Т.Эрдмаа

УИХ-ын даргын захирамжаар байгуулсан Ажлын баг  хуралджээ. Энэ үеэр УИХ-ын дарга Г.Занданшатар “Өнгөрсөн долоо хоногт сэтгэлийн дуудлагаараа нэгдсэн залуус жагсаалынхаа үеэр тавьсан шаардлагад бодитой хариу өгөх ёстой. Тэдний тавьсан шаардлагын гол агуулга нь тэгш бус байдлыг газар авахуулахгүйн төлөө, шударга ёсны төлөө, төр, засгийг үүргээ биелүүлж, ажлаа хий гэдгийг шаардсан зүй ёсны шаардлага байлаа. Бусдын явцуу эрх ашгаас ангид байж, үнэт зүйлийнхээ төлөө нэгддэг, зөвхөн ярьдаг биш, үйлдлээрээ нөлөөлдөг шинэ үе ирж байгаад бахархахаас өөр аргагүй” гэж онцоллоо. Мөн тэрбээр  “Хэмнэлтийг өөрсдөөсөө эхэлье. УИХ-ын зардлыг өмнөх төсвийн тодотголоор 5.6 тэрбум төгрөгөөр танасан. Гишүүний зардал 11 хувиар, Байнгын хорооны зардал 16 хувиар хасагдсан. Дахин 10-аас багагүй хувиар танахаас өөр аргагүй. УИХ-ын харьяа байгууллагын удирдлагуудтай уулзаж, үүрэг өгсөн. Даваа гаригаас /2021.04.11/ эхлэн УИХ-ын харьяа байгууллагуудын удирдлага хотод “570, 200″ зэрэг том оврын машин унахгүй. Төрийн хэмнэлтийг манлайлан ажилла” гэжээ.

УИХ-ЫН ДАРГЫН ЗАХИРАМЖААР ТОМ АВТОМАШИН УНАХГҮЙ АЛБАН ТУШААЛТНУУД

Засгийн газрын гишүүн

Улсын дээд шүүхийн ерөнхий шүүгч

Үндсэн хуулийн цэцийн дарга

Улсын ерөнхий прокурор

Ерөнхийлөгчийн Тамгын газрын дарга

Улсын Их Хурлын Тамгын газрын Ерөнхий нарийн бичгийн дарга

Засгийн газрын Хэрэг эрхлэх газрын Тэргүүн дэд дарга

Үндэсний аюулгүй байдлын зөвлөлийн нарийн бичгийн дарга

Ерөнхий аудитор

Монголбанкны ерөнхийлөгч

Санхүүгийн зохицуулах хорооны дарга

Шүүхийн ерөнхий зөвлөлийн дарга

Хүний эрхийн үндэсний комиссын дарга

Сонгуулийн ерөнхий хорооны дарга

Үндэсний статистикийн хорооны дарга

Төрийн албаны зөвлөлийн дарга

Авлигатай тэмцэх газрын дарга, дэд дарга

Аймаг, нийслэлийн Засаг дарга

Тэгвэл энэ  шийдвэрийг үндэслэн зарим яамд хэмнэлтийн горимд орсоноо мэдэгдлээ.  Тухайлбал, БОАЖ-ын сайдын тушаалаар яамны сайд, дэд сайд, төрийн нарийн бичгийн дарга, бүх шатны дарга нар болон харьяа байгууллагуудын дарга нарыг хөдөө орон нутагт албан томилолтоор ажиллахаас бусад үед албаны машин ашиглахыг хоригложээ. Тушаалд дурдсанаар “БОАЖЯ-ны эд хөрөнгийн бүртгэлд байгаа, удирдах ажилтнуудын ашигладаг автомашинуудыг зохих журмын дагуу дуудлага худалдаагаар худалдаалж, орлогыг улсын төсөвт төвлөрүүлэх арга хэмжээг шуурхай зохион байгуулахыг үүрэг болгосон байна.

Цахим хөгжил, харилцаа холбооны яамны мэдэгдэлд “Манай яам албаны хэрэгцээнд автомашингүй бөгөөд хөдөө орон нутгийн томилолтод автомашин түрээсэлдэг.  Ерөнхий сайдын шийдвэрийн дагуу цаашид ч тус яаманд автомашины худалдан авалт хийхгүй бөгөөд хэрэгцээ шаардлагаас хамаарах автомашин түрээслэх бодлого баримталж байна. Иймд, бидэнтэй ажиллах автомашин түрээсийн компаниуд холбогдоно уу” гэжээ.

Эрчим хүчний яам болон салбарын Төрийн өмчит хувьцаат компани /ТӨХК/-иудын дарга, удирдлагууд албаны автомашин ашиглахыг хориглолоо. Зөвхөн сайд болон гүйцэтгэх захирлууд хөдөө орон нутагт албан томилолтоор ажиллахаас бусад үед жижиг оврын суудлын автомашин ашиглах юм. Түүнчлэн бүх шатны удирдлагын багт байгууллагаас үзүүлдэг дараах хөнгөлөлтийг тодорхой хугацаанд цуцалжээ. Үүнд: “Гар утасны төлбөрийн хөнгөлөлтийг цуцлах, түүхт ой, баяр ёслол зэрэг арга хэмжээнүүдийг тэмдэглэхгүй байх, байгууллагаас үзүүлдэг зарим төрлийн нийгмийн халамжийн үйлчилгээг тодорхой хугацаанд хойшлуулах чиглэл өгсөн байна. Мөн үйлдвэр, компаниудын гүйцэтгэх захирлууд тэвчиж болох бусад зардлыг эрэмбэлж, танилцуулахаар болов.

Үндэсний Аудитын газраас хийсэн судалгаанаас үзвэл Монгол Улсад 2020 оны байдлаар төрд ашиглаж байгаа нийт 24 мянган автомашин байна. Үүнээс  зардал ихтэй 119 автомашиныг сонгож тооцоо хийхэд зардал нь нэг жилийн хугацаанд 1.7 тэрбум төгрөг болсон байгаа юм. Тодруулбал, шатахууны зардалд 361 сая, сэлбэг тос бусад зардалд 271 сая, дулаан зогсоолд 69 сая, жолооч нарын цалинд нэг тэрбум төгрөгийг 2020 онд зарцуулсан тайлан гарчээ.  Эндээс үзвэл зөвхөн автоммашины зардлыг хэмнэхэд л чамгүй мөнгө гараад ирж байна. Тэгэхээр төсвийн задаргааг дахин нягтлаад танавал хэмнэх мөнгө захаас аваад байгаа бололтой.

Ажлын багийн хуралдаанаас:

-2022 оны төсвийг хэмнэлтийг горимд шилжүүлэх, шаардлагатай бол 2022 оны төсөвт тодотгол хийх;

-төрийн бүх шатны байгууллагуудад хэмнэлтийн горимыг мөрдүүлж, зардлыг 10-аас доошгүй хувиар хэмнэх, бүтэц, чиг үүргийг хянаж, давхардлыг арилгах, удирдлагын орон тоо, зардлыг бууруулах;

-тансаг хэрэглээний болон бүх төрлийн архи, тамхины онцгой албан татварыг нэмэгдүүлэх асуудлыг судалж, хэрэгжүүлэх;

-төрийн байгууллагын зарим чиг үүргийг хувийн хэвшил, төрийн бус байгууллага, мэргэжлийн холбоодод шилжүүлэх, төрийн үйлчилгээг цахимжуулах замаар зардлыг бууруулах;

-төсвийн байгууллагын их засвар, тохижилт, тоног төхөөрөмж худалдан авах болон зөвлөх үйлчилгээний зардлыг тэвчих;

-төрийн болон орон нутгийн өмчит компани, үйлдвэрийн газруудын зардлыг 30-аас доошгүй хувиар хэмнэх замаар төсөвт төвлөрүүлэх татварын болон ногдол ашгийн орлогыг нэмэгдүүлэх;

-үйл ажиллагаа нь давхардсан, үр ашиг багатай төрийн болон орон нутгийн өмчийн аж ахуйн нэгж, байгууллагуудыг өөрчлөн байгуулах, татан буулгах саналаа Улсын Их Хуралд өргөн мэдүүлэх зэрэг чиглэлээр Төсвийн хэмнэлтийн тогтоолын төсөл боловсруулж, УИХ-аар хэлэлцүүлэх нь зүйтэй гэж үзэв.