Энтертайнмент
Samsung Galaxy Z Flip4 болон Galaxy Z Fold4 утсууд нь хамгийн уян хатан, олон талт хэрэглээг бий болгож, ухаалаг утасны зах зээлийн хэвшмэл байдлыг үүрд өөрчиллөө
2022 оны 8-р сарын 10-ны орой Улаанбаатарын цагаар 20:45 цагаас эхэлсэн Galaxy Unpacked арга хэмжээний үеэр Самсунг Электроникс нугардаг шилэн дэлгэцтэй дөрөв дэх үеийн Galaxy Z Flip4 болон Galaxy Z Fold4 утсуудаа Монголд танилцууллаа.
Samsung Galaxy нугардаг утсууд нь тэдний нээлттэй хамтын ажиллагааны бодлогод үндэслэн бүтээгдсэн ба цаашлаад хэрэглэгч гар утсаа өөрийнхөөрөө загварчлах шинэ боломжуудыг бий болгоод байна. Дэлхийд тэргүүлэгч компаниудтай байгуулсан хамтын ажиллагааны үр дүнд үндэслэн хийгдсэн эдгээр бүтээгдэхүүнүүд нь өнөөгийн хэрэглэгчдийн хүлээлтийг давж чаджээ.
Самсунг Электроникс компанийн гар утасны бизнес хариуцсан ерөнхийлөгч доктор Тэ Мүн Ро танилцуулгын үеэр “Бид инновацыг инновацыг ашигладаг жинхэнэ эздүүдэд нь зориулж загварчилдаг. Тэрхүү инновац нь таны өдөр тутмын амьдралыг улам хөнгөвчлөх, сайжруулахад зориулагдахаас гадна ухаалаг утасны салбарыг урагш АХИУЛАН, гар утас ямар байж болох вэ гэдгийг шинээр тодорхойлоход оршдог билээ.” хэмээсэн юм.
Энэхүү нээлтээрээ хэрэглэгчийн өмнө төсөөлж ч байгаагүй шинэ боломжуудыг танилцуулж, ухаалаг утасны хэрэглээний шинэ арга барилыг бидний амьдралд нэвтрүүлж, бүтээгдэхүүн үйлдвэрлэлийнхээ эд анги бүрт нягт анхааран маш нарийн түвшинд урласан гэдгээ мөн онцолсон юм.
Galaxy Z Flip4: Өөрийгөө өөрөөр илэрхийл
Galaxy Z Flip4 нь хэрэглэгчдийн хамгийн их ашигладаг функцуудыг улам сайжруулж, аль ч утсанд байхгүй хамгийн өвөрмөц дизайныг санал болгож байгаа бөгөөд өөрийгөө өөрөөр илэрхийлэгч хэн бүхэнд зориулан бүтээжээ. Энэхүү утсыг хувь хэрэглэгч өөрийнхөө сонирхолд нийцүүлэн бүрэн тохируулах боломжтой бөгөөд утасныхаа бүх интерфейсийг хүссэнээрээ өөрчилж чадна. FlexCam1, Quick Shot үйлдлийн тусламжтайгаар утсаа барилгүйгээр видео дуудлага хийх, хүссэн өнцгөөс зургаа даруулж, камер хоорондын шижилтийг асуудалгүй хийдэг болсон нь орчин үеийн контент бүтээгч, влогер залуучуудын хэрэглээг үнэхээр хялбар болгосон байна.
Мөн түүнчлэн сельфи хийхдээ Portrait горимыг ашиглан зургийн харьцаа алдалгүйгээр гадна талын жижиг дэлгэц дээрээсээ хянах боломжийг ч Quick Shot горим олгож байгаа бөгөөд зөвхөн үйлдлийн системийн хувьд сайжраад зогсоогүйн дээр өмнөхөөсөө 65% илүү өндөр гэрлийн мэдрэгчтэй2 Snapdragon® 8+ Gen 1 mobile platform нь зураг, видеог шөнө өдрийн аль ч үед ялгаагүй чанартай буулгахад тусална.
Samsung болон Meta компанийн түншлэлийн үр дүнд дээрх үйлдлүүд нь Facebook, Instagram, WhatsApp зэрэг хамгийн өргөн тархсан нийгмийг сүлжээний аппуудад ч бүрэн дэмжигдэх боломжтойг Instagram компанийн тэргүүн өөрөө нээлтийн үеэр танилцуулсан нь онцлог байлаа.
Galaxy Z Flip4 утасны SmartThings Scene тохиргоогоор3 дамжуулан утсаа нээлгүйгээр дуудлага хийх, мессежинд хариулах, машинаа түгжих гэх мэт маш олон үйлдэл хийх боломжтой. Ухаалаг утасны хамгийн чухал үзүүлэлтийн нэг болох цэнэг хураагуурын хувьд 3,700 мАц батарей болон Super Fast Charging горимоор дамжуулан хагас цагийн дотор 50% хүртэлх цэнэглэгдэх хурдтай болсон нь жижиг утсанд багтамгүй том дэвшил болжээ.
Galaxy Z Fold4: Алганд багтах компьютер
Нээлтийн үеэр Galaxy Z Fold4 нь Samsung компанийн тасралтгүй хөгжүүлж ирсэн олон инновацын үр дүнд бий болсон Galaxy цувралын хамгийн хүчирхэг утас болсныг итгэл төгс зарлалаа. Хамгийн их онцолсон зүйл нь үүний олон үйлдэлт (multitasking) чадвар бөгөөд хаалттай, нээлттэй болон дэлгэсэн үед ч утсаа янз бүрээр ашиглах боломжтой болсны дээр Android 12L буюу Google компаниас нугардаг, том дэлгэцтэй утсанд тусгайлан зориулж хөгжүүлсэн үйлдлийн системтэй анхны утас болж байна.
Шинээр нэмэгдсэн Taskbar4 функтэй болсон тул яг л комьютер ашиглаж байгаа мэт бүтэцтэй харагдах бөгөөд swipe gestures шинэ горимын тусламжтайгаар хэрэглэгч дэлгэцээ хуваах, нэмэлт жижиг цонх нээх эсвэл бүтэн дэлгэцээс шууд шилжих зэргээр утсаа бүрэн хянах боломжтой болжээ. Жишээлбэл Google болон Microsoft зэрэг тэргүүлэгч компаниудтай хийж буй стратегийн түвшний түншлэлийн үр дүнд Google Chrome, Gmail зэрэг олон апп хооронд зураг, файл чирэх, интернэт холбоосуудыг хуулах, дамжуулах мөн Google Meet-ээр видео дуудлага хийж байхдаа нэгэн зэрэг YouTube-ээс видео үзэх, тоглоом тоглох зэрэг үйлдлүүдийг маш хялбар гүйцэтгэх боломжтой болсон юм. Galaxy Z Fold4 утасны нугардаг том дэлгэц нь Microsoft Office-ийн бүхий л апп-уудыг хэрэглэхэд маш олон давуу талыг үүсгэж байгаагаас дурдвал: S Pen ашиглан зурах, тэмдэглэл хөтлөх, файл хадгалах зэрэг олон үйлдлүүд илүү хурдан, илүү хялбар болсон юм.
Камерны хувьд Galaxy Z Fold4 утасны 50мп өргөн камер болон 30 дахин татах Space Zoom5 дурангаар тоноглогдож өмнөхөөсөө илүү уян хатан, утасныхаа аль ч талаас илүү тунгалаг, сарнилт багатай зургуудыг саадгүй авах боломжтой болжээ. Өмнөхөөсөө 23%-иар сайжирсан гэрэл мэдрэгч нь таны авсан зургийг маш өндөр түвшинд боловсруулах функцтэй аж.
7,6 инчийн үндсэн дэлгэц нь танд төрөл бүрийн контентыг хамгийн өндөр чанартайгаар буюу 120Гц-н нягтралтайгаар үзэх боломжийг олгож байгаа бөгөөд Facebook, Netflix зэрэг компаниуд апп-аа хэдийн том дэлгэцэд тохируулан бүтээсэн байгаа учир та ямар ч төрлийн контентыг өмнөхөөсөө хэд дахин илүү чанартайгаар, илүү тухтайгаар хүлээн авах боломжтой. Хараахан том дэлгэцэд тохируулга хийгээгүй байгаа бусад төрлийн контент үйлчилгээг ч гэсэн Flex Mode Touchpad6 горимыг ашиглан ямар ч бэрхшээлгүй хүргэх аж.
Тоглоомын хорхойтнууддаа дуулгахад Galaxy Z Fold4 утас нь Snapdragon® 8+ Gen 1 Mobile Platform-тай учир тоглоом тоглоход хамгийн төгс төхөөрөмж болоод байна. Гоёмсог метал хүрээг бат бөх шилэн гадаргуутай хослуулж маш нарийн тооцоолсон нугардаг нимгэн ирмэг, илүү хөнгөн авсаархан шийдэлтэй учир уг утсыг ашиглахад улам таатай мэдрэмж төрүүлэх болно.
Хоёр утас хоёул бүтээгдэхүүнийхээ бат бөх байдлыг нэмэгдүүлэхийн тулд Armor Aluminium хүрээгээр тоноглогдож тусгайлан загварчилсан Corning® Gorilla® Glass Victus®+ шилэн гадаргуугаар нүүрэн талаа шийдсэн учир аливаа гаднын нөлөөнд хамгийн тэсвэртэй нугардаг дэлгэцтэй утас болсон гэдгийг Самсунг Электроникс компани бүрэн итгэлтэйгээр зарласан юм. Мөн түүнчлэн IPX8 зэрэглэлийн ус чийгний хамгаалалтай.
Galaxy Buds2 Pro: Төгс дуугаралт, төгс загварын хослол.
Утасгүй чихэвч нь өнөөгийн хэрэглэгчдийн байнгын хэрэглээ болоод байгаа үед Galaxy Buds2 Pro чихэвч Galaxy Z цувралын нээлтийн үеэр мөн танилцуулагдсан юм. Энэхүү чихэвч нь Hi-Fi 24bit Audio дэмжих учир сонсч буй хөгжмийн хэсэг, нот бүрийг алдалгүй сонсгож, эргономик дизайны шийдэл нь өмнөхөөсөө 15%-иар жижгэрсэн. Galaxy Buds2 Pro чихэвч нь хэрэглэгчдэд сонсож буй зүйлдээ бүрэн автаж орчноос тусгаарлагдах боломжийг олгож байгаан дээр дуудлага хийх үед орчны дуу авиаг таны ярианаас цэвэрлэх ANC технологитой.
Хамгийн гайхалтай шинэчлэл нь бусад төхөөрөмжүүдтэй холбогдох хамгийн боловсронгуй шийдэл нь юм. Хэрэглэгч ямар ч үед Galaxy Buds2 Pro чихэвчээ хэрэгцээт төхөөрөмжтэйгээ (гар утас, таблет компьютер) хялбархан холбож чадна. Нэгэн том дэвшил нь Auto Swtich7 хэмээх ТВ-ийнхээ хөтөлбөрийг чихэвчээрээ сонсч байхад танд дуудлага ирэх үед утасны дуудлага руугаа чихэвчээрээ хялбархан шилжих шинэ горимтой болсон нь юм.
Эх дэлхийн төлөө Galaxy
Мөн түүнчлэн “Эх дэлхийн төлөө Galaxy” санаачилгын хүрээнд энэ оны эхэнд нээлтээ хийсэн Galaxy S22 загварын утаснуудын үйлдвэрлэлд дахин боловсруулсан хуванцар ашиглаж эхэлсэн бөгөөд зөвхөн гаднах хайрцгаар зогсохгүй доторх эд ангиуддаа хүртэл шингээж эхэлсэн юм. Энэхүү санаачилгаа улам гүнзгийрүүлэн Galaxy Buds2 Pro-д ашигласан хуванцар материалын 90%-г дахин боловсруулсан хуванцараар хийсэн гэдгээ тэд бахархалтайгаар зарлажээ. Шинэ Galaxy Z загварын утаснуудын зарим эд ангиудыг далайн хуванцар хог хаягдлаар хийсэн бөгөөд гаднах хайрцгийг 100% дахин боловсруулсан цаасаар үйлдвэрлэсэн аж.
Дэлхий даяар Galaxy Z Fold4 | Z Flip4 утасны урьдчилсан захиалга нэгэн зэрэг эхэлсэн бөгөөд манай улсын хувьд Самсунгийн гар утасны Монгол дахь албан ёсны борлуулагчид болох Mobicom, Unitel, Technozone, Sain Electronics, Solar Star, BSB Service, Pc Mall байгууллагууд бэлэгтэй, урьдчилсан захиалга авч байна.
Урьдчилсан захиалга үргэлжлэх хугацаа 9-р сарын 1-г дуустал явагдах боловч бэлгийн тоо хязгаартай тул захиалга хугацаанаас өмнө дуусах боломжтой юм.
Бэлгийн хувьд:
- Galaxy Z Fold4 худалдан авбал Galaxy Watch4 Classic цаг
- Galaxy Z Flip4 худалдан авбал Galaxy Buds2 Pro чихэвч бэлэглэж байна.
Дэлгэрэнгүй мэдээллийг
Samsung албан ёсны фейсбүүк хуудас болон Самсунгийн хэрэглэгчийн лавлах 1800-2555 утсаар авна уу
1 FlexCam гэдэг нь утасны Flex горимыг ашиглан камер ашиглахыг хэлнэ. Flex горим нь утас 75°-115° дэлгэгдсэн байх үед ажиллана.
2 Galaxy Z Flip3 утастай харьцуулав.
3 SmartThings апп дотор SmartThings Scene-г идэвхижүүлсэн байх шаардлагатай.
4 Taskbar нь зөвхөн үндсэн дэлгэц дээр ажиллана.
5 30X Space Zoom нь 3Х оптик таталттай. 30Х нь хиймэл оюун ухаанд суурилсан дижитал таталттай.
6 Settings рүү ороод Labs-г идэвхижүүлсэн байх шаардлагатай.
7 Auto Switch хэмээх ТВ болон утасны дуудлага хооронд чөлөөтэй шилжих горим нь 2022 оны 2-р сараас хойш үйлдвэрлэгдсэн Samsung ТВ-д суурилсан болно. Хэрэв суугаагүй бол 2022 оны 7-р сараас update орох юм. Auto Switch-р ТВ-тэй холбогдох горим нь зөвхөн утаснаас дуудлага явуулах, ирэх үед ашиглагдана.
Энтертайнмент
“Номын баяр” маргааш нээлтээ хийнэ
Монгол Улсын Их Хурлын дарга Г.Занданшатарын санаачилгаар ном бүтээлийг дээдэлдэг уламжлалт соёлыг өвлүүлж, бүх нийтээрээ уншдаг ард түмэн болох зорилгоор “Үндэсний бичиг соёл, номын өдрүүд”-ийг жил бүрийн 5 болон 9 дүгээр сард тэмдэглэн өнгөрүүлэхээр хуульчилсан билээ.
Ном унших соёлыг түгээн дэлгэрүүлэхэд чухал үүрэг гүйцэтгэж буй “Номын баяр”ын арга хэмжээ “Илүү их уншъя” уриатайгаар 35 дахь удаагаа тавдугаар сарын 18, 19, 20-ны өдрүүдэд жанжин Д.Сүхбаатарын талбайд болох гэж байна.
“Номын баяр”-ын арга хэмжээнд монголын зохиолчдоос гадна гадаадын алдартай зохиолч, хэвлэн нийтлэгчид ирж оролцдог болсноор Монголын уншигчид зохиолчидтой биечлэн уулзах сайхан боломж тохиох болсон билээ.
“Номын баяр” бол зөвхөн ном худалдах биш, олон талын хамтын ажиллагаа өрнөдөг талбар бөгөөд 200 гаруй хэвлэн нийтлэгч, 300 гаруй зохиолч тогтмол оролцдог. Энэ жилийн баярт шинээр 60 гаруй шинэ оролцогчид нэмэгдсэн бөгөөд уг баярыг дунджаар 250 мянган хүн зорин ирдэг байна.
Энэ өдрүүдэд “Шилдэг уншигч-анги, хамт олон”, “Шилдэг сурагч хүүхэд”, “Шилдэг ном”, Шилдэг хэвлэлийн газар”, “Шилдэг номын сан”-д олгодог нэрэмжит шагналаа УИХ-ын дарга Г.Занданшатар гардуулах юм.
Мөн “Номын баяр”-ыг зорьж ирсэн уншигчид Парламентын номын сангаас дэлгэсэн монгол төрийн түүхийг илтгэх ном, судалгаа, түүх, бичиг соёлын үнэт сан хөмрөгтэй танилцах боломжтой хэмээн Улсын Их хурлын Хэвлэл мэдээлэл, олон нийттэй харилцах газраас мэдээллээ.
Энтертайнмент
Чингис Хаан Үндэсний музей зуны цагийн хуваарьт шилжлээ
Чингис хаан Үндэсний музей нь 2024 оны тавдугаар сарын 15-наас есдүгээр сарын 14 хүртэл зуны цагийн хуваарийн дагуу ажиллана. Тодруулбал, 2024 оны тавдугаар сарын 15-наас 9-20 цагийн хооронд ажиллаж байх юм гэж Чингис хаан Үндэсний музейн захиргаанаас мэдээллээ.
Энтертайнмент
Г.Мөнхзаяа: Өглөө эрт босчихоод өчигдөр зурснаа шинжиж харах шиг жаргал үгүй
Монголын урчуудын эвлэлийн гишүүн, МУЭ-ийн Дорноговь салбарын тэргүүн зураач, өв тээгч, ерөөлч магтаалч Ганхуягийн Мөнхзаяатай Дүрслэх урлагийн долоо хоног буюу “Art week” арга хэмжээнд бүтээлээ дэлгэн үзэгч олонд толилуулж байхтай тааралдаж ярилцлаа. – Соёлын яамны санаачлагаар МУЭ-тэй хамтран гурав дахь жилдээ зохион байгуулагдаж буй “Art week”-т олон уран бүтээлчид бүтээлээ дэлгэжээ. Таны тухайд хичнээн бүтээлтэй ирэв? -Энэ удаагийн үзэсгэлэнд орон нутгийн уран бүтээлчид Хүүхдийн урлан бүтээх төвд өөрсдийн сэтгэл зүрхээн шингээн туурвисан бүтээлүүдээ дэлгэн сонирхуулж байна. Миний хувьд хайрлаж, хүндэтгэж явдаг нутгийн ах, МУЭ-ийн гишүүн, СТА ахмад зураач н.Халзан гуайтайгаа дөрөө харшуулан ирлээ. Үзэсгэлэнгийн танхимын баруун урд талын талбайд бид хоёр бүтээлээ дэлгэсэн байгаа. Сэтгэл нэг, зүтгэл нэг уран бүтээлч андуудтайгаа уулзаж, бие биеийнхээ бүтээл туурвилыг сонирхохын зэрэгцээ мэргэжлийн ур чадварын хувьд хэн хэрхэн өсч дэвжиж буйг харж, шинэ залуу уран бүтээлч нартайгаа танилцсан сайхан арга хэмжээ болж байна даа. Өөрийн биеэр ирж амжаагүй ч уран бүтээлээ ирүүлсэн зураач олон байна. -Таны бүтээлүүдээс аргамаг хурдан хүлгийн өнгө зүс, явдал суудал, биеийн хэлэмжийг олж харж болохоор юм. Уралдааны замд гарсан морь, уралдаад ирсэн морь хоёрын сэтгэл зүй шууд уншигдаж байна шүү. Бас түмний харцыг өөр дээрээ татах цоохор жороо морь янзтай юм аа? -Уран бүтээлч бүр өөрийн бүтээлдээ ямар нэгэн онцгой зүйл харуулахыг хичээдэг. Жишээ нь таны олж хараад байгаа аргамаг хүлгийн онцгой содон зүс, хөдөлгөөн, биеийн хэлэмж зэргийг бүтээлдээ шингээж өгөх нь миний хүсэл. Яагаад заавал морь гэж үзэгч олон асууж байна. Миний хүүхэд нас хурдан морины нуруун дээр өнгөрсөн гэж хэлж болно. Хонины номхон хонгор мориос наадамчин олныг баясган цолоо дуудуулах аргамаг хурдан хүлгийн зоон дээр салхи татуулан давхиж өссөн хүн чинь морь зурахгүй яах билээ. Бас хүүхэд гэлтгүй морины цол дуудаж явлаа. Өөрийнхээ хэмжээнд морин хуур татаж, ерөөл магтаал хайлна. Ийм л орчинд өссөн зураач. Энэ цагийн хэллэгээр өв тээгч. Зэгзийсэн сайхан хурдан хүлгийг зурчихаад ойртож нэг, холдож нэг хараад зогсч байх шиг жаргал надад үгүй. -Бүтээл дундаас жороо цоохор мориор гангарсан наадамчин эрийн хөрөг нүднээ тусч байна шүү. Хөргийн эзэн бодит хүн үү эсвэл? -Наадамчин эр гэж та зөв харжээ. Зураач хүн туурвисан бүтээлийг нь үзэгч олон шууд уншиж чадаж байвал “болжээ” гэж боддог. Энэ бүтээлийн тухайд гэрэл зургаас санаа авч туурвисан. Хоёр өдөр наадамлачихаад гэр рүүгээ харьж яваа эр. Мэдээж хоёр өдөр наадамласан хүн үл ялиг халамцуу явж байж ч мэднэ. Бас амандаа ардын дуу аялсан шигээ сажилуулж яваа юм. Наадмын үзүүр түрүүний барилдааны талаар бодож, “тийм мэх хийх байсан” гээд л ганцаараа ярьж яваа байж ч мэдэх наадамчин. Гэрээсээ гарахдаа наадамд явна гээд их л гангалж гарсан байх. Одоо түүнд бушуу түргэн гэрийнхээ барааг харах ч бүхнээс чухал байгаа болов уу. Монголчууд биеэ барьсан дээл өмсдөггүй шүү дээ. Тиймээс дээл нь хэлхгэр, халхгар байгаа юм. Арын дэвсгэр өнгөнд ач холбогдол өгөөгүй ээ, илүү дутуу зүйлгүйгээр морь, хүн хоёроо тодотгож өгөхийг чухалчилсан. -Аж байдлын ертөнцөөр аялж явтал гэнэтхэн хийсвэр сэтгэлгээнд шилжсэн бүтээлүүд рүү шилжчихлээ. Ойлгоход бэрх санагдчихлаа. Ухаан хүрэхгүй гэм юм уу. -Энэ бүтээл миний уураг тархинд олон жил явсан. Тэгж тэгж нэг юм цаасан дээр буусан. Шулуухан хэлэхэд, морин хуур бол мөнх хөх тэнгэрээс монголчуудад илгээсэн хишиг. Тийм учраас хоёрхон чавхдасаас уянгалах айзам эгшигт хорвоо дэлхий бүхлээрээ багтдаг байхгүй юу. Тийм учраас тэнгэрийн хөгжим гэсэн санааг энэхүү уран бүтээлээрээ харуулахыг зорьсон. Хүмүүс хуурын чавхдас нь байх атлаа морин хуурынх нь толгой хаана байна гэж асууж мэдэх юм. Дуурсах аялгуу нь тэнгэрт хүрч, дээд тив баясан хөөрч, үүлэн хээ татуулан орчлонгоор нэг түгж байгаа санаа юм. Нөгөөтэйгүүр, бодит аж байдал болоод хийсвэр сэтгэлгээний аль алинийг хослуулсан бүтээл туурвихыг хичээж байгаа. Морин хуур бол монголчууд биднийг дэлхийд төлөөлөх үнэт өв. -Танд энэ мэт бүтээл олон бий юу? -Миний сонирхол ихэнхдээ хийсвэр талдаа. Тэр хэрээр сүүлийн үед туурвиж буй бүтээлүүдэд хийсвэр зонхилж буй. Гэхдээ орон нутагт ийм жанарын бүтээл туурвихад дутагдалтай тал олон байна. Үзэгчид гэхэд л ойлгож хүлээж авахад бэлэн биш байх жишээний. – Авъяас төрөлхийн байдаг ч хөгжүүлэхгүй бол уугиж байгаад унтардаг гал гэж нэгэн эрхэм хэлсэн байдаг. -Би тав зургаатай байхаасаа л харандаа, цаас хоёртой нөхөрлөсөн. Хэдэн цагаар ч хамаагүй суудаг хүүхэд байсан. Тэр мэдрэмж, итгэлдээ хөдлөгдөн СУИС-д элсч Дүрслэх урлагийн сургуулийг 2009 онд төгссөн. Ажил амьдралынхаа гарааг Дорноговь аймгийнхаа Политехник коллежоос эхэлж, эзэмшсэн мэргэжлээрээ гар урлалын ангид багшилж байна. Миний хувьд мэргэжлийн уран бүтээлч. -Таны оролдож үзэх гэж буй урсгал, чиг хандлага юу байна? таны харж байгаа урлагийн урсгал чиглэл юу байна вэ? -Орон зайн чиглэлээр бүтээл туурвих битүүхэн бодолтой яваа. -Уран бүтээлчид онгод орж ирэх гэж ярьдаг шүү дээ. Таны хувьд ямар үед онгоддоо хөглөгддөг вэ? -Миний хувьд яг тийм үед онгод маань орж ирдэг гэсэн зүйл байхгүй. Өглөө эрт босчихоод нэг гартаа бийрээ нөгөө гартаа аягатай цайгаа барьсан шигээ зогсчихоод өчигдөр зурснаа шинжиж харах шиг жаргал үгүй -Та багшилж байгаа юм байна. Шавь нараа өөр шигээ зураачаас гадна өв тээгч болгохыг зорьж байна уу? -Шавьтай болно гэдэг хэн хүнд олдохгүй сайхан зүйл. Тэр дундаа шавь нар маань амжилт гаргах юм бол багш аа хэмээн дуудуулж яваагийн жаргал тэр байх. Миний хувьд сурагчиддаа учиргүй мэргэжлийн онол заахыг уртал болгодоггүй. Хүнтэй мэндэлж сурахаас, зөв сууж сурахаас л бидний хичээл эхэлдэг. Зөв хүнээс хэн хүний сэтгэлд хүрэх бүтээл гарна. Цаашлаад мэргэжилдээ эзэн байх гэдэг зүйлийг ойлгуулахыг хичээж явна даа. Миний шавь нар зав зай гарвал ч “Багш аа, ерөөл хэлээч, магтаал хайлаач” хэмээдэг. Би ч дуртайяа хүүхдүүдийнхээ хүслийг биелүүлж өгдөг. Олон шавь нар дотроос хэн нэг нь намайг залгамжлах нь гарцаагүй. Тэнгэрийн өгөгдөл хэнд байна, тэр хүн магтаал хайлах нь бий. Учир жанцангүй юм гэж үгүй шүү дээ, энэ хорвоод. -Энэ олон бүтээл дундаас таныг чамгүй зовоосон атлаа эргүүлээд аз жаргал бэлэглэсэн бүтээл тань аль нь вэ ? -Бүтээл бүхэн минь өөр өөр цагт төрдөг. Онгод нь хөглөсөн юм уу, зарим бүтээлээ босон суухын завсарт туурвина. Заримдаа хэдэн өдөр ч ноцолдоод ард нь гарахгүй зовоох нь бий. Миний энд дэлгэгдсэн бүтээлийн дийлэнх нь олон хоног тархинд минь амилж яваад цаасан дээр буусан аз жаргал бас зовлон минь. Эцсийн дүндээ зураачийн эгэл амьдрал. – Та соёлын өв тээгч. Хэнээс өвлөсөн авьяас вэ? -Ерөөл, магтаалыг багаасаа сонирхсон. Унасан морины минь цолыг дуудаж байх тэр агшин шиг жаргал гэж үгүй. Одоо ч чихэнд минь сонсогддог. Түмнийг баясгасан наадмын үзүүр түрүүний бөх, хурдан морины айраг түрүүг дуудаж, цол дуудна гэдэг хэн хүнд олдох буян биш шүү. Хүүхэд байхын л яавал энэ цоллооч нар шиг болох вэ гэж боддог байлаа. Дорноговь аймгийн төвд шилжин ирж, аравдугаар ангид элсэн суралцахаар ирээд Зундуйн Чулуунбаатар багшдаа шавь орсноор албан ёсны ерөөлч магтаалч болох зам минь нээгдсэн. Зураач, магтаалч, морин хуурч байна гэдэг миний хувьд бурханы хишиг юм. Маш сонирхолтой зүйлүүд. Нэг зураг эхлүүлээд түүнийхээ будгийг хатах хооронд морин хуураа шүүрч аваад ерөөл магтаалаа хайлна. Шавь нарынхаа амьсгаагаа түгжиж ирээд чагнаж буйг харах ч бас л сайхан мэдрэмж шүү дээ. Хажуугаар нь уртын дуу бага зэрэг оролддог, ер нь үндэсний өв соёлоос сонирхохгүй зүйл байхгүй гэж хэлж болно. Би өөрийгөө төрөл бүрээр сорьж үзэх, завгүй байлгах дуртай нэгэн.
-
Нийгэм8 цаг өмнө
Аюулт үзэгдэл, ослын 99 удаагийн дуудлагаар үүрэг гүйцэтгэжээ
-
Нийгэм7 цаг өмнө
Уламжлалт анагаах ухааны 7 их сургууль цөм төлөвлөгөөгөө нэгдсэн байдлаар тогтжээ
-
Нийгэм7 цаг өмнө
ОХУ-аас ирүүлсэн хүмүүнлэгийн тусламжийн үр тарианы тэжээлийг хүлээн авч, орон нутагт олголоо
-
Нийгэм7 цаг өмнө
Замын-Үүд сумын ойн барилдаанд Б.Орхонбаяр арслан түрүүллээ
-
Нийгэм5 цаг өмнө
ЦЕГ: 350 хэргийг шүүхэд шилжүүлэх саналтай прокурорт хүргүүллээ
-
Улс төр5 цаг өмнө
Монгол Улсын Ерөнхийлөгч У.Хүрэлсүх ээжүүдэд Алдарт эхийн одон гардууллаа
-
Нийгэм5 цаг өмнө
Монгол Улсаас жүдо бөхийн 6 дахь Дэлхийн аварга төрлөө
-
Нийгэм4 цаг өмнө
Х.Нямбаатар: Нийслэлийн өмчийн асуудалтай холбоотойгоор Л.Наранбаатар, Ц.Батбаатар нарыг хуулийн байгууллагаар шалгуулна