлтэд бэлтгэж байна гэсэн Владимир Зеленскийн үг нь огт үндэсгүй худал. Ерөнхийлөгч ямар сэдлээс үл хамааран ийм худал мэдээлэл тараасанд би эгдүүцэж байна. Би бол Крымтэй, миний төрсөн Донбасстай  нэгдмэл Украины төлөө л байдаг хүн. Миний үйл ажиллагаа ч үүнийг нотолно” гэж Ахметов өөрийн System Capital Management  холдингийн  Facebook хуудсандаа бичжээ.