Хөдөлмөр, халамжийн үйлчилгээний салбарын бодлого зорилт, шинээр хэрэгжих ажил арга хэмжээг танилцуулах, зөвлөн чиглүүлэх, тэдний санал санаачилга, тулгарч буй асуудлыг сонсохоор Хөдөлмөр, халамжийн үйлчилгээний ерөнхий газрын дарга Л.Дашдэмбэрэл дүүргүүдэд ажиллаж байна. Энэ удаад Баянгол дүүргийн Хөдөлмөр, халамжийн үйлчилгээний хэлтсийн албан хаагчидтай уулзаж, мэдээлэл танилцуулга өгч, нээлттэй ярилцлаа. Тэрээр, Хөдөлмөр эрхлэлтийн үйл ажиллагаанд түлхүү анхаарч, ажил мэргэжилдээ эзэн болж, иргэдэд хүрч үйлчлэх шаардлагатайг онцолсон. Дэлхийн банкнаас олгодог жижиг зээлийн талаар Дэлхийн банкны зөвлөх Б.Батбаяр, Албан хэрэг хөтлөлтийн талаар анхаарах асуудал сэдвээр ХХҮЕГ-ын ахлах мэргэжилтэн Н.Амархүү нар албан хаагчдад мөн мэдээлэл зөвлөгөө өглөө.
Тус дүүрэгт ажиллах үеэрээ өрхийн үйлдвэрлэл эрхлэгчдийн бараа бүтээгдэхүүнийг борлуулдаг “Монголд үйлдвэрлэв худалдааны цэг”, “Уран зангилаа” төв, “Түгээмэл хөгжил” ТББ-ын Бие даан амьдрах төвөөр зочилж үйл ажиллагаатай нь танилцсан юм.
Уран зангилаа төв дээр “Нэг ч хүнийг ардаа орхихгүй” ТББ гар урлалын сургалтыг ажил хөдөлмөр эрхэлдэггүй иргэдэд зохион байгуулдгийн дотор хөгжлийн бэрхшээлтэй иргэд ч хамрагддаг аж. Тэднийг нийгэмшүүлэх, чадавхжуулах, ажилд зуучлах цогц арга хэмжээг зохион байгуулахад хөдөлмөр эрхлэлтийг дэмжих төсөл хөтөлбөр өгөөжтэй, том дэм болж байгаа талаар тус ТББ-ын тэргүүн Д.Дашдулам дурдсан.
Баянгол дүүрэгт үйл ажиллагаа явуулдаг хөгжлийн бэрхшээлтэй иргэдийн “Түгээмэл хөгжил” ТББ-ын Бие даан амьдрах төв 160 гишүүнтэй бие даан амьдрах хөтөлбөр, тэгш хамран сургах боловсролын хөтөлбөр, нийгмийн оролцооны хөтөлбөр гэсэн үндсэн гурван чиглэлээр үйл ажиллагаа явуулдаг. 17 үндсэн ажилтны 12 нь хөгжлийн бэрхшээлтэй иргэн байна. Тэдний зүгээс хөгжлийн бэрхшээлтэй иргэдийг бие даан амьдрахад туслах ажилтан ажиллуулдаг. Энэ үйлчилгээг тогтворжуулахыг тулд төсөвт мөнгө суулгах, бараа бүтээгдэхүүн борлуулахад дэмжлэг үзүүлэхийг хүсэж байгаагаа уламжиллаа. Мөн дүүрэг хороо бүрд ажил хариуцсан мэргэжилтэнтэй хөдөлмөр, халамжийн үйлчилгээний ерөнхий газрын бүтцээр дамжуулан орон нутгийн иргэдэд бие даан амьдрах үйлчилгээг хэрэгжүүлэх боломжийн талаар санал солилцлоо.
ХХҮЕГ-ын дарга Л.Дашдэмбэрэл, “Энэ онд Эмэгтэйчүүдийн хөдөлмөр эрхлэлтийг дэмжих хөтөлбөр”, “Ногоон ажлын байрыг дэмжих хөтөлбөр” шинээр нэмэгдэж хөдөлмөр эрхлэлтийн нийт 7 хөтөлбөр 28 арга хэмжээг зохион байгуулна. Энэ хүрээнд тохирох туслалцааг авах боломжтой талаар тайлбарлаж, тавьсан асуудлуудад тодорхой хариулт өглөө.
Үйл явдал гэрэл зурагт 👇