Америкчууд өчигдрийн мягмар гарагт АНУ-ын Конгрессын болоод хэд хэдэн мужийн амбан захирагч, орон нутгийн хууль тогтоох байгууллагаа сонгох сонгууль өглөө.

Энэ сонгуулиар Конгрессын доод танхим болох 435 суудалтай Төлөөлөгчдийн танхимын гишүүдийг бүгдийг сонгох бол Сенатын гуравны нэг хувийг шинээр сонгоно. Үүний зэрэгцээ 36 муж, Гуам, Умард Марианы арал, Америкийн Самоагийн амбан захирагчийг бас сонгоно.

Энэ сонгууль АНУ-ын Ерөнхийлөгч Жо Байдены үйл ажиллагаанд үнэлэлт дүгнэлт өгч, 2024 онд болох төрийн тэргүүний сонгуулийн өмнөх чухал тандалт болно гэж Өрнөдийн хэвлэлүүд мэдээлж байна. Энэ сонгууль Ерөнхийлөгчийн бүрэн эрхийн хугацааны яг дунд болдог болохоор завсрын гэж нэрлэдэг  юм.

Сонгуулийн санал хураах байрууд мягмар гаргийн өглөө орон даяар өглөөний 06:00 цагт нээдэг байна. Харин санал хурааж дуусах цаг муж бүрт харилцан адилгүй Нью-Йорк мужид 21:00 цагт хаадаг бол, Кентуккид 18:00 цагт хаадаг байна.

Энэ жил сонгогчдын саналыг урьдчилан авснаар даваа гаргийн өглөө гэхэд 35.5 сая хүн саналаа өгчихсөн байжээ.

Энэ сонгууль АНУ-д инфляци өсч,  хямралын айдас нүүрлэсэн, олон улсын байдал тогтворгүй ийм үед болж байна. Үүний зэрэгцээ сонгогчид улс оронд нь гэмт хэрэг өсч байгаа, цагаачлалын нөхцөл байдалд сэтгэл түгшиж байна. Сонгуулийн өмнө явуулсан санал асуулгуудаас харахад америкчууд ардчилсан намд сэтгэл дундуур, бүгд найрамдахчуудад илүү найдаж байгаа нь харагджээ.

Завсрын сонгууль зөвхөн 2024 онд болох ерөнхийлөгчийн сонгуулийн кампанид нөлөөлж, түүний төлөвийг харуулахаас гадна жирийн америкчуудын амьдралд ч  шууд нөлөөлнө.

Оросууд АНУ-ын сонгуульд хөндлөнгөөс нөлөөлдөг үү

Энэ сарын 8-нд болж байгаа АНУ-ын Конгрессын завсрын сонгуульд Орос нөлөөлнө гэсэн оросын бизнесмэн Евгений Пригожины үгэнд АНУ-ын Төрийн департаментын хэвлэлийн албаны тэргүүн Нед Прайс тайлбар хийсэн байна.

Хэвлэлийн мэдээлэл дээр Прайс оросын Пригожины үгийг иш татаад сонгуульд аль талаас хөндлөнгөөс нөлөөлөхийг АНУ тэвчиж чадахгүй гэсэн байна.

“Чөлөөт, ил тод сонгууль бол америкийн нийгмийн тулгын чулуу л гэсэн үг. Манай сонгуульд хаанаас ч гэсэн хэн ч хөндлөнгөөс нөлөөлөхийг бид тэвчиж чадахгүй. Үүнийгээ бид үг хэлээр ч, ажил хэрэг дэрээ ч харуулах болно” гэж Төрийн департаментын хэвлэлийн нарийн бигчийн дарга онцолжээ.

Прайс бизнесмэн Пригожины мэдэгдлийг “хэн ч, хаана ч байсан өөр бүрэн эрхт улсын ардчилсан сонгуульд хөндлөнгөөс оролцсон гэж олон нийтэд сайрхаж болно” гээд “ял шийтгэл хүлээхгүй байгаадаа эрдэж байгаа юм” гэсэн байна.

Сонгуульд хөндлөнгөөс ямар нэг байдлаар нөлөөлж мэдэх үйлдлүүдийг АНУ-ын Дотоод аюулгүй байдлын яам “маш анхааралтай” ажиглаж байгаа гэж Прайс онцолжээ.

Оросын бизнесмэн Евгений Пригожин арваннэгдүгээр сарын 7-нд сэтгүүлчдийн америкийн сонгуульд Орос нөлөөлдөг үү гэсэн асуултад хариулахдаа “Би маш тодорхой хэлье, хүлцэл өчье. Ер нь зарим ойлгомжгүй зүйлүүдийг зөвшөөрсөн. Ноёдоо бид хөндлөнгөөс нөлөөлсөн, нөлөөлж ч байгаа, нөлөөлөх ч болно. Мэдээж, засал хийх байдлаар, өөрийнхөөрөө, чадах хэрээрээ нөлөөлнө” гэж хэлсэн юм.