“Эх орондоо сайхан амьдрах арга алга” гээд  харийг  зорин  ажил хийхээр залуусын цуваа үргэлжилсээр.  Бас явах хүсэлтэй ч виз олдохгүйн улмаас санааширч,  мөрөөдөж суугаа нь бүр ч олон байж мэднэ.  Үнэн хэрэгтээ  ажлын байр олдохгүй арга нь барагдсандаа  эх нутгаа орхиж байна уу гэвэл үгүй.  Мэдээллийн бүхий л хэрэгслээр  “Тогооч, үйлчлэгч, үсчин, худалдагч, барилгын туслах ажилтан, оёдолчин, барилгын инженер, эмч, багш, сэтгүүлч, орчуулагч,  ажилд авна” гэсэн зар урссаар. Шулуухан хэлэхэд,  Монгол Улс ажиллах хүчний хомсдолд хэдийнэ оржээ. Эзэмшсэн мэргэжилдээ эзэн болсон  чадвар, чадамж өндөртэй боловсон хүчний тухайд ажлын байрны хомсдлыг ашиглах шиг л болж буй.  Компаниас компани дамжин, хамгийн өндөр цалин, хангамж  амласан аж ахуйн нэгжид “биеэ үнэлэх” болсон. Чадаж байгаа юм чинь яая гэх вэ.

Харин асуудлыг нөгөө өнцгөөс харвал тэс ондоо дүр зураг харагдах аж.   Мэдээж эхнийх нь  амар хялбар аргаар амьдрахыг илүүд үзэгсэд. Тэд эцэг, эхийн буянаар  талхгүй хонохыг зовлон үзээгүй  учраас шууд л  маш гоё оффист залран , өмссөн гутал хувцас, барьсан утас цүнхээрээ өрсөлдөн, үдэш  бүр  бааранд суун төрсөн өдөр  тэмдэглэхийг чухалчилдаг нөхдүүд энэ бүлэгт хамаатай. Удаах нь хэн нэг нь болгоод байгаа  учраас түүнд нь найдан биеийн амрыг харагчид.  Олонхи нь ажилд ороод авсан цалин нь автобус, өдрийн хоолондоо таардаг юм билээ гээд л гэдсээ илэн гүрийгсэд .   Гурав дахь нь залхуугийн залхуу.   Монгол Улсад өлсгөлөнгөөр үхнэ гэж байхгүй хэмээн  хэвтэгсэд. Төр байгаа цагт тэжээж л таарна.  Хүүхдийн мөнгө хийгээд ажилгүйдлийн тэтгэвэр, тэтгэмж.  Ажил орлогогүй иргэдэд зориулсан  төрийн бүх үйлчилгээ  үнэгүй.    Маш олон бага орлоготой  өрх  “Хүүхдийн мөнгө” –өөр амь зуудаг.  Хүүхэд төрүүлээд л байвал улс тэжээдэг юм байх гэх ойлголт олон арван залхуучуудын тархинд витамин адил үйлчлэх болсоор 30 шахам жилийн нүүр үзэж байна.    Төрөөс  ирэх оны төсвийн төсөлд Хүүхдийн мөнгөний хэмжээг өөрчлөхгүйгээр буюу 100 мянган  төгрөг байлгахаар тооцжээ.  Гэвч зардал нь өндөр тусч байгаа тул хүүхдийн мөнгийг өрхийн орлогоор нь ангилж олгох хувилбарыг Сангийн яам дэвшүүлэв. Тодруулбал, хүүхдийн мөнгийг зорилтот бүлэгт л олгоно, өндөр орлоготой иргэдэд олгохгүй. Ингэснээр нийт хүүхдийн 80 хувьд хүүхдийн мөнгийг үргэлжлүүлэн олгох оор төлөвлөв бололтой.   Сангийн сайд Б.Жавхлан ч “100 мянган  төгрөгийн хэмжээг өөрчлөхгүй. Харин өндөр орлоготой өрхийн хүүхдүүдэд олгохгүй буюу хүүхдийн мөнгийг тодорхой бүлэгт өгөх нь зүйтэй гэж үзэж байна” хэмээн байр сууриа илэрхийлсэн.    Бодит байдал дээр   хүүхдийн мөнгө авах хүсэлтэй  иргэний тоо нь  авах  хүсэлгүйгээсээ   хэд дахин илүү байгаа   гэдэгт эргэлзэх зүйл алга.  Ингэхэд төр маань  “Зорилтод бүлэг” гэдгээ хэрхэн тодорхойлж байгаа юм бол.   Хэдхэн жилийн өмнө  угаалгын машин, зурагт, компьютертэй   бол амьжиргаа нь боломжийн гэх ангилалд багтдаг байлаа.  Тиймээс  энэ удаад асуудлыг арай өөр байдлаар харж дүгнэх хэрэгтэй болов уу. Тэгээд ч бараа бүтээгдэхүүний үнэ тэнгэрт хадаж, мөнгөгүйчүүдийн арми жил ирэх тусам өссөөр.  Энэ бүхнийг  олж харан тэнцвэртэй бодлого барих нь  энэ цаг үед хамгийн мэргэн шийдвэр байх нь гарцаагүй.