Зам, тээврийн хөгжлийн яамнаас агаарын тээврийн салбарт “Хямд тийз-хүртээмжтэй нислэг” зорилт дэвшүүлж 2023 онд агаарын тээврээр 1 сая 750 мянган зорчигч тээвэрлэсэн.

Зам, тээврийн хөгжлийн сайд С.Бямбацогт Улаанбаатар Олон Улсын шинэ нисэх буудал ХХК-ийн гүйцэтгэх захирал Китанака Такефумитай уулзах үеэрээ 2024 онд 2 сая 200 мянган зорчигч агаараар тээвэрлэхээр төлөвлөсөн тул нисэх буудлын хүчин чадлыг нэмэгдүүлж, ачаа тээшийг түргэн хугацаанд нэвтрүүлж, иргэдэд хүндрэл, чирэгдэл үүсгэхгүй байх ёстойг хэлсэн.

Энэ хүрээнд өнөөдөр Төрийн нарийн бичгийн дарга С.Батболд Япон Олон Улсын хамтын ажиллагааны байгууллага /ЖАЙКА/-ын төлөөлөгчид, “Чингис хаан” олон улсын нисэх буудлын үйл ажиллагаа, удирдлага зохион байгуулалтыг хариуцан ажиллаж буй япон талын төлөөлөлтэй уулзлаа.

Уулзалтаар зуны нислэгийн оргил ачааллын үед иргэддээ шуурхай үйлчлэх, үйлчилгээний хүртээмжээ нэмэгдүүлэх, “Чингис хаан” олон улсын нисэх буудлын багтаамжийг нэмэгдүүлэх, өргөтгөх судалгааны ажлыг 2024 оны зургадугаар сараас 2025 оны нэгдүгээр сарын хооронд хийж дуусгах, 2025 оноос өргөтгөлийн барилгын ажлыг эхлүүлэхээр санал солилцлоо.

Мөн нисэхийн менежмент, нисэхийн эдийн засагч, нисэхийн эрхзүй зэрэг нисэхийн чиглэлээр мэргэшсэн ажилтнуудыг бэлтгэх, харилцан туршлага солилцох санал дэвшүүлсэн.

Нөгөө талаас нисэх буудалд ажиллаж буй төр, хувийн хэвшлийн байгууллагын хамтын ажиллагааг өргөжүүлж, нисэх буудлын өргөтгөх, шинэчлэх судалгааны ажлаа шуурхай эхлэхээ илэрхийллээ гэж Хөшигийн хөндийн нисэх онгоцны буудал ТӨХХК-иас мэдээллээ. 

“Парис 2024” олимпын хүндийг өргөлтийн төрөлд ур чадвараа сорих тамирчдыг Олон улсын хүндийг өргөлтийн холбоо урьдчилсан байдлаар зарлалаа.

Одоогоор эмэгтэйчүүдийн 81 кг-ын жинд Монголын туйванч М.Анхцэцэг чансаагаараа шилдэг 10-т бичигдэж байгаа бөгөөд Парисыг зорих эрхийн болзлоо хангаад байна.

Олон улсын хүндийг өргөлтийн холбооноос Парисын олимпод оролцох тамирчдын нэрсийг эцсийн байдлаар энэ сарын 24-ний өдөр зарлаж, энэ сарын 31-ний өдөр Үндэсний олимпын хороод баталгаажуулах журамтай гэж Монголын Үндэсний Олимпын Хорооноос мэдээллээ. 

Хууль зүй, дотоод хэргийн дэд сайд Б.Солонгоо Нэгдсэн Үндэстний Байгууллагын Эрүү шүүлтээс урьдчилан сэргийлэх дэд хорооны Элина Штайнерте тэргүүтэй гишүүдтэй 2024 оны 05 дугаар сарын 15-ны өдөр уулзлаа.
Дэд хорооны гишүүд НҮБ-ын Эрүүдэн шүүх болон бусад хэлбэрээр хэрцгий, хүнлэг бусаар буюу хүний нэр төрийг доромжлон харьцаж шийтгэхийн эсрэг конвенц, түүний нэмэлт протоколоор хүлээсэн үүргийн биелэлт, эрүүдэн шүүхээс урьдчилан сэргийлэх, тэмцэх хууль эрх зүйн орчин, шинэчлэлтэй танилцах зорилгоор 2024 оны 05 дугаар сарын 05-16-ны өдрүүдэд Монгол Улсад ажиллаж байгаа юм.

Уулзалтаар Хууль зүй, дотоод хэргийн дэд сайд Б.Солонгоо дээрх конвенцийн дагуу хүлээсэн үүргээ биелүүлэх чиглэлээр хэрэгжүүлж буй хууль, эрх зүйн шинэчлэлтэй холбоотой мэдээлэл мөн С.Зориг агсны амь насыг хөнөөсөн хэрэгт хилсээр ял шийтгэгдсэн байсан Т.Чимгээ, Б.Содномдаржаа нарын эрх ашгийг хамгаалах асуудлаар Ажлын хэсэг байгуулан ажиллаж байгаа талаар мэдээлэл өглөө.

Уулзалтын үеэр Дэд хорооны төлөөлөл гэм буруутай этгээдүүдэд эрүүгийн хариуцлага хүлээлгэх нь энэ төрлийн гэмт хэрэг дахин үйлдэгдэхгүй байх үндсэн суурь нөхцөл болохыг онцлов гэж Хууль зүй, дотоод хэргийн яамнаас мэдээллээ.